MATHAI 13 - Kok Borok (Re-edited) Bible (BSI)

Maichlwi sarmani rwngthoma

¹ A salono Jisu a nokni ongkhorwi twibom rukungo thángwi phrwngna hwnwi achugwi kha.

² Bini thani aswk borok kwbángma kuthum phaima bai bo rung khungsa-o kasaui achugwi kha, yang khe aswk borok twi rukungo bacha laijak.

³ Hakhe bo bórokno rwngthoma bai kók kwbángma sa kha. “Borok khoroksa maichlwi sarna hwnwi tháng kha.

⁴ Sar phuru baksa maichlwi lama-o klai kha, hakhe toksa-toktẃirok phaiwi cháui khibi kha.

⁵ Baksa ba ha kwrwi thani holongsiki-o klai kha. Ha báng thayani bai maichlwi dakti’-no bumuk per kha.

⁶ Sal kasaui phai phuru khe a bumuk kwlwi khampraui tháng kha, hakhe yarwng kwbáng sukhlai man yani bai dakti’-no hoichaui tháng kha.

⁷ Baksa ba busulwngo klai kha, hakhe busurok torsaui a bumukno kobolwi khibi kha.

⁸ Baksa ba ha kahamo klai kha, bwtháibo thái kha; baksa sara, baksa khe dokchi, baksa khe kwthamchi thái kha.”

⁹ Jisu hai hwnwi saui kók mwthak kha, “Khunju tong khe ba o kókno khna di.”

Tamni bagwi rwngthoma sajak kha

¹⁰ Hakhe sagrirok Jisuni thani phaiwi hai hwnwi sẃng kha, “Bororokno kók sa phuru nwng tamo wngwi rwngthoma bai sa sla?”

¹¹ Jisu hai hwnwi sa kha, “Kaitorni hani bisingni kókno norokno saui man rw kha, bórokno khe saui man rw li ya.

¹² Tamni hwn khe khoroksa swkni kisa tong khe bono teibo rwjak anw, hakhe bo teibo kwbángma man anw, phiya ba kwrwini khe kisa tongma suda bini yakni najak anw.

¹³ Bórok naisik anw, hai phano nuk glak, bórok khna anw, hai phano khna glak eba romwi man glak; omo tẃini bagwi se ang bórokni thani rwngthoma bai kók sa-o.

¹⁴ Aboni bagwino Jisaia diyari hai hwnwi sa langmani abo bórokni thani nang phai kha: “ ‘Norok khunju kaichomwi khna anw, hai phano romwi man glak; norok mokol kaichomwi naisik anw, hai phano nuk glak;

¹⁵ tamni hwn khe o bororok khá si ya, bórok khunjubo muthubo, mokolbo kholobo; wng ya khe mokol da nuk lang no, khunju da khna lang no, bwkha da si lang no, hakhe bórok ani bwkhak khá kiphil lang no, phiya ang da bórokno ham rw lang no hwnwi Kaitor sa-o.’

¹⁶ “Norok khe bwswk talikha kaham gwja! Norokni mokol nuk kha, norokni khunju khna kha.

¹⁷ O kókno muitu narwk di, norok nukmano aswk diyarirok bai Kaitorni aswk bororok naina muchungwi suda nuk ya, norok khnamano khnana muchungwi suda khna ya.”

Maichlwi sarmani rwngthomano Jisu swbai samani

¹⁸ “Hakhe maichlwi sarmani rwngthoma-o tamo sajak kha abo khna di.

¹⁹ Kaitorni hani kók khnaui romwi man yarok bórokno wng kha lama klainai maichlwi hai. Bórokni bisingo sarjakmani abo Soitan segwi tlang phai-o.

²⁰ Kók khna khe’-no khápang srangjagwi khá-o chopnairok bórokno wng kha holongsiki-o klainai maichlwi hai.

²¹ Tamo khe abo bórokni bwkha-o hap súk yani bai bórok kwbáng dwgwi tongwi man ya. Aboni bagwino a kókni bagwi tekto man phuru khe eba sátokjak phuru khe bórok phatsa uslu-o.

²² Baksa ba a kókno khna-o, tamo khe bórok swngcharni kók uansugo, rang-ríno mokol chẃngo, abo bai’-no a kók koboljagwi thángo, hakhe bwthái thái ya wngo. Omo tẃi bororok’-no busulwngo klainai maichlwi hai.

²³ Kók khnaui abono romwi mannairok bórok wng kha ha kahamo klainai maichlwi hai. Bórok bwtháibo thái-o, baksa sara, baksa khe dokchi, baksa khe kwthamchi thái-o.”

Jabrani rwngthoma

²⁴ Jisu bórokno tei tháisa rwngthoma sa kha, “Kaitorni ha khe omo hai: Borok khoroksa bini kheto maichlwi kaham sar kha.

²⁵ Horsa khe jotono muktrwi thángwi tongma jora kena ari khoroksa phaiwi mai bisingo jabra bwchlwi sarwi klangwi tháng kha.

²⁶ Buphang torwi bwthái thái khe jabrabo nukjak kha.

²⁷ Hakhe a borokni munirok bini thani phaiwi hai hwnwi sa phai kha, ‘Nokphangsa, nwng ba maichlwi kahamno sarma se bla! Buroni o jabra phai lang?’

²⁸ ‘Kena ari khoroksa swk omono khlai khna,’ hwnwi bo sa kha. ‘Nwng chwngno a jabrano phui di da hwn?’ hwnwi bórok sẃng kha.

²⁹ Bo hai hwnwi sa kha, ‘I’nhi, ta phui di, jabra bai baksa maibo phuichajakna tongo.

³⁰ Mai rana wng ya sak mungnwi nwi’-no tor gra thung. Aphuru ang ranairokno hai hwnwi sanai, jabrano swkang phuicha di, hóro sókna bagwi bochop khe kha di; hakhe maino thumwi ani mayam nogo da di.’ ”

Horua bwchlwini rwngthoma

³¹ Jisu bórokno tei tháisa rwngthoma sa kha, “Kaitorni ha wng kha borok khoroksa bari-o káimani horua bwchlwi hai.

³² Abo jotoni slái bwchlwi kotoi, phiya a buphang tor phuru khe aswk samphangrokni slái bo se tor kugo. Abo buphang kotor wngma bai toksa-toktẃirok bedego bothop thum phai bai-o.”

Chuanni rwngthoma

³³ Jisu bórokno tei tháisa rwngthoma sa kha, “Kaitorni ha chuan hai se. Bwrwi khoroksa abono mai balingsa-o sablu-ui bulma le bebak mai se lomwi tháng kha.”

Jisu tamo wngwi rwngthoma bai kók samani

³⁴ Jisu lukurokno rwngthoma bai se omorok bebak’-no sa-o, rwngthoma baiyasa tháisa phano sa ya.

³⁵ Diyari hai hwnwi sa langmani abo nang phaina bagwi omo wngo, “Ang bórokno rwngthoma bai se kók sanai, swngchar snam phuruni simi khogwi tonjak kókrokno ang bórokno sanai.”

Jisu jabrani rwngthomano swbai samani

³⁶ Aphuru Jisu lukurok bai kagwi noksingo hap kha. Bini sagrirok bini thani phaiwi “Khetoni jabrani rwngthomano chwngno sa di,” hwnwi sa kha.

³⁷ Jisu hai hwnwi sa kha, “Maichlwi kaham sarnai khe Borokni Sajla se;

³⁸ swngchar wng kha kheto; Kaitorni hani bororok wng kha maichlwi kaham; Soitanni bororok wng kha jabra;

³⁹ Soitan wng kha jabra sarnai a kena ari; rana jora wng kha mol pái phuru; ranairok wng kha suarirok.

⁴⁰ Jabrano thumwi hóro sókma hai’-no mol pái phuru abo hai wng anw.

⁴¹ Borokni Sajla bini suarirokno rohor anw, bórok Kaitorni hani bisingni bororokno sumsogo khiklainairokno tei samung hamya khlainairokno saiwi thum anw,

⁴² hakhe hórni kundulo khiklai anw, bórok aro ua hul laiwi ma kap lai anw.

⁴³ Aphuru Kaitorni bororok bórokni Phani ha-o sal hai chẃngwi tong anw. Khunju tong khe ba o kókno khna di.”

Rang gola phobjakni rwngthoma

⁴⁴ “Kaitorni ha wng kha kheto rang gola phobjak hai se. Borok khoroksa abono achomsa nuk kha, hakhe hai’-no hai phobwi kabu kha. Bo belai khá srangwi thángwi bini je tong-kwrwi phal bai kha, hakhe kiphilwi thángwi a khetono pai kha.”

Muktani rwngthoma

⁴⁵ “Phiya Kaitorni ha wng kha mukta kaham rutugwi painai borok hai se.

⁴⁶ Bo belai mukta kaham kolsa nuk kha, hakhe thángwi bini je tong-kwrwi phal baiwi a muktano pai kha.”

Cheini rwngthoma

⁴⁷ “Phiya Kaitorni ha wng kha twibomo khiklaijak podrepot á nangjak chei hai se.

⁴⁸ Abo pung súk khe gaborrok abono tisa kha, hakhe a bak laina achuk kha; kahamrokno khe dula-o da kha, hamyarokno khe khibiui rw kha.

⁴⁹ Mol pái phuru khe omo hai wngnai, suarirok thángwi borok kahamrokni bisingni hamyarokno saiwi thum anw,

⁵⁰ hakhe hórni kundulo khiklai anw, bórok aro ua hul laiwi ma kap lai anw.”

Kók kwtal bai kók kwcham

⁵¹ “Norok omorokno rom súgwi da man kha?” hwnwi Jisu sẃng kha. “I’n, man kha bugra,” hwnwi bórok sa kha.

⁵² Hakhe bo hai hwnwi sa kha, “Kók khe hai, Kaitorni hani sagri wngnai joto Kerong phrwngnai bo manwi kwtal bai kwchamno gulani tikhlainai nokphang hai se.”

Nasaretsong Jisuno gwnda khlai ya wngmani

⁵³ O rwngthomarok sa bai kheno Jisu aroni kutul kha,

⁵⁴ hakhe bini ha-o tháng kha. Bo aroni thumnogo phrwng kha, hakhe bini kók khnanairok uanajagwi hai hwnwi sa lai kha, “Omo tẃi elem bo buroni man? Bo ha-o nuk ya samung khlaimarok abo tamo sla?

⁵⁵ Bo a mistrini bwsla ya diba? Mariam bini buma ya diba? Jakob, Josep, Simon tei Juda bini buphayungsong ya diba?

⁵⁶ Bini bahanokjwksong bebak’-no chwng bai baksa oro tong ya diba? Omorokno bo buroni man kha ba?”

⁵⁷ Hakhe bórok bono gwnda khlai lai li ya. Jisu bórokno hai hwnwi sa kha, “Diyari joto jaga-o bórijago, bini ha bai bini nogo simi se bórijak ya.”

⁵⁸ Bórok poito khlai yani bai bo aro ha-o nuk ya samung kwbáng khlai li ya.