MATHAI 19 - Kok Borok (Re-edited) Bible (BSI)

Jisu kak laimani kók samani

¹ O Kókrokno sa bai kheno Jisu Galilini kutulwi Jordan twimani ayang naro Judia amchoi-o tháng kha.

² Borok kwbángma bini thani phai kha hakhe bo bórokno aro ham rw kha.

³ Khoroknwi khoroktham Pharisairok bini thani phaiwi bono khẃi-o kwcha rwna nai kha. “Sak muchung tẃi hikno kagwi mano hwnwi chini Kerongno sa da sa?” hwnwi bórok sẃng kha.

⁴ Jisu hai hwnwi sa kha, “Norok elembago o kókno pori ya kho diba? yaphango Snamnaisa borokno chwla bai bwrwi khe snamwi

⁵ hai hwnwi sa kha, ‘Omoni bagwino borok buma bupha bai kagwi bihik bai thansa wngnai, hakhe a kwnwi kaisa wngnai.’

⁶ Aboni bagwino bórok tei kwnwi li ya, kaisa se. Aboni bagwino Kaitor thepamano borok ta swkak thung.”

⁷ Pharisairok bono hai hwnwi sẃng kha, “Hakhe kaksen swi rw khe hikno rohorwi mano hwnwi tamo wngwi Musi hwn sla?”

⁸ Jisu hai hwnwi sa kha, “Norokno phrwngna belai tukma bagwi se Musi norokno hikno kagwi mano hwnwi sa-o. Swngchar snam phuru le omo tẃi kwrwi.

⁹ Hakhe ang norokno o kók sa-o, buitali wng ya phano hikno kagwi tei khoroksa bwrwino na khe a borok lupcha wngo.

¹⁰ Bini sagrirok bono hai hwnwi sa kha. “Tumungno bwrwi bai chwla omo hai wng lai khe káijak ya tongma se ham kuk bla.”

¹¹ Jisu hai hwnwi sa kha, “O kók jotoni bagwi ya, abono khnana hwnwi Kaitor chongmani bororokni bagwi simi se.

¹² Baksa bororok tamni bagwi káijagwi man ya aboni juda juda kók tongo; baksa achai phuruni simi gurma wngma bagwi, baksa khe mála khajakma bagwi, baksa ba Kaitorni hani bagwi káijak ya. Omo hai khe tongwi mannairok bórok o kókno khna thung.”

Chwrairokno Jisu hamjakmani

¹³ Jisu chwrairokni sago yak rwui suri san thung hwnwi baksa borok chwrairokno bini thani tubu kha. Hakhe sagrirok a bororokno ta tubu di hwnwi hwn kha.

¹⁴ Jisu hai hwnwi sa kha, “Chwrairokno ani thani rohor di, ta kasu di; omo tẃi bororokni bagwino Kaitorni ha.”

¹⁵ Bo Bórokni sago yak rwui aroni tháng kha.

Rang gwnang sikla khoroksa

¹⁶ Salsa borok khoroksa Jisuni thani phai kha. Bo hai hwnwi sẃng kha, “Hodakra, kwthang tong phlaina bagwi ang bubo tẃi samung kaham ma khlaithai klai?”

¹⁷ Jisu hai hwnwi sa kha, “Nwng tamo wngwi ano kahamni kók sẃng? Khoroksa simi se kaham. Nwng mwthangjakna muchung khe kerong dagimano rákhok di.”

¹⁸ “Bu kerong dagimano?” hwnwi bo sẃng kha. Jisu hai hwnwi sa kha, “Borok ta buthar di; buitali-buitala ta wng di, ta khok di; tatal ta sa di;

¹⁹ ma-phano sak nang ya ta wng di; nwng sakno hamjak tẃi’-no buinobo hamjak di.”

²⁰ “O kerong dagimarok ang bebak’-no rákhok bai kha. Ang tei tamo khlaithai?” hwnwi a siklasa sẃng kha.

²¹ Jisu bono hai hwnwi sa kha, “Nwng kaham wng sukna hwn khe tháng di, nini tong kwrwi bebak’-no phal baiwi a rangno kwrwirokno rw di, hakhe chuknoha-o nini rang khatijak anw. Omo khlai bai khe ani logi phai di.”

²² A siklasa abono khnaui khá thwijagwi tháng kha, bo le snamwi gwnang bla.

²³ Aphuru Jisu bini sagrirokno hai hwnwi sa kha, “Ang norokno o kók sa-o, gwnangrok Kaitorni ha-o hapnani belai kutuk wngnai.

²⁴ Ang norokno o kókbo sa-o, suchi bwlam tẃi mangingang hapna se lai anw ba, Kaitorni ha-o gwnangrok hapnani aswk lai glak.”

²⁵ O kók khnaui sagrirok belai uanajagwi “Hakhe sabo mwthangjaknai sla?” hwnwi sẃng kha.

²⁶ Jisu borokno naisigwi hai hwnwi sa kha, “O samungno borok khlai man ya; Kaitor le bebak samung’-no khlaiwi mano.”

²⁷ Pitor aphuru khe hai hwnwi sacha kha, “Nai di, chwng joto khibi baiwi nini logi phai kha. Chwng tamo mannai sla?”

²⁸ Jisu borokno hai hwnwi sa kha, “Ang norokno o kók sa-o, mol kwtalo Borokni Sajla bini chẃngsacha achukthayungo achuk phuru khe norok ani logi phainai chiknwirokbo achukthayungo achugwi Israilni bosong chiknwirokni buj thumnai.

²⁹ Ani bagwi nok huk, takhuk bukhuk, buma bupha, chwrai khonai tei kheto panthor khibinai borok bo abórokno sarani slái kwbáng mannai, mwbo mwthangjak phlainai.

³⁰ Hai phano tabukni swkangrok baksa baksa uklogo tong rwk anw, phiya tabukni uklokrok baksa swkang wng anw.”