MARK 8 - Kok Borok (Re-edited) Bible (BSI)

Borok brwisaino Jisu chá rwmani

¹ Aphuru haino hai borok kwbángma kuthum phai kha. Bórokni mungsa phano chánani kwrwi, hakhe Jisu sagrirokno bini thani ringwi hai hwnwi sa kha,

² “O bororokno ang kháirok laha, tamni hwn khe bórok nokha saltham ang bai máng, hakhe tabuk chánani mungsabo kwrwi.

³ Ang bórokno chá rw yaui nogo rohor khe lama-o bórok lengjak anw, tamni hwn khe baksa hakchalni phainairokbo tongo.”

⁴ Bini sagrirok bono hai hwnwi sẃng kha, “O hasing panthoro aswk bororokno sabo biyangni aswk chámung rutugwi chá rwui mannai?”

⁵ Jisu bórokno hai hwnwi sẃng kha, “Norokni thani lep bwswk ruti tong?” “Ruti lepsni tongo,” hwnwi bórok sa kha.

⁶ Bo lukuno ha-o achuk di hwnwi hwn kha. Hakhe bo a ruti lepsnino naui Kaitorno hambai rw kha, abono swkagwi lukuno banta khe rw di hwnwi bini sagrirokni yago rw kha; hakhe sagrirok abono lukuno rw kha.

⁷ Bórokni thani á bwsa bwsabo kisa tongo. Jisu aboni bagwi hambai rwui bororokno abonobo banta khe rw di hwnwi sagrirokno sa kha.

⁸ Jotono ok pungwi chá kha; aro khorok brwisai swk borok wng anw.

⁹ Hakhe bára tong rwkmano sagrirok khochamani ura khungsni pung kha. Ulo Jisu a bororokno rohor kha.

¹⁰ Hai kheno bo sagrirok bai rungo kasaui Dalmanutha amchoi-o tháng kha.

Soidomni samung naina hwnwi Pharisairok rommani

¹¹ Baksa Pharisairok phaiwi Jisu bai tokra rw lai kha. Bo Kaitor bai chongjak da abo potaliui naina bagwi bórok bono mungsa swk soidom phunuk di hwn lai kha.

¹² Jisu hama kolok rohorwi hai hwnwi sa kha, “Tabukni bororok tamo wngwi soidomni samung naina hwn? I’nhi, ang norokno sa-o, o bororokno amo hai soidom mungsa phano phunukjak glak.”

¹³ Aswk hwnwi bo bórokno yakarwi klang kha, hakhe rungo kasaui twibom ayang naro lam rw kha.

Jisu chuanni kók samani

¹⁴ Sagrirok ruti bára tubuna pokjak kha, hakhe rungo bórokni thani lepsa susuk se tongo.

¹⁵ Jisu bórokno hai hwnwi hus khe rw kha, “Sichaui tong di, norok Pharisairokni chuan bai tei Herodni chuan bai hus khe tong di.”

¹⁶ Bórok kiching bórok hai hwnwi sa lai kha, “Chini thani ruti kwrwini bagwi se bo o kókno sa-o.”

¹⁷ Bórok sa laimano saui manẃi Jisu bórokno hai hwnwi sẃng kha, “Ruti kwrwi hwnwi norok abo tamo sa lai sla? Tabuk suda norok saui man ya kho diba? Norok romwi man ya kho diba? Aswk da norokni bwkha khá si ya wng?

¹⁸ Mokol tong twtwi norok nuk ya diba? Khunju tong twtwi norok khna ya diba? Norok muitu kwrwi diba?

¹⁹ Borok khorokbasaini bagwi ang a ruti lepba swkakmani abono norok muitu man ya diba? Bára tong rwkmano norok khochamani ura khung bwswk pung kha?” “Ura chiknwi,” hwnwi bórok sa kha.

²⁰ Jisu hai hwnwi sẃng kha, “Hakhe ang borok khorok brwisaini bagwi a ruti lepsni swkakmani kók la? Aphuru bára tong rwkmano norok khochamani ura khung bwswk pung kha?” “Ura sini,” hwnwi bórok sa kha.

²¹ Bo bórokno hai hwnwi sẃng kha, “Hakhe norok tabuk phano si ya kho diba?”

Betsaida-o Jisu phula khoroksano nuk rwmani

²² Bórok Betsaida-o phai kha. Aro khoroknwi khoroktham borok phula khoroksano Jisuni thani tubu kha, hakhe a phulano tang di hwnwi bórok bono koi kha.

²³ Jisu a phulano yak romwi kamini phataro tlang kha. Bo a borokni mokolo khuktwi musu-ui bono tang kha, hakhe “Nwng mungsa swk da nuk sla?” hwnwi sẃng kha.

²⁴ A borok naisigwi hai hwnwi sa kha, “Ang bororokno nugo, tamo khe buphangrok himwi tongma hai nugo.”

²⁵ Jisu a borokni mokolno tei uáisa tang kha. Aphuru a borok mokol chok chok khe naisigwi tong kha, hakhe bo haino hai nuk phi kha, bo mungsa kwrwi tẃi glang glang khe nuk kha.

²⁶ Hakhe bo bono a kami-o ta tháng phi si di tei a wngmarokno a taunni khoroksa swkno phano ta sa di hwnwi nogo kiphilwi rohor kha.

Jisuno Masia hwnwi Pitor gosimani

²⁷ Aphuru Jisu bini sagrirok bai Kaisaria Philipi amchoini kamirogo tháng lai kha. Lama-o bo bórokno hai hwnwi sẃng kha, “Ano sa di, bororok ano sabo hwn?”

²⁸ Bórok hai hwnwi sa kha, “Baksa hwno baptisma rwnai Johon, baksa ba hwno Elia, baksa ba diyarirokni bere khoroksa hwno.”

²⁹ Bo bórokno hai hwnwi sẃng kha, “Norok le tamo hwn? Ang sabo?” “Nwng Masia,” hwnwi Pitor sa kha.

³⁰ Hakhe Jisu bórokno hai hwnwi ragdama khlai kha, “Ani kók khoroksano phano ta sa di.”

Bo butharjagwi se ma thwinai hwnwi Jisu samani

³¹ Aphuru Jisu bini sagrirokno hai hwnwi phrwng kha, “Borokni Sajla panjalwi’-no sátokjakna nangnai, okra chakrarok, ochai okrarok tei Kerong phrwngnairok bai norjakna nangnai. Bo butharjaknai, hai phano salthamni ulo thangwi bachanai.”

³² Bo o kókno bórokno pháng-pháng kheno sa kha, aboni bagwino Pitor bono simi tlangwi hwn kha.

³³ Jisu uphilwi bini sagrirokni phaising naisik kha, hakhe Pitorno ahai hwnwi hwn kha, “Tháng di Soitan, ani oro ta tong di. Nwng uansukmarok abo borokni uansukma se, Kaitorni uansukma ya.”

³⁴ Aphuru Jisu lukurokno tei bini sagrirokno bini thani ring kha. Bo bórokno hai hwnwi sa kha, “Ani logi phaina khe a borok bini sakni kók ta uansuk thung, bini krus balwi ani logi phai thung.

³⁵ Kwthang tongna muchungnai borok bo thwinai, ani bagwibo Kothoma Kahamni bagwibo thwinai borok bo thangnai.

³⁶ Thwiwi tháng kha hwn khe bebak swngcharno manẃiba a borok tamo manma klai?

³⁷ Thwiwi tháng khe borok tei tamo khe thang phinai?

³⁸ Hakhe Kaitorno kiri ya wngwi tongmani o mol hamyani molo tumungno khoroksa swk ano tẃiwi, phiya ang samani kókno tẃiwi lachijak khe Borokni Sajlabo bini Buphani chẃngsacha bai chẃngsacha wngwi suari kwtharrok bai phai phuru a borokno tẃiwi lachijak anw.”