MATHAI 26 - Kok Borok (Re-edited) Bible (BSI)

Jisuno butharna kók chap laimani

¹ Omo tẃi kókrokno phrwngwi pái khe Jisu bini sagrirokno hai hwnwi sa kha,

² “Norok saui mano tei salnwi tong kheno Yókma Ter wngnai, hakhe Borokni Sajla kruso kanta bujakna bagwi yapharwi rohorjaknai.”

³ Aphuru ochai okrarok Judai okra chakrarok bai ochai bokhorok Kaiaphani nogo kuthum lai kha,

⁴ hakhe Jisuno tepsa khe romwi butharna hwnwi kók chap lai kha.

⁵ “Chwng bono o terni bisingo romna kók kwrwi, wng ya khe bororok udru mudru phnangnai se,” hwnwi bórok sa lai kha.

Jisu Bethania-o thok motom phuljakmani

⁶ Jisu Bethaniani biyadi chájak Simonni nogo tong phuru

⁷ bwrwi khoroksa holong kuphurni sisi-o khe morokma thok motom tubu-ui bini thani phai kha. Hakhe Jisu cháui tong phuru bo a thokno bini bokhorogo luproui rw kha.

⁸ Sagrirok abono nugwi jolijagwi hai hwnwi sa kha, “Omono tamo wngwi ahai’-no khibi lang?

⁹ O thok motomno phalwi rang kwbángma man kha mun bla, hakhe a rangno kwrwirokno rwui man kha mun!”

¹⁰ Bórok sa laimano Jisu saui manẃi bórokno hai hwnwi sa kha, “Norok tamo wngwi o bwrwimano tekto rw? Ani bagwi bo samung kaham’-no khlai kha.

¹¹ Kwrwirok ba norok bai máng tong bla, ang le norok bai máng tong glak.

¹² Bo ano khlaimani abo ano phobna tiyar khlaina bagwi se ani bwsago thok motom luproui rw-o.

¹³ Hakhe o kókno muitu narwk di, swngchar gwnangwi o Kothoma Kaham pírjak thani’-no bono muitu khlaiwi bo o samung khlaimano sajaknai.”

Juda Jisuno rom rwna gosimani

¹⁴ Hakhe sagri chiknwirokni bere khoroksa ochai okrarokni aro tháng kha, a sagri wng kha Judas Iskariot.

¹⁵ Bo hai hwnwi sa kha, “Ang Jisuno norokni yago yapharwi rohor khe norok ano tamo rwnai?” Bórok rukphaini rang khok kwthamchi lekhaui bono yapharwi rw kha.

¹⁶ Aphuruni simi khe Judas Jisuno rom rwui rohornani lama máng rutugwi tong kha.

Jisu bini sagrirok bai Yókma Terni panda chá laimani

¹⁷ Auang bángla terni puilani salo bini sagrirok Jisuni thani phaiwi hai hwnwi sẃng phai kha, “Chwngno buro nini bagwi Yókma terni panda khlai di hwn sla?”

¹⁸ Bo bórokno hai hwnwi sa kha, “Tauno borok khoroksani aro thángwi bono hai hwnwi sa di, ‘Ani jora sók phai kha; ang bai ani sagrirok nini nogo Yókma terni panda khlai phai anw, hwnwi Hodakra saui rohoro.’ ”

¹⁹ Jisu saui rohorma hai’-no sagrirok Yókma terni panda khlai kha.

²⁰ Sanja wng kheno Jisu sagri chiknwirok bai chána achuk lai kha.

²¹ Cháui tong lai phuru Jisu hai hwnwi sa kha, “Ang norokno o kók sa-o, norokni bere khoroksa ano rom rwnai.”

²² Sagrirok belai khá hamya wngwi khoroksa khoroksa khe “Subrai, abo ang ya na bla?” hwnwi bono sẃng lai kha.

²³ Jisu hai hwnwi sa kha, “Ano rom rwnai borok bo mairango ang bai baksa ruti chomsanai.

²⁴ Elembago sama hai’-no Borokni Sajla ma thwinai, Tamo khe Borokni Sajlano rom rwnai a borok bwswk se hamya sitrano! Achai ya khe se bo ham kuk kha mun!”

²⁵ Hakhe a rom rwnai Judas hai hwnwi sẃngcha kha, “Hodakra, abo ang ya na bla?” “Nwng’-no sa kha bla,” hwnwi Jisu sa kha.

Subraini panda

²⁶ Bórok chá lai tong phuru Jisu ruti naui Kaitorno hambai rw kha, hakhe abono swkagwi sagrirokno rw kha. “Hi’n, na di, omono chá di. Omo ani bahan,” hwnwi bo sa kha.

²⁷ Hakhe bo khuri naui Kaitorno hambai rw kha, hakhe bórokno abo yapharwi hai hwnwi sa kha,

²⁸ “Norok bebak’-no omono nung di. Omo wng kha aswk bororokni sumsok nakarna bagwi kochok rwmani ani thẃi, Kaitor ani o thẃi bai swmai tang kha.

²⁹ Ang norokno o kók sa-o, ang norok bai baksa Aphani ha-o angur bwtwi kwtal nung ya sak ang tei o bwtwi nung glak.”

³⁰ Hakhe bórok rwchapmung tángsa rwchap laiwi Tháistwi hathái-o tháng lai kha.

Pitor gosi glak hwnwi Jisu samani

³¹ Hakhe Jisu bórokno hai hwnwi sa kha, “Tini horo’-no norok bebak’-no ano khibiui khár bainai, tamni hwn khe elembago ahai hwnwi sa-o, ‘Kaitor mera mwrwknaino butharnai, hakhe gutni merarok piring-poroi wng bainai.’

³² Tamo khe ang mwthangwi tisajak baiwi norokni slái swkang Galili-o tháng anw.”

³³ Pitor Jisuno hai hwnwi sacha kha, “Bui bebak khibiui tháng phano ang le nono khibiui tháng glak!”

³⁴ Jisu Pitorno hai hwnwi sa kha, “O kókno muitu narwk di, tini horo’-no tokla kokchik ya sini nwng ano sini ya hwnwi uáitham sa anw.”

³⁵ “Nwng bai baksa butharjakna se gosi anw ba, nono sini ya hwnwi le ang sa se sa glak ta!” hwnwi Pitor sa kha. Bebak sagrirokbo a kók’-no kók sa kha.

Getsimani-o Jisu suri sanmani

³⁶ Hakhe Jisu bini sagrirok bai Getsimani hwnwi kwrẃngsa-o thángwi bórokno hai hwnwi sa kha, “Ang uro thángwi suri san bai ya sak norok oro achugwi tong lai di.”

³⁷ Bo bini logi Pitor bai Sebedaini bwsla khoroknwino tlang kha. Bo khábo khákhamjak kha, ámang-chímangbo wng kha,

³⁸ hakhe bo bórokno hai hwnwi sa kha, “Ang belai khe khákham kha, abo thwi phano pok glak. Oro tong di, ang bai baksa sichaui tong di.”

³⁹ Bo tei kisa bwskango thángwi ha-o bomkhlai hai hwnwi suri san kha, “Apha, man khe ba o khurino ani oroni nor di, omobo ani muchung tẃi ya, nini muchung tẃi’-no wng thung.”

⁴⁰ Hakhe bo sagri khorokthamni aro kiphilwi phaiwi bórokno muktrwi thángjak nuk phai kha. Bo Pitorno hai hwnwi sa kha, “Bahai khe norok ang bai baksa damsa phano sichaui tongwi man ya wng?

⁴¹ Sichaui tong di, belokjak ya tẃi khe suri sanwi tong di. Bwkha le kwrakno, bwsak se kebel.”

⁴² Jisu omo bai khe uáinwi thángwi hai hwnwi suri san kha, “Apha, ang nung ya wngwi o khurino norwi man ya khe nini muchung tẃi’-no wng thung.”

⁴³ Bo hai’-no hai kiphilwi phaiwi bini sagrirokno muktrwi thángjak nuk phai khua; bórok mokol phiyogwi tongwi man li ya.

⁴⁴ Jisu tei uáisa bórokno klangwi omo bai khe uáitham a kók’-no kók saui suri san kha.

⁴⁵ Hakhe bo sagrirokni thani kiphilwi phaiwi hai hwnwi sa kha, “Norok tabuk phano muktrwi thángwi lenglaui tong kho, hai da? Nai di, Borokni Sajla sumsok gwnangrokni yago yapharwi rohorjakna jora sók phai kha.

⁴⁶ Bacha di, him di tho. Iko, nahar di, ano rom rwnaino!”

Jisuno rommani

⁴⁷ Jisu kók saui tong phuru Judas aro sók phai kha, sagri chiknwirokni bere bo’-bo khoroksa. Bini logi borok kwbángma seng bai tokphung tẃi laijak, bórok ochai okrarok tei Judai okra chakrarok bai rohorjakmani.

⁴⁸ A rom rwnaisa a bororokno hai hwnwi phrwngwi tubu kha, “Ang motom sumani abono a borok. Bono rom di!”

⁴⁹ Juda aro sók phai kheno Jisuni thani tháng kha, hakhe “Hodakra, khulum kha,” hwnwi saui bono motom su-ui kha.

⁵⁰ “Takhuk, khlaina khe dakti khlai di,” hwnwi Jisu sa kha. Hakhe bórok phaiwi Jisuno romwi kha lai kha.

⁵¹ Jisuni logini khoroksa bini seng sotroui ochai bokhorokni seleng khoroksani khunju tankhlai rw kha.

⁵² Hakhe Jisu bono hai hwnwi sa kha, “Nini sengno daui ton phi di, tamni hwn khe seng tẃinai seng bai’-no thwinai.

⁵³ Norok saui man ya da, ang Aphani thani san khe bo logi logi’-no suari sengkrakrok chiknwino rohor glak kha mun diba?

⁵⁴ Omo tẃi hwn khe Elembago omo hai ma se ma wngnai hwnwi samani abo bahai khe nang phainai sla?”

⁵⁵ Aphuru Jisu bororokno hai hwnwi sa kha, “Ang ba dagait da, sengrok tokphungrok bai khe norok ano romna phai ba? Ang sal brúm brúm noktharo achugwi phrwngo, aphuru norok ano rom ya.

⁵⁶ Tamo khe diyarirok elembago swi langmani abo nang phaina bagwi se omorok wngo.” Aphuru bebak sagrirok bono khibiui khár bai kha.

Kaunsil bwskango Jisu

⁵⁷ Jisuno romnairok bono ochai bokhorok Kaiaphani nogo tlang kha, aro Kerong phrwngnairok tei okra chakrarok kuthum lai kha.

⁵⁸ Pitor hakchalo tongwi ochai bokhorokni nokhla jora bono rwkthar kha. Omo ulo tamo wngno abo naina bagwi bo nokhla-o thángwi sebukrok bai baksa achugwi kha.

⁵⁹ Ochai bokhorok bai bebak kaunsil Jisuno butharna bagwi sakki tatal rutuk lai kha.

⁶⁰ Borok kwbángma bachaui bini mungwi tatal sa phano bórok bini majra mungsa phano phunugui man li ya. Ulo khe borok khoroknwi bwskango thángwi

⁶¹ hai hwnwi sa kha, “Ang Kaitorni noktharno swbaiwi salthamni salo abono tisaui man phiro, hwnwi o borok sa kha.”

⁶² Ochai bokhorok bachaui Jisuno hai hwnwi sa kha, “Nini tháisa phano kók sana kwrwi da? O bororok nini mungwi majra bermani abo tamo?”

⁶³ Hai phano Jisu siring siring khe tong kha. Ochai bokhorok hai’-no hai bono hai hwnwi sẃng kha, “Kaitor kwthangni mungwi nwng chwngno swmai tangwi sa di: Nwng Kaitorni Sajla a Masia da?”

⁶⁴ Jisu hai hwnwi sa kha, “Abo nwng’-no saui tong kha bla. Tamo khe ang norokno o kók sa-o, tabukni simi norok Borokni Sajlano Kwplaisa Kaitorni yagra bwkhak achukjak nuk anw, phiya nokhani chumui-o khe phaima nuk anw.”

⁶⁵ Hai kheno ochai bokhorok bini rí sichigwi hai hwnwi sa kha, “Bo Kaitorno hamya sa kha! Chini tei tamo sakkini samung nang si? Tabuk’-no bo Kaitorno hamya samano norok khna bai kha.

⁶⁶ Tamo hwn bai?” “Bo majra gwnang, hakhe butharjakna nangnai,” hwnwi bórok sa bai kha.

^67-68 Hakhe bórok bini mwkhango khuktwi musu lai kha, bubo bu lai kha; baksa bono thapra rwui “O Masia, nono sabo bu sa di,” hwnwi hwn lai kha.

Pitor Jisuno gosi ya wngmani

⁶⁹ Pitor nokhla-o achugwi tongmani. Aphuru ochai bokhorokni selengjwk khoroksa bini thani phaiwi “Nwng’-bo Galilini Jisuni logini borokno,” hwnwi hwn kha.

⁷⁰ Hakhe bo bórok bebakni bwskango o kókno gosi li ya. “Nwng tamni kók sa abo ang saui man ya,” hwnwi bo sa kha,

⁷¹ hakhe nokhlani duglam phaising tháng kha. Tei khoroksa selengjwk bono nugwi aro tongnairokno “O borok Nasaretni Jisuni logi tongo,” hwnwi sa kha.

⁷² Pitor hai’-no hai o kókno gosi yaui “Ang swmai tangwi sa-o, ang a borokno sini ya!” hwnwi sa kha.

⁷³ Srapsa tong kha hwn kheno aro bachaui tong lainairok Pitorni thani phaiwi hai hwnwi sa phai kha, “Sói’-no nwngbo bórokni bere khoroksa, nini kók sama bai’-no nono romwi mano!”

⁷⁴ Hakhe Pitor swmai tangwi hai hwnwi sa kha, “Ang kubui sa ya khe Kaitor ano swrai thung! Ang a borokno sini ya!” Aphuru kheno tokla kokchik kha,

⁷⁵ hakhe “Tokla kokchik ya sini nwng ano sini ya hwnwi uáitham sa anw,” hwnwi Jisu bono samani kókno Pitor muitu manjak kha. Hakhe bo phataro thángwi swlwgwi kap kha.