MARK 15 - Kok Borok (Re-edited) Bible (BSI)

Pilatni bwskango Jisu

¹ Phung ai kheno okra chakrarok, Kerong phrwngnairok tei bebak Kaunsil bai ochai okrarok kuthum laiwi kók chap lai kha. Bórok Jisuno khaui tlangwi Pilatni yago yapharwi kha.

² Pilat bono hai hwnwi sẃng kha, “Nwng Judairokni bugra da?” Jisu hai hwnwi sa kha, “Nwng’-no o kók saui tong kha bla.”

³ Ochai okrarok Jisuno kwbángmano majra ber lai kha,

⁴ hakhe Pilat bono tei uáisa hai hwnwi sẃng kha, “Nini tháisa phano kók sana kwrwi da? Nai di, bórok bwswk khe nono majra berwi tong kha.”

⁵ Jisu aphurubo kók tháisa phano sa li ya, hakhe Pilat uanama hapjak kha.

Jisuno butharna dagimani

⁶ Yókma Ter brúm brúm Pilat luku sanmani borokno alongni phiyók phiyógwi rohoro.

⁷ Aphuru Baraba hwnwi borok khoroksa bulai-toklai khe borok butharwi ur pati rwnairok bai baksa alongo chopjak tongo.

⁸ Luku kuthum phaiwi Pilatno hai hwnwi sa kha, “Bisi brúm brúm phiyókma hai khoroksano phiyók di.”

⁹ Bo bórokno hai hwnwi sẃng kha, “Judairokni bugrano da norok ano phiyók di hwn?”

¹⁰ Músúmani bai se ochai okrarok Jisuno yapharwi rohoro Pilat abono kaham khe’-no saui mano.

¹¹ Yang ochai okrarok lukuno hai hwnwi toksaui rw kha, “Barabano se phiyók di hwnwi Pilatno sa di.”

¹² Pilat tei uáisa lukuno hai hwnwi sa kha, “Hakhe norok Judairokni bugra hwnmani a borokno ano tamo khlai di hwn?”

¹³ Bórok hai hwnwi chirikhók lai kha, “Bono kruso kanta bu di!”

¹⁴ “Tamo wngwi? Bo tamo samung hamya tang lang ba?” hwnwi Pilat sẃng kha. Bórok teibo sotonwi hai hwnwi chirikhók lai kha, “Bono kruso kanta bu di!”

¹⁵ Pilat lukuni bwkha narwkna nai-o, aboni bagwino bo Barabano phiyógwi rw kha. Hakhe bo Jisuno swprak rwui kruso kanta buna bagwi yapharwi rohor kha.

Sengkrakrok Jisuno yasek khusek khe thwng laimani

¹⁶ Sengkrakrok Jisuno nokhla bisingo tlangwi tei bebak sengkrakrokno aro ring kha. (Abo gobornorni pelesni nokhla.)

¹⁷ Bórok bono rí kochual kan rwui busuni motok rabwi bini bokhorogo thubui rw kha.

¹⁸ Hakhe “Judairokni bugra jinabad!” hwnwi bórok bono khulum kha.

¹⁹ Bórok bono raidang bai bokhorogo bu kha, khuktwi musu kha, yáskú sungwi bono khulum kha.

²⁰ Bórok Jisuno yasek khusek khe thwng lai pái khe a rí kochualno khengwi naui bini ríno bono kan rwui rw phi kha. Hakhe bórok bono kruso kanta buna hwnwi tlang lai kha.

Jisuno kruso kanta bumani

²¹ Aphuru lama-o sengkrakrok Simon hwnwi borok khoroksano nuk kha, bo kami phaisingni tauno phaimani. Bórok bono Jisuni krusno juraboli khe bal rw kha. (Omo Kurinini Simon, Aleksandar bai Ruphni bupha.)

²² Jisuno bórok Golgotha hwnwi kwrẃngsa-o tlang kha, abono “Bokhorok Chárá” hwno.

²³ Aro bórok bono mur hwnwi bithi dalokjak angur bwtwi khan rwna nai kha, Jisu abono nung li ya.

²⁴ Bórok bono kruso kanta bu kha, hakhe bini rí sabo bubono manthai klai abono pat karwi bórok kiching bórok banta khe na lai kha.

²⁵ Bono kruso kanta bu phuru phungni kaichuku.

²⁶ Bini majra hai hwnwi swijak kha, “Judairokni bugra.”

²⁷ Bórok dagait khoroknwinobo Jisu bai baksa kruso kanta bu kha, khoroksano bini yagra, tei khoroksano yaksi.

²⁸ “Bo samung hamya tangnairokni bisingo khopjaknai,” hwnwi elembago o kók sajakmani omo hai kheno nang phai kha.

²⁹ Abo tẃi himnairok bokhorok jangriui Jisuno hai hwnwi kul kha, “Aha, nokthar swbainaisa! Salthamni bisingo abono tisa phinaisa!

³⁰ Tabuk krusni ongkhorwi phaiwi nwng sakno mwthang gra di!”

³¹ Kerong phrwngnairok bai ochai okrarok omo tẃi kheno Jisuno mwnwi laiwi hai hwnwi sa lai kha, “Bo buino le mwthango, sakno khe mwthangwi man ya!

³² Israilni bugra Masia tabuk krusni ongkhorwi phai thung, hakhe abono nugwi chwng bono poito khlainai!” Jisu bai baksa kanta bujaknai a khoroknwibo bono kul kha.

Jisu thwimani

³³ Diboro ha gwnangwi mwnagwi tong kha, ahai máng dam kwtham tong kha.

³⁴ Sarikni kwtham phuru Jisu sotonwi hai hwnwi chirikhók kha, “Eloi, Eloi, lema sabakthani?” Abo khe “O ani Kaitor, ani Kaitor tamo wngwi nwng ano khibi lang?” hwnma se.

³⁵ Aro tongnai baksa bororok bo samano khnaui hai hwnwi sa lai kha, “Khna di, bo Eliano ringwi tong kha.”

³⁶ Bórokni bere khoroksa wsponj naui do lang kha, abono angur bwtwi siringjago chomsaui raidang buchugo thepa kha. Hakhe bo Jisuni bwkhwchwi-o abono phnangwi hai hwnwi sa kha, “Toro khu di, Elia phai bono krusni da ongkhor rw phai nai grana!”

³⁷ Sotonwi chirikhógwi Jisu hama lái kha.

³⁸ Aphuru noktharni rí swngjak yaphang buchuk khaknwi khe kichigwi tháng kha.

³⁹ Krus bwskango bachaui tongnai sengkrak okra bahai khe Jisu chirikhógwi hama lái kha abono nuk kha. “O borok kubui’-no Kaitorni Sajla,” hwnwi bo sa kha.

⁴⁰ Bwrwirok khoroknwi khoroktham hakchalo bachaui naharwi tong lai-o. Bórokni bisingo Magdalani Mariam, Jakob kusu bai Josini buma Mariam, phiya Salomi tongo.

⁴¹ Jisu Galili-o tong phuruno bórok bini logi tongo, phiya bono nai-o nugo. Aro teibo kwbángma bwrwirok tongo, bórok Jerusalem jora bo bai baksa phaimani.

Jisuno Phobmani

^42-43 Sanja wng twtwi-o Arimathiani Josep sók phai kha. Bo Kaunsilni bórom khlaijaknai chalai, Kaitorni ha bu phuru phino abono bo naisingwi tongo. Aphuru Tiyar Sal (abo wng kha Sabat swkangni sal); aboni bagwino Josep bwkha torwi Pilatni bwskango thángwi Jisuni mangno sanwi kha.

⁴⁴ Jisu thwi kha hwnwi khnaui Pilat uanajak kha. Bo sengkrak okrano ringwi “Jisu thwimani bá da balok kha?” hwnwi sẃng kha.

⁴⁵ Sengkrak okra samano khnaui Pilat Josepno “Bini mangno tlangwi mano,” hwnwi sa kha.

⁴⁶ Josep jorini rí kangsa paiwi Jisuni mangno tikhlaiwi a rí bai khe dul kha, hakhe abono holongdabo khurmani mangkhoro tonwi kha. Aboni ulo bo holongdap kotorma girok rwui duglam muthubwi rw kha.

⁴⁷ Magdalani Mariam bai Josini buma nai lai tongo, hakhe Jisuno buro ton kha abo bórok nuk kha