MATHAI 16 - Kok Borok (Re-edited) Bible (BSI)

Bui Soidomni samung naina pho

¹ Khoroknwi khoroktham Pharisairok bai Sadukairok Jisuni thani phai kha. Bo Kaitor bai chongjak da abo potaliui naina bagwi bórok bono mungsa swk soidom phunuk di hwn lai kha.

² Hakhe Jisu hai hwnwi sa kha, “Sal thángnanogo nokha mwnwima nuk khe sal ham anw hwnwi norok hwn lai-o.

³ Phiya phungo sal chaksajak nuk khe uatwi ua anw hwnwi norok hwn lai-o. Nokha naiwi sal bahai wngno hwnwi norok saui mano. Phiya o molo tamo wngno wng ya abono phunuguibo norok saui man ya.

⁴ Tabukni bororok bwswk se chengta gwja! Kaitorno bwswk se kiri ya gwja! Norok ano soidom phunuk di hwn kho. I’nhi, diyari Jonani a soidomno karwi tei mungsa soidom phano norok phunukjak glak.” Hakhe bo bórok bai kagwi tháng kha.

Pharisai bai Sadukairokni chuanni kók

⁵ Sagrirok twibom ayang naro lái tháng phuru ruti tlangna pokjak kha.

⁶ Jisu aphuru bórokno hai hwnwi sa kha, “Sichaui tong di, norok Pharisairokni chuan bai tei Sadukairokni chuan bai hus khe tong di.”

⁷ “Chwng ruti tubu yani bagwi se bo o kók sa-o,” hwnwi bórok sa lai kha.

⁸ Bórok sa laimano Jisu saui manẃi bórokno hai hwnwi sẃng kha, “Ruti kwrwi hwnwi norok abo tamo sa lai sla? Norokni poito bwswk se kisa!

⁹ Norok tabuk suda romwi man ya kho diba? Borok basaini bagwi ang a ruti lepba swkakmani abono norok muitu man ya diba? Norok khochamani ura khung bwswk pung kha?

¹⁰ Borok khorok brwisaini bagwi a ruti lepsinini kók la? Norok khochamani ura khung bwswk pung kha?

¹¹ Ang norokno samani abo rutini kók ya hwnwi norok tamo wngwi romwi man ya wng? Norok Pharisairokni chuan bai tei Sadukairokni chuan bai hus khe tong di.”

¹² Aphuru khe sagrirok abo ruti-o rwjaknai chuanni kók ya, tamo khe Pharisairok tei Sadukairokni phrwngmani bai hus khe tong di hwnma se hwnwi romwi man kha.

Jisuno Masia hwnwi Pitor gosimani

¹³ Jisu Kaisaria Philipi taun ganani amchoi-o tháng kha. Aro bo bini sagrirokno hai hwnwi sẃng kha, “Borokni Sajlano bororok sabo tamo hwnwi sa lai?”

¹⁴ “Baksa baptisma rwnai Johon hwno, baksa ba Elia hwno, baksa ba Jirimia eba diyarirokni bere khoroksa swk wngna ta,” hwnwi bórok sa kha.

¹⁵ “Norok le tamo hwn? Ang sabo?” hwnwi bo sẃng kha.

¹⁶ “Nwng Masia, Kaitor kwthangni Sajla,” hwnwi Simon Pitor sa kha.

¹⁷ Jisu hai hwnwi sa kha, “Johonni bwsla Simon, nwng hamchajak! Tamni hwn ba o kók nwng bahan-bwthẃi bai saui man ya, omo chuknohani ani Apha se nono saui man rw-o.

¹⁸ Hakhe Pitor ang nono o kókbo sa-o, ang o holongni saka-o ani motha tisa anw, butharnairokni phan suda abono mechenwi man glak.

¹⁹ Ang nono Kaitorni hani suranirok rwnai, hakhe nwng o swngcharo kwcha rwmani abo chuknoha-obo kwcha rwjaknai; o swngcharo nwng khengmani abo chuknoha-obo khengjaknai.”

²⁰ Aphuru Jisu bini sagrirokno “Ano Masia hwnwi buino ta sa di,” hwnwi ragdama khe sa kha.

Bo butharjagwi se man thwinai hwnwi Jisu samani

²¹ Aphuruni simi Jisu bini sagrirokno srai-srai khe hai hwnwi sa kha, “Ang Jerusalemo ma thángnai, hakhe okra chakrarok, ochai okrarok tei Kerong phrwngnairok bai panjalwi sátokjakna nangnai. Ang butharjaknai, hai phano salthamni salo mwthangwi tisajaknai.”

²² Pitor bono simi tlangwi hai hwnwi hwn kha, “O Subrai, Kaitor omo tẃi ta khlai thung! Nini omo tẃi ta wng thung!”

²³ Jisu uphilwi Pitorno hai hwnwi hwn kha, “Tháng di Soitan! Nwng ani lama kebengnai se; tamni hwn ba nwng uansukmarok abo borokni uansukma se, Kaitorni uansukma ya.”

²⁴ Hakhe Jisu bini sagrirokno hai hwnwi sa kha, “Ani logi phaina khe a borok bini sakni kók ta uansuk thung, bini krus balwi ani logi phai thung.

²⁵ Kwthang tongna muchungnai borok bo thwinai; phiya ani bagwi thwinai borok bo thangnai.

²⁶ Thwi tháng kha hwn khe bebak swngcharno manẃi ba a borok tamo manma klai? Thwiwi tháng khe borok tei tamo khe thang phinai?

²⁷ Borokni Sajla Buphani chẃngsacha bai chẃngsacha wngwi bini suarirok bai phaina nai tongo, bo phai khe bororok samung khlai tẃino bo joto borokno yagul sunai.

²⁸ O kókno muitu narwk di, oro baksa tongo Borokni Sajlano bugra wngwi phaima nuk ya sak thwi glak.”