MARK 7 - Kok Borok (Re-edited) Bible (BSI)

Chuchusongni sakni kerong

¹ Aphuru Pharisairok tei Jerusalemni phainai Kerong phrwngnairok khoroknwi khoroktham Jisuni thani kuthum lai kha.

² Bórok nai ba bini sagrirok baksa yak sú yaui mai cháui tong lai kha; abo wng kha Pharisairok bororokno phrwngmani abo hai klai ya.

³ Tamni hwn khe chuchusongni sakni manẃi phaimani kerongno Pharisairok hai’-no rákhogo tei Judairokbo hai’-no rákhogo, bórok kaham khe yak súyasa mai chá ya.

⁴ Bajarni phai khebo bórok swkang súyasa mungsa pha’-no chá ya. Bórok manẃi phaimani tei kwbángma kerongroknobo rákhogo, abo khe ahai: mairang lota, tama-kangsani manwirok tei majangrok bórok kaham khe ma sú-o.

⁵ Aboni bagwino Pharisairok bai Kerong phrwngnairok Jisuno hai hwnwi sẃng kha, “Nini sagrirok tamo wngwi chini chuchusong rwui klangmani kerongno rákhok ya sla? Tamo wngwi yak sú yaui ba mai chá?”

⁶ Jisu bórokno hai hwnwi sa kha, “Jisaia bwswk sói khe norokni kók sa lang kha. Bo hai hwnwi swiwi klangma hai’-no norok phatra gwja: “ ‘O bororok búkhúk bai ano lobo phiya bwkha le bórokni ang bai chaljak se, hwnwi Kaitor sa-o.

⁷ Bórok ano surina samung nangjak ya, tamni hwn khe borok banokmani kerongno se bórok Kaitorni kerong hwnwi phrwngo.’

⁸ “Norok Kaitorni dagimano khibi rwui borok banokmani kerongno se rákhogo, mairang-lotarokno súmarok hai khe norok teibo kwbángma abo hairok khlai lai-o.”

⁹ Hakhe Jisu hai hwnwibo sa kha, “Norok banokmani kerongno rákhogwi tongna bagwi Kaitorni dagimano nornani norok kaham khe lama pharjak.

¹⁰ Musi norokno hai hwnwi dagi kha, ‘Nwng ma-phano sak nang ya ta wng di,’ phiya ‘Khoroksa swk buma buphano hamya sa khe bo bu se butharjakna klainai.’

¹¹ Aile norok hai hwnwi sa-o, bumano eba buphano chubanani khoroksani mungsa swk tongwi suda se, phiya ‘Abo Korban se.’ hwnwi saui

¹² a borok buphano eba bumano chubanani yógwi thángo. (Korban hwnmani abo Kaitorni thani yapharjak hwnma se.)

¹³ Omo hai kheno phrwng phrwng laiwi norok Kaitorni kókno samung nang ya khlai tongo. Norok omo hai khlaimani teibo kwbángma tongo.”

Tamo tamo borokno hamya khlai?

¹⁴ Aphuru Jisu lukuno tei uáisa bini thani ringwi hai hwnwi sa kha. “Norok bebak’-no ani o kókno khwbo khna di, sibo si di.

¹⁵ Phatarni bisingo habwinai abo tẃi manwi borokno hamya khlai man ya, bisingni phataro ongkhornai se bono hamya khlai-o.

¹⁶ [Khunju tong khe ba o kókno khna di.]”

¹⁷ Bo luku bai kak laiwi nogo tháng khe sagrirok bono o rwngthomani kók sẃng kha.

¹⁸ Jisu bórokno hai hwnwi sa kha, “Norokbo bui hai’-no si ya gwja! Norok romwi man ya diba! Phatarni mungsa manwi borokni bisingo hap phano abo a borokno hamya khlai man ya.

¹⁹ Tamni hwn khe abo borokni bwkha bisingo habwi ya, bohogo se habwi-o, ulo bwsakni ongkhorwi thángo.” (Omo sa thani Jisu bebak chámungno cháui mano hwnwi sa kha.)

²⁰ Hakhe bo hai hwnwibo sa kha, “Borokni bisingni ongkhormani abo se borokno hamya khlai-o.

²¹ Tamni hwn ba borokni bisingni, borokni bwkha bisingni se uansukma hamyarok ongkhorwi phai-o, abo se borokno tongmung sitra tong rw-o, khok rw-o, borok buthar rw-o,

²² buitali-buitala wng rw-o, khámai rw-o, samung hamya khlai rw-o, bandi rw-o, sak tongthok tẃi tong rw-o, músú rw-o, kók hamya sa rw-o, kung chuk rw-o, khá si ya khlai rw-o,

²³ omo tẃi manwi hamyarok bebak’-no borokni bisingni ongkhorwi phai-o, hakhe borokno hamya khlai-o.”

Bwrwi khoroksa poito khlaimani kók

²⁴ Jisu aroni kutulwi Tur taun ganani amchoi-o tháng kha. Bo nok khungsa-o kasaui kha; bono aro tongo hwnwi khoroksano phano saui man ya tẃi khe bo tongna naimani, hai phano bo nukjak yaui tongwi man li ya.

²⁵ Bwrwima khoroksa tongmani, bini bwsajwk mwtai hamya kolobjak; Jisuni kók khna kheno bo phaiwi bini yakungo klai phai kha.

²⁶ A bwrwima buini borok se, Siriyani Phoinikia ha-o achai-o. Bwsajwkni bisingni mwtai hamyano rwkhlai ja di hwnwi bo Jisuno koi kha.

²⁷ Tamo khe Jisu hai hwnwi sa kha, “Bwsarokno swkang chá rw grana; bwsarokni chámung naui sẃirokno lukhlai rwma cha ya.”

²⁸ A bwrwima hai hwnwi sa kha, “Hodasa, sẃirokbo bwsarok cháma bára ha-o klaimano chá-o!”

²⁹ Hakhe Jisu bono hai hwnwi sa kha, “Omo tẃi kók sama bai nwng nogo tháng di, nini nwsajwkno mwtai hamya yakarwi klang kha.”

³⁰ Hakhe bo nogo kiphilwi tháng kha, bini bwsajwkno ríyano rokojak nugwi kha; bini bisingni mwtai hamya sói’-no bono yakarwi klang kha.

Nathongno Jisu khna rwmani

³¹ Jisu hakhe Tur amchoini ongkhorwi Sidon tẃi khe Taun Kaichi amchoi bising tẃi Galili twibom rukungo tháng kha.

³² Borok khoroknwi khoroktham borok khoroksano bini thani tubu kha, a tubujaknai nabo nathong, tobo tota. Bórok a borokni saka yak bera di hwnwi Jisuno koi kha.

³³ Jisu bono simi luku bai swkagwi tlang kha, hakhe a borokni khunju-o bini yasi sora kha, khuktwi musu-ui a borokni bwslaino tang kha.

³⁴ Hakhe Jisu nokhasa naisaui hama kolok rohorwi a borokno hai hwnwi sa kha, “Ephata”, omo “Phiyokjak di,” hwnma se.

³⁵ Logi logi’-no a borokni khunju phiyokjak kha, bwslai bor man kha, hakhe bo kaham kheno kók saui tong kha.

³⁶ Aphuru Jisu bórok bebakno “O kókno khoroksano phano ta sa di,” hwnwi ragdama khlai kha; aile bo ta sa di hwnwi ragdama khlai rwrwk bórok o kókno pír rwrwk.

³⁷ Omono khnanairok belai uanajagwi hai hwnwi sa lai kha, “Bo bwswk khe jotonono kaham khlai! Bo nathongnobo khna rw-o, bobanobo kók sa rw-o!”