MATHAI 15 - Kok Borok (Re-edited) Bible (BSI)

Chuchusongni sakni kerong

¹ Aphuru khoroknwi khoroktham Pharisairok tei Kerong phrwngnairok Jerusalemni phaiwi Jisuno hai hwnwi sẃng phai kha.

² “Nini sagrirok tamo wngwi chini chuchusong rwui klangmani kerongno swbai sla? Bórok kaham khe yak sú yaui’-no mai chá-o.”

³ Jisu hai hwnwi sa kha, “Norok tamo wngwi Kaitorni dagima rákhok yaui norokni sak banokmani kerongno tẃi tong sla?

⁴ Kaitor hai hwnwi sa-o, ‘Nwng ma-phano sak nang ya ta wng di,’ phiya ‘Khoroksa swk buma buphano hamya sa khe bo bu se butharjakna klainai.

⁵ Aile norok hai hwnwi sa-o, buma eba buphano chubanani khoroksani mungsa swk tongwi suda se, phiya “Abo Kaitorni thani yapharjak,” hwnwi sa khe

⁶ bo buphano sak nang ya phano wngo. Omo tẃi kheno norok Kaitorni kókno samung nangjak yaui sak banokmani kerongno rákhogwi tongo.

⁷ Norok bwswk phatra gwja! Norokni bagwi Jisaia diyari hai hwnwi sa langmani abo bwswk kók sói!

⁸ “ ‘O bororok búkhúk bai ano lobo, phiya bwkha le bórokni ang bai chaljak se hwnwi Kaitor sa-o.

⁹ Bórok ano surina samung nangjak ya, tamni hwn khe borok banokmani kerongno se bórok Kaitorni kerong hwnwi phrwngo.’ ”

Tamo tamo borokno hamya khlai?

¹⁰ Aphuru Jisu lukuno bini thani ringwi hai hwnwi sa kha, “O kókno khwbo khna di, sibo si di.

¹¹ Búkhúgo hapnai abo tẃi manwi borokno hamya khlai man ya, búkhúk tẃi ongkhornai se bono hamya khlai-o.”

¹² Hakhe bini sagrirok bini thani phaiwi hai hwnwi sa kha, “Nwng samani o kók bai Pharisairok khá nangjakmani nwng saui da man?”

¹³ Jisu hai hwnwi sa kha, “Chuknohani Apha káimani buphang ya khe jotono phuichajak bainai.

¹⁴ Pharisairokni bagwi ta uana di. Bórok wng kha mokol nuk ya bokhorok; mokol nuk ya mokol nuk yano yak tolwi tẃi khe khoroknwi-nwi’-no hakhoro pulumsa klainai.”

¹⁵ “O rwngthomano swbai sa di,” hwnwi Pitor sacha kha.

¹⁶ Jisu bórokno hai hwnwi sa kha, “Norok tabuk suda buini slái butua gwja kho!

¹⁷ Norok romwi man ya kho diba? Mungsa swk phano borokni búkhúgo hap khe abo bohok bisingo thángo, hakhe bwsakni ongkhorwi thángo.

¹⁸ Phiya búkhúk tẃi ongkhorwi phaimarok abórok bwkha bisingni phai-o; abo tẃirok se borokno hamya khlai-o.

¹⁹ Tamni hwn ba borokni bwkha bisingni se uansukma hamyarok ongkhorwi phai-o, abo se borokno borok buthar rw-o, buitali-buitala wng rw-o, uaija rw-o, khok rw-o, kók tatal sa rw-o, buini mungwi kók hamya sa rw-o.

²⁰ Omo tẃirok se borokno hamya khlai-o, tamo khe yak sú yaui mai chámani abo borokno hamya khlai ya.”

Bwrwima khoroksa poito khlaimani kók

²¹ Jisu aroni kutulwi Tur bai Sidon taun ganani amchoi-o tháng kha.

²² A amchoi-o tongnai Kananjwk khoroksa bini thani phaiwi hai hwnwi sa kha, “O hodasa, Daudni Sajla! Ano khairok ja di! Angsajwk mwtai hamya kolobjagwi betlai wngwi tong kha.”

²³ Hai phano Jisu bono kók tháisa phano sa li ya. Bini sagrirok bini thani phaiwi hai hwnwi koiwi sa phai kha, “Bono rohor si di! Bo chwngno rwktharwi keche-keche khlai-o!”

²⁴ Aphuru Jisu hai hwnwi sa kha, “Mera kwmajak hai Israilrokni thani simi se ang rohorjago.”

²⁵ Hai kheno a bwrwi bini yakungo klaiwi “Hodasa, ano chuba ja di,” hwnwi koiwi kha.

²⁶ Jisu hai hwnwi sa kha, “Bwsarokni chámungno naui sẃirokno lukhlai rwma cha ya.”

²⁷ “Abo sói’-no, hai phano nokphangni hanta klaimano le sẃirokbo ma chá bla,” hwnwi a bwrwi sa kha.

²⁸ Hakhe Jisu bono hai hwnwi sa kha, “Bwrwima, nwng belai poito gwnang, nwng sanma hai’-no khlaijak anw.” Aphuruno bini bwsajwk ham kha.

Jisu borok kwbángmano ham rwmani

²⁹ Jisu aroni kutulwi Galili twibom gana tẃi khe tháng kha. Bo hathái-o kasaui achugwi kha.

³⁰ Borok kwbángma bini thani phai kha, bórok khora, phula, kompa boba, hai khe teibo kwbángma hamyarokno tubu-ui bini yakung yaphango rw phai bai kha, hakhe bo bebakno’-no ham rw bai kha.

³¹ Bororok bobano kók sama, kompano malma, khorano himma, phulano nukma nugwi uanajak bai kha, hakhe bórok Israilni Kaitorno lob lai kha.

Borok khorok brwisaino Jisu chá rwmani

³² Jisu bini sagrirokno bini thani ringwi hai hwnwi sa kha, “O bororokno ang khairok laha, tamni hwn khe bórok nokha saltham ang bai máng tong kha, hakhe tabuk chánani mungsabo kwrwi. Ang bórokno chá rw yaui nogo rohorna muchung ya, tamni hwn khe bórok lama-o lengna phano tongo.”

³³ Bini sagrirok bono hai hwnwi sẃng kha, “O hasing panthoro o bororokno chá rwna bagwi chwng buro aswk chámung mannai?”

³⁴ “Norokni thani lep bwswk ruti tong?” hwnwi Jisu sẃng kha. “Ruti lepsni tei á kisicha tongo,” hwnwi bórok sa kha.

³⁵ Jisu lukuno ha-o achuk di hwnwi hwn kha.

³⁶ Bo ruti lepsni bai á naui Kaitorno hambai rw kha, hakhe abono swkagwi bini sagrirokni yago rw kha, hakhe sagrirok lukuno rw kha.

³⁷ Bórok bebak’-no ok pungwi chá kha; bára tong rwkmano sagrirok khochamani ura khungsni pung kha.

³⁸ Chánairok bwrwirok bai chwrairokno karwi chwlarok simi’-no brwisai wng kha.

³⁹ Hakhe Jisu bororokno rohor baiwi rungo kasaui Magadan amchoi-o tháng kha.