MATHAI 24 - Kok Borok (Re-edited) Bible (BSI)

Nokthar swbaijak anw hwnwi Jisu samani

¹ Jisu aroni kutulwi noktharni ongkhorwi tháng phuru sagrirok bono noktharni dolan-pakino phunukna bagwi bini thani phai kha.

² Bo hai hwnwi sa kha, “Au, norok omorokno nukma da! Ang norokno o kók sa-o, oro holong saka holong dulsa phano tong glak; joto swbai khibijak anw.”

Mol pái ya sini tamo tamo wngnai

³ Jisu Tháistwi Hathái-o achugwi tong phuru sagrirok tepsa khe bini thani phai kha. Bórok hai hwnwi sẃng kha, “Chwngno sa di, omo hai bu phuru wngnai? Nwng phaina kasu kha, molbo páina kasu kha hwnwi saui manna bagwi bubo tẃi tamo phunukjak granai?”

⁴ Jisu hai hwnwi sa kha, “Hus khe tong di, kebo bai lama ta koró rwjak di,

⁵ tamni hwn khe baksa baksa ani mungwi ‘Angno Masia!’ hwnwi sa phai anw, hakhe baksa baksano lama koró rw anw.

⁶ Norok gana-o chobani khorang khna anw, hakchalo choba nang lai kha hwnwi kók khna anw; hai phano ta uana di. Abo hairok ma wngnai’-no, aphurubo o mol pái ya kho.

⁷ Dopha bai dopha choba wng lai anw, ha bai ha nang lai anw. Kwrẃngsa kwrẃngsa-o asaribo wng anw, banglabo phai anw.

⁸ Omorok bebak’-no bwsa bána phuru bohok sa grama hai se.

⁹ “Aphuru norok romjak anw, sátokjakna bagwi yapharwi rohorjak anw, norok butharjak anw. Bebak borok’-no ani bagwi norokno naisler anw.

¹⁰ Aphuru baksa baksa uslu anw; bo’-bo bono rom rw anw, bo’-bo bono naisler lai anw.

¹¹ Aphuru diyari phatrarok kwbángma bachaui baksa baksano lama koró rw anw.

¹² Hamya báng rwrwkma bai baksa baksani hamjak laima kwma rwrwk anw.

¹³ Tamo khe soiwi man suknai borok bo se mwthangjaknai.

¹⁴ Hakhe Kaitorni hani o Kothoma Kaham swngchar gwnangwi bebak bororokni thani khna rwna bagwi pírjak anw; aphuru khe o mol pái anw.”

Gojob Khlainai Selengmasingcha

¹⁵ “Daniel diyari sa langmani a Gojob Khlainai Selengmasingcha norok nok kwtharno bachajak nuk anw.” (Omo tamo hwnmani abo porinaisa saui man thung).

¹⁶ “Aphuru Judia-o tongnairok hathái bwkhak khárwi tháng thung.

¹⁷ Nuka tongnai borok bo bini manwirok nauina hwnwi noksingo ta hap si thung.

¹⁸ Kheto tongnai borok bo dulai nauina hwnwi kiphilwi ta phai si thung.

¹⁹ A salo sakderiya bai sagwnangmarokni bwswk se birman wng ja no!

²⁰ Masing phuru eba Sabat salo khárna nang ya tẃi khe norok Kaitorno suri san di.

²¹ Tamni hwn khe swngchar snam phuruni simi tabuk jora abo hai digi-sigi uáisa phano wng ya kho, abo hai tei w bo wng glak kha.

²² Tamo khe Kaitor a salrokno bara rw kha, wng ya khe khoroksa phano kwthang tong glak kha mun. Hai phano bini chongjak bororokni bagwi Kaitor a salrokno bara rwnai.

²³ “Aphuru norokno khoroksa swk ‘Iko, nahar di, oro se Masia!’ eba khe ‘Uko, aro se bo! hwnwi sa khe bini kók ta na di.

²⁴ Masia phatrarok bai diyari phatrarok bacha anw. Bórok soidom bai uanamasingcha samungrok phunuk anw, wng khe ba Kaitorni chongjak bororokno suda lama koró rw anw.

²⁵ Khna di, swkang baira’-no ang norokno o kók sa-o.

²⁶ “Hakhe tumungno bororok norokno ‘Iko, nahar di, bo u hasing panthoro se!’ hwnwi sa khe aro ta tháng di; eba khe ‘Nahar di, bo oro bisingo se!’ hwnwi sa khe a kók ta na di.

²⁷ Tamni hwn khe salkabaini sal thángbai bwkhak nokha jiliksa khe nokha philikma hai khe se Borokni Sajla phai anw.

²⁸ “Kwthwi tong thani’-no sikruk kuthum anw.

Borokni Sajla phainani kók

²⁹ “Aphuruni a digi-sigi pái kheno sal mwnak anw, tal tei chẃng glak, nokhani athukirirok klai anw, nokha gwnangwi jangrijak anw.

³⁰ Aphuru khe Borokni Sajla phaina nai tong kha hwnwi nokha-o sijak anw, aphuru swngcharni bebak bosong kap lai anw, Bórokni Sajlano nokhani chumui-o khe kwplai wngwi belai chẃngsacha khe phaima nuk anw.

³¹ Totro kotor sotonwi pung anw, hakhe bo bini suarirokno haktorni babai brwi-o rohor anw, bórok bini chongjak bororokno haktorni yaphang buchukni thum phai anw.”

Khwichang buphang bai phrwngmani

³² “Norok khwichang buphangno naisigwi srwng di. Bini bedek khrangsaui bwlái rotomwi phai phuru tangbla sampha kha hwnwi norok saui mano.

³³ Omo hai kheno norok omorok bebakno nuk phuru mol sampha kha hwnwi khá ka di, sók phai se tong kha hwnwi khá ka di.

³⁴ O kókno muitu narwk di, o molni bororok thwi bai ya sini’-no omorok bebak’-no wng anw.

³⁵ Ha bai nokha se kwma anw ba, ani kókrok kwma glak.”

A sal bu phuru phai no abo kebo saui man ya

³⁶ “A sal bai a jora bu phuru phai no abo kebo saui man ya; chuknohani suarirok buya, Sajla buya; Apha simi se abo saui mano.

³⁷ Borokni Sajla phai phuru khe Noani phuru wngma hai se wng anw.

³⁸ Twi tor ya sini wng laima hai, Noa rungtoro kasa ya sini bororok chá lai-o nung lai-o;

³⁹ hai phano twi torwi bórokno bebakno kochok rw ya sini tamo wngna naiwi tong kha abono bórok saui man ya. Borokni Sajla phai phurubo abo hai’-no wngnai.

⁴⁰ Aphuru borok khoroknwi kheto samung tang laiwi tong khe khoroksa tlangjak anw, tei khoroksa klangjak anw.

⁴¹ Bwrwi khoroknwi mai súk lai tong khe khoroksa tlangjak anw, tei khoroksa klangjak anw.

⁴² Hakhe hus khe tong di, tamni hwn khe norokni Subrai bu phuru phai no abo norok saui man ya.

⁴³ O kókno muitu narwk di, sikhok bu phuru hap phai no abo nokphang saui man khe bo sichaui tongwi nogo sikhokno hap rw glak.

⁴⁴ Hakhe aboni bagwino norok tiyar khe ma tongthai, tamni hwn khe phai glak hwnwi tong phuru’-no Borokni Sajla phai anw.”

Sabo seleng kaham

⁴⁵ “Hakhe sabo seleng kaham? Sabo khá sinai seleng sla? Bo wng kha omo tẃi: Nokphang khoroksa tei selengrokno sal brúm brúm chá rwna bagwi bini seleng khoroksano barja berwi rw kha.

⁴⁶ Nogo kiphil phuru nokphang a selengno omo hai samung khlaijak nuk phai khe a seleng hamchanai.

⁴⁷ Ang norokno sói kókno sa-o, ahai khe a nokphang a selengno bini bebak sompotini barja snam anw.

⁴⁸ Phiya bo tumungno seleng hamya wng khe bo khá bising bising ‘Ani nokphang phaina ler anw,’ hwnwi uansuknai,

⁴⁹ hakhe bo tei selengrokno bunai-toknai phiya phekplairok bai chánai nungnai.

⁵⁰ Hakhe phai glak hwnwi tongmani salono, bo saui man slap ya sini bini nokphang phainai.

⁵¹ Hakhe nokphang bono kochok nwi khe tan phainai, phatrarok bai baksa’-no bonobo ton anw. Bo aro ua hului ma kap anw.”