MATHAI 25 - Kok Borok (Re-edited) Bible (BSI)

Bwrwi sikla-kwthar khorokchirokni rwngthoma

¹ “A salo Kaitorni ha omo hai se wngnai. Bwrwi sikla-kwthar khorokchirok tongmani. Bórok chati tẃi lai káijaknaisano lamjakna tháng lai kha.

² Bórokni bere khorokba khe khá si ya, tei khorokba khe khá sinai.

³ Khá siyarok khe chati le tẃi kha, thok bára khe, tẃi li ya.

⁴ Phiya a khá sinairok khe chatini logi thok bára tẃi kha.

⁵ Káijaknaisa phaina lerwi tongma bai a bwrwirok murumu te murumu te lipsa khe muktrwi tháng lai kha.

⁶ “Hor diboro khe ‘Iko, káijaknai sa phai sók phai kha! Lamjak phai bai di!’ hwnwi chirikhók lai kha.

⁷ Bwrwi sikla-kwthar khorokchirok sichaui bórokni chati dosi socha lai kha.

⁸ Aphuru khá siyarok khá sinairokni thani ‘Chini chati thwina naiwi tong kha, chwngno kisa norokni thok rw gra di,’ hwnwi sa kha.

⁹ Khá sinairok hai hwnwi sa kha, ‘I’nhi, wng glak; norokno rw khe chini wng glak. Tháng di, phalnogo thángwi paiwi nai di.’

¹⁰ Hakhe a khá si ya bwrwirok thok pai laina hwnwi tháng lai kha. Bórok tháng lai kheno káijaknaisa phaiwi sók phai kha aphuru a tiyar tongnai bwrwi khorokba káijaknaisa bai baksa kái lai panda-o habwi tháng lai kha, hakhe duglam soui rwjak kha.

¹¹ “Ulo khe tei bwrwi sikla-kwtharrok phai sók phaiwi hai hwnwi sa kha, ‘Takhuk, takhuk! Duglam phiyok di!’

¹² ‘Ang norokno si se sini ya,’ hwnwi a káijaknaisa sa kha.”

¹³ Jisu hai hwnwi saui kók mwthak kha, “Aboni bagwino hus khe tong di, Borokni Sajla bu salo phaino, bu jora phaino, abono norok saui man ya.”

Seleng khorokthamni rwngthoma

¹⁴ “Aphuru omo hai se wngnai, borok khoroksa beraina thángnanogo bini selengrokno ringwi bini sompotini barja berwi klang kha.

¹⁵ Bo jotono’-no yak chúk tẃi rwui klang kha, bo khoroksano rang khok basai, tei khoroksano nwisai, tei khoroksano sasai rwui klang kha. Hakhe bo ongkhorwi tháng kha.

¹⁶ A rang khók basai mannai seleng logi logi’-no thángwi bepar thwngwi tei rang basai aji kha.

¹⁷ Abo hai kheno a rang nwisai mannai seleng bo’-bo tei rang nwisai aji kha.

¹⁸ A sasai mannai seleng khe thángwi hakhor khurwi bini nokphangni rangno phobwi tonwi kha.

¹⁹ “Akhini’-no balogwi tongwi a selengrokni nokphang kiphilwi phaiwi bórok bai rang isap khlai lai kha.

²⁰ A rang basai mannai seleng phaiwi tei rang khók basai yapharwi hai hwnwi sa phai kha, ‘Nokphangsa, nwng ano rang khók basai klangmani. Iko, na di, ang ajimani tei rang basai.’

²¹ Nokphang hai hwnwi sa kha, ‘Kahamno khlai kha, nwng kók khnanai seleng kaham. Nwng kisa bai se kaham, aboni bagwino ang nono kwbángmani barja ber anw. Phai di, ang bai baksa tongthok phai di.’

²² “Hakhe a rang nwisai mannai seleng phaiwi hai hwnwi sa phai kha, ‘Nokphangsa, nwng ano rang khóknwisai klangmani. Iko, na di, ang ajimani tei rang khók nwisai.’

²³ Nokphang hai hwnwi sa kha, ‘Kaham’-no khlai kha, nwng kók khnanai seleng kaham. Nwng kisa bai se kaham, aboni bagwino ang nono kwbángmani barja ber anw. Phai di, ang bai baksa tongthok phai di.’

²⁴ Hakhe a rang sasai mannai seleng phaiwi hai hwnwi sa phai kha, ‘Nokphangsa, ang saui mano nwng maya kwrwi borok, nwng káima kwrwi-o suda raui-o, nwng sarma kwrwi-obo thumo.

²⁵ Ang kirima bai thángwi nini rangno phobwi tonwi kha. Iko, na di, nini rang.’

²⁶ Nokphang hai hwnwi sa kha, ‘Nwng seleng hamya, seler! Ang káima kwrwi-o suda raui-o, sarma kwrwi-obo thumo hwnwi nwng saui mano, hai da?

²⁷ Hakhe ba nwng buino phano ani rangno lakai rwthai klaimani, hakhe ang kiphilwi bwsa bai buma bai man phai kha mun.

²⁸ Tabuk, bini yakni a rangno naui a rang chisai gwnangno rw di.

²⁹ Tamni hwn khe gwnangno teibo rwjak anw, hakhe bo teibo kwbángma man anw; phiya ba, kwrwini khe kisa tongma suda bini yakni najak anw.

³⁰ A seleng bakuano khe phataro mwnakma-o khiklai rw di; aro bo ua hului ma kap anw.’ ”

Buj kotor

³¹ “Borokni Sajla bugra wngwi bebak suarirok bai phai phuru bo bini achukthayung kwchẃngo achuknai,

³² hakhe swngcharni bebak borok bini bwskango thumjaknai. Bo bororokno mera mwrwknai merano pun bai swkagwi tubuma hai khaknwi khe swkaknai.

³³ Bo merarokno khe bini yagra bwkhak tei punrok khe bini yaksi bwkhak tonnai.

³⁴ Aphuru bugra bini yagra bwkhakni bororokno hai hwnwi sanai, ‘Apha bai hamcha rwjaknairok, norok phai di! Swngchar snamjak phuruni simi norokni bagwi tiyar khlai tonmani a ha bantano na phai bai si di.

³⁵ Ang ok khui phuru norok ano chá rw kha; ang twi kang phuru norok ano khan kha; ano sini ya phano norok ano nogo kasa rw kha;

³⁶ ang rí kwrwi phuru norok rí kan rw kha; ang hamya klai phuru norok nai kha, alongo klai phurubo norok nai phai kha.’

³⁷ A kahamrok bono aphuru hai hwnwi sa phir anw, ‘Subrai, nwng ok khuima nugwi bu phuru chwng nono ma chá rw lang? Twi kangma nugwi bu phuru ma khan lang?

³⁸ Nono sini ya nugwi bu phuru chwng nono nogo ma kasa rw lang? Rí kwrwi nugwi bu phuru rí ma kan rw lang?

³⁹ Nono hamya klaima nugwi eba alongo klaima nugwi bu phuru ma nai lang?’

⁴⁰ Bugra hai hwnwi sa phir anw, ‘Ang norokno sói kókno sa-o, ani o takhukrokni bere kusu khoroksano phano norok abo tẃi khlai kha hwn khe abo ano’-no khlaima klai-o.’

⁴¹ “Hakhe bo yaksi bwkhakni bororokno hai hwnwi sa anw, ‘Ani bwskangni tháng di, Kaitor bai swraijaknairok! Soitan bai bini suarirokni bagwi snammani a thwi phlai ya hórni kundulo tháng di.

⁴² Ang ok khuiwi tong phuru norok ano chá rw li ya, twi kangwi tong phuru norok ano khan li ya;

⁴³ ano sini ya hwnwi norok nogo kasa rw li ya; rí kwrwi phuru rí kan rw li ya; ang hamya klai tong phuru alongo klai tong phuru norok ano nai li ya.’

⁴⁴ Aphuru khe bórok bono hai hwnwi sa phir anw, ‘Subrai, bu phuru nono ok khuijak nugwi, twi kangjak nugwi, sini ya nugwi, rí kwrwi nugwi, hamya klaijak nugwi, alongo klaijak nugwi chwng nono chuba ya wng lang?’

⁴⁵ Hakhe bugra bórokno hai hwnwi sa phir anw, ‘Ang norokno sói kókno sa-o, norok omorokni bere kusu khoroksano phano chuba ya hwn khe abo ano’-no chuba ya wngma klai-o.’

⁴⁶ Hakhe mol brúm brúm sátokjakna bagwi omorok rohorjak anw, kahamrok khe thangwi kwthang tong phlai anw.”