MATHAI 10 - Kok Borok (Re-edited) Bible (BSI)

Jisuni chonghor chiknwirok

¹ Jisu bini sagri chiknwirokno kwrẃngsa khe ringwi mwtai hamyarok rwkhlainani bai bebak bemuk gwnang hamyarokno ham rwnani phan rw kha.

² Omorok wng kha a sagri chiknwirokni bumung: swkang Simon (bono Pitor hwno) tei bini takhuk Andria; Jakob bai bini takhuk Johon, bórok wng kha Sebedaini bwsarok;

³ Philip tei Bartholomai, Thoma tei teks romnai Mathai; Alphaini bwsla Jakob tei Thadai;

⁴ Kanansa Simon, hwn khe Jisuno rom rwnai Judas Iskariot.

Chonghor chiknwirokno pírna rohormani

⁵ Jisu o chiknwirokno hai hwnwi saui rohor kha, “Buini bororokni ha-o tei Samariarokni taun khungsa-o phano ta tháng di,

⁶ mera kwmajak hai Israilrokni thani se tháng di.

⁷ ‘Kaitorni ha sampha kha!’ hwnwi thángwi pírwi di.

⁸ Hamyano ham rw di, kwthwino mwthangwi di, biyadi chájakno ham rw di, mwtai hamyano rwkhlai di. Norok ahai’-no manmani, ahai’-no rw di.

⁹ Nini kholjango mungsa phano ta tẃi di, rangchak buya, rukphai buya, tamani rang buya;

¹⁰ lamani bagwi bogol ta tẃi di, kamchlwi kangsani bára ta tẃi di, yaklabo ta tẃi di, raidangbo ta tẃi di. Samung tangnaisa bini chámung manthai klai-o.

¹¹ “Norok taun khungsa swgo kami khungsa swgo sók phai khe aro habwi norokno nogo kasa rwna muchungnai abo tẃi borokno naituk di, hakhe aroni kutul ya sak a borok bai tong di.

¹² Norok noksingo ma hap khe ‘Khá kwchang di,’ hwnwi hwn di.

¹³ A nokni bororok norokno yachak sok khe norok ‘Khá kwchang di,’ hwnmani a kók nang thung. Phiya bórok yachak sok ya khe a kók ta nang thung.

¹⁴ Phiya noksa swk phano taun khungsa swk phano norokno nogobo kasa rw ya khe, norokni kókbo khna ya khe, hakhe yakungni hadlwi bupraui klangwi aroni kutulwi tháng di.

¹⁵ O kókno muitu narwk di, Jerani Salo a taunni bororokni slái Sodom bai Gomorani bororokno Kaitor maya chá kuk anw.

Sátokjaknani kók

¹⁶ “Khna di, ang norokno geguma khola-o merano rohor tẃi se rohoro. Norok chibuk hai hus gwnang wng di, pharuk hai kwchang kwchang wng di.

¹⁷ Hus khe tong di, bororok norokno khaui kuto tlang anw, thumnokrogo norokno swprak anw.

¹⁸ Gobornorrok bai bugrarok tei buini bororokno Kothoma Kaham sana bagwi norok gobornorrok bai bugrarokni bwskango ani bagwi buj thumna tubujak anw.

¹⁹ Norok buj thumjak phuru tamono sanai bahai khe sanai abono ta uana di; aphuru norok tamo sanai abo norokno saui rwjak anw.

²⁰ Tamni hwn khe norok samani kók abo norok sa glak; abo norokni Phani Phola se norokni khúk tẃi sanai.

²¹ “Takhuk takhukno butharna bagwi rom rwui rohor anw, buphabo hai’-no bwsano khlai anw; bwsa-bẃtẃirokbo buma buphani kena ari wngwi bórokno butharna rohor anw.

²² Ani bagwi bebak borok norokno naisler anw, tamo khe soiwi man suknai borok bo se mwthangjaknai.

²³ Bórok taun khungsa swgo norokno sátok khe tei khungsa-o khárwi tháng di. Ang norokno o kók sa-o, Israilni bebak tauno norok samung khlai bai ya sini’-no Borokni Sajla phainai.

²⁴ “Phrwngnaini slái srwngnai tor ya; selengbo nokphangni slái tor ya.

²⁵ Aboni bagwino srwngnaibo phrwngnai bai baksa wng kheno, selengbo nokphang bai baksa wng kheno khá kochom thai klai-o. Nokphang Belsebul hwnjak khe bini nokni bororokbo bwswk se hamya hwnjak no!”

Sabono kirithai klai?

²⁶ “Hakhe bororokno ta kiri di, kholobwi tonjak phiyokjak anw, kotonwi tonjak sijak anw.

²⁷ Ang norokno mwnago samani abo pohoro sa phi di, norok tepsa khe khnamani abo kami kami sa di.

²⁸ Mangno simi butharwi mannairokno ta kiri di, bórok pholano butharwi man ya. Kaitorno se kiri di, bo le mang bai phola-o mungnwino’-no morke-o sokomorwi mano.

²⁹ Norok lepsa bai’-no chwrwi maknwi paiwi mano; hai phano norokni Pha muchungjak ya khe omo tẃirok suda masa phano ha-o klai ya.

³⁰ Norokni khe bokhorokni bebak bwkhnai suda se lekhajak.

³¹ Abo bai’-no ta kiri di; chwrwi kwbángmani slái norok tor kugo.”

Luku bwskango Khristono gosi khe

³² “Luku bwskango ano gosi khe angbo chuknohani Aphani bwskango a borokno gosinai.

³³ Phiya luku bwskango ano gosi ya khe angbo chuknohani Aphani bwskango a borokno gosi glak.”

Ang kwtha rwnai ya, uálai rwnai se

³⁴ “Swngcharni bororokno kwtha rwna hwnwi ang phai-o hwnwi khá ta ka di. I’nhi, ang kwtha rwna hwnwi phai ya, seng rw phaina hwnwi se phai-o.

³⁵ Ang bupha bai bwsano, buma bai bwsajwkno, kwrajwk bai hamjwkno uálai rwnani bagwi se phai-o;

³⁶ nokni borok’-no nokni bagwi kena ari wngnai.

³⁷ “Ano hamjakmani slái buma buphano hamjak kuknai borok bo ani borok wngna chúk ya; phiya ano hamjakmani slái bwsa-bẃtẃino hamjak kuknai borok bo’-bo ani borok wngna chúk ya.

³⁸ Sakni krus tẃiwi ani logi phai ya khe a borok ani borok wngna chúk ya.

³⁹ Kwthang tongna muchungnai borok bo thwinai; ani bagwi thwinai borok bo kwthang tongnai.”

Sokatni kók

⁴⁰ “Norokno yachaknai borok bo anobo yachago; phiya ano yachaknai borok bo ano rohornainobo yachago.

⁴¹ Kaitorni diyarino diyari hwnwi yachaknai borok bo diyari bai baksa sokat mannai; borok kahamno kaham hwnwi yachaknai borok bo a borok bai baksa sokat mannai.

⁴² O kókno muitu narwk di, ani bororokni bere jotoni slái kusuno phano ani borok hwnwi twi kwchang khopsa khannai borok bo bini sokat ma se mannai.”