MATHAI 11 - Kok Borok (Re-edited) Bible (BSI)

Baptisma rwnai Johonni sagrirok Jisu bai malaimani

¹ Jisu bini sagri chiknwirokno hai hwnwi phrwngwi pái khe aroni kutulwi thángwi gana-ginini taunrogo phwbo phrwngwi kha, píbo pírwi kha.

² Baptisma rwnai Johon alongo tongwi Khristoni samungrokni kók khna khe bini sagri khoroknwi khorokthamno bini thani rohor kha.

³ Bórok Jisuno hai hwnwi sẃng kha, “Chwngno sa di, borok khoroksa phainai hwnwi Johon samani nwng da a borok? Chwng ba tei khoroksa swkno da naisingwi tongnai?”

⁴ Jisu hai hwnwi sa kha, “Norok khnamano norok nukmano Johonno saui di:

⁵ phula nuk kha, khora him kha biyadi ham kha, nathong khna kha, kwthwi mwthangjak kha, phiya kwrwirokni thani Kothoma Kaham pírjak kha.

⁶ Ani bagwi khá udru mudru wng ya borok bono hamchajak!”

⁷ Johonni sagrirok kiphilwi tháng phuru Jisu lukurokno Johonni kók hai hwnwi sa kha, “Norok hasing panthoro Johonni thani tháng phuru tamo naina muchungwi tháng? Nokbar bai narjak nolphangno da naina tháng?

⁸ Hakhe tamo naina tháng sla? Rí jilik jalak kanjakno da naina tháng? Abo tẃi kannai chumnairok bórok dolan-paki-o se tongo!

⁹ Sa di, tamo naina tháng sla? Diyarino da? Au, ang norokno o kók sa-o, diyarini slái phano teibo kotorno norok nuk bu kha.

¹⁰ ‘Iko, omono ang rohormani a borok hwnwi Kaitor sa-o; nini lama hokna bagwi ang bono nini slái swkang rohor anw,’ hwnwi Elembago swijak tongmani abono Johon.

¹¹ O kókno muitu narwk di, o swngcharo phainairokni bisingo Johonni slái kotor kwrwi, hai phano se Kaitorni hani jotoni borok kusu phano se bini slái kotor.

¹² Johon bini kók pír phuruni simi tabukbo Kaitorni ha mar khe buprajagwi tongo, bupranairokbo abono sekna nai tongo.

¹³ Johonni mol jora bebak diyarirok tei Musini Kerong Kaitorni hani kók sa kha;

¹⁴ norok bórok samano khna khe Johonno a phainai hwnmani Elia hwnwi saui man anw.

¹⁵ Khunju tong khe ba o kókno khna di.

¹⁶ “Hakhe tabukni bororokno ang tamo bai sunai? Bórok bajar kwcharo achugwi hai hwnwi sa lai hornai chwrairok hai.

¹⁷ ‘Norokni thani chwng kái lai pandani sumui tam kha, norok le mw se mwsa ya! Chwng kwthwini kapmung kap kha, norok le ka se kap ya!’

¹⁸ Johon bo maibo chá ya, angur bwtwibo nung ya, hakhe ‘Bo mwtai hamya kolobjak,’ hwnwi jotono hwn kha.

¹⁹ Phiya Borokni Sajla bo chábo chá-o, nubo nungo, hakhe jotono ‘Iko, nahar di u borokno! Bo cháphlak-nungphlak, teks romnairok bai basijakrokni bayap!’ hwnwi sa lai ti kha. Hai phano samung bai se Kaitorni elem sói khe sijago.”

Poito Kwrwi taunrok

²⁰ Jisu ha-o nuk ya samung khlai kukmani taunrokni bororok sumsok yakar ya kho hwnwi bo a taunrokno hwn kha.

²¹ “O Khorasin, nwng bwswk se hamya sitra no! O Betsaida, nwngbo bwswk se hamya sitra no! Norokni bisingo ha-o nuk ya samung khlaijakma hai Tur bai Sidono khlaijakma tlai aroni bororok sumsok yakar kha hwnwi phunukna bagwi bú masíngo’-no pudri kanwi sago thapla phulwi tong kha mun.

²² Hakhe o kókno muitu narwk di, Jerani Salo norokni slái Tur bai Sidonni bororokno Kaitor maya chá kuk anw.

²³ Nwng la Kapharnaum! Nwng da chuknoha swk chukna naimani! Nwng morke-o khiklaijak anw! Nini aro ha-o nuk ya samungrok khlaijakma hai Sodomo khlaijakma te tabukbo abo tong kha mun.

²⁴ Hakhe o kókno muitu narwk di, Jerani Salo nini slái Sodomno Kaitor maya chá kuk anw,”

Ani thani lengla phai di

²⁵ Aphuru Jisu hai hwnwi sa kha, “O chuknoha bai swngcharni bugra Apha, ang nono hambai rw-o, tamni hwn khe nwng elem gwnang bai sinairokno khogwi tonmano siyarokno si rw kha.

²⁶ Au, Apha, nwng omono kaham hwnwi khá chongmani.

²⁷ “Apha ani yago bebak’-no rw bai kha. Aphano karwi Sajlano sininai kwrwi; phiya Sajla bai Sajla sini rwna muchungma borokno karwi Aphano sininai kwrwi.

²⁸ “Poja hilik tẃiwi lengjak bebak bororok ani thani phai di, ang norokno lengla rw anw.

²⁹ Norok ani jual tisaui bal di, ani thani srwng di, tamni hwn khe ang borok kwbo kwchang, kobo koinene hakhe norok lenglaui man anw.

³⁰ Ang norokno jual rwna hwnmani abo heleng se; ang norokno poja bokna hwnmani abo’-bo heleng se.”