MARK 13 - Kok Borok (Re-edited) Bible (BSI)

Nokthar swbaijak anw hwnwi Jisu samani

¹ Jisu noktharni kutulna phuru bini sagri khoroksa hai hwnwi sa kha, “Hodakra, nahar di! Bwswk holong kotor kotor! Bwswk dolan naithok naithok!”

² Jisu hai hwnwi sa kha, “Nwng aswk dolan kotor kotor nugwi tongna bla? Oro holong saka holong dulsa phano tong glak, joto swbai khibijak anw.”

Mol pái ya sini tamo tamo wngnai

³ Jisu nokthar bai dadak-didik Tháistwi hathái-o achugwi tongwi kha. Aphuru Pitor, Jakob, Johon tei Andria tepsa khe bini thani phaiwi hai hwnwi sa phai kha,

⁴ “Chwngno sa di, omorok bu phuru wngnai? Hakhe omorok wngna phuru bubo tẃi tamo phunukjak granai?”

⁵ Jisu bórokno hai hwnwi sa kha, “Hus khe tong di, kebo bai lama ta koró rwjak di.

⁶ Baksa baksa ani mungwi ‘Ang’-no bo!’ hwnwi sa phai anw, hakhe baksa baksano lama koró rw anw.

⁷ Gana-o chobani khorang khna phuru, phiya hakchalo choba nang lai kha hwnwi kók khna phuru ta uana di; abo hairok ma wngnai’-no, aphurubo mol pái ya kho.

⁸ Dopha bai dopha choba wng lai anw, ha bai ha nang lai anw; kwrẃngsa kwrẃngsa-o bangla phai anw, asari nang anw. Omorok bwsa bána phuru bohok sa grama hai se.

⁹ “Norok hus khe tong di. Norok khajagwi kuto tlangjak anw; norok thumnokrogo bujak anw; Kothoma kaham sana bagwi norok gobornorrok bai bugrarokni bwskango ani bagwi ma bacha anw.

¹⁰ Bebak dophani thani Kothoma Kaham ma pírjak granai.

¹¹ Bórok norokno khaui kuto tlang phuru tamo sanai hwnwi swkang baira ta uana di; aphuru sa di hwnwi hwnjakma hai’-no norok sa di, tamni hwn khe norok samani kókno norok sa glak, abo Phola Kwthar se sanai.

¹² Takhuk takhukno butharna bagwi rom rwui rohor anw, buphabo haino bwsano rom rwui rohor anw; bwsarok buma buphano sak nang ya wngwi bórokno buthar rw anw.

¹³ Ani bagwi bebak borok norokno naisler anw, tamo khe soiwi man suknai borok bo se mwthangjak anw.”

Gojob Khlainai Selengmasingcha

¹⁴ “Gojob Khlainai Selengmasingchano norokbo tong maya-o nuk anw.” (Omo tamo hwnmani abo porinaisa saui man thung.) “Aphuru Judia-o tongnairok hathái bwkhak khárwi tháng thung;

¹⁵ nuka-o tongnai borok bo noksingo bini manwirok mungsa phano nauina hwnwi ta hap si thung.

¹⁶ Kheto tongnai borok bo bini rí naiwina hwnwi nogo kiphilwi ta phai si thung.

¹⁷ A salo sakderiya bai sagwnangmarokni bwswk se birman wng jano!

¹⁸ Masing phuru omorok ta wng thung hwnwi Kaitorno suri san di.

¹⁹ Tamni hwn khe yaphango Kaitor o swngcharno snam phuruni simi tabuk jora bororok tekto manẃi phaimani sai’ phano aphuruni tekto belai wng kuknai, omo hai tei w bo wng glak kha.

²⁰ Tamo khe Subrai a salrokno bara rw kha, wng ya khe khoroksa phano kwthang tong glak kha mun; hai phano bini chongjak bororokni bagwi bo a salrokno bara rw kha.

²¹ “Aphuru norokno khoroksa swk ‘Iko, nahar di, oro se Masia!’ eba khe ‘Uko, aro se bo!’ hwnwi sa khe bini kók ta na di.

²² Masia phatrarok bai diyari phatrarok bacha anw. Bórok soidom bai uanamasingcha samungrok phunuk anw, wng khe ba Kaitorni chongjak bororokno suda lama koró rw anw.

²³ Hakhe hus khe tong di. Swkang baira’-no ang norokno bebak’-no sa-o.”

Borokni Sajla phainani kók

²⁴ “A tekto rwjak bai khe sal mwnak anw, tal tei chẃng glak,

²⁵ nokhani athukirirok klai anw, nokha gwnangwi jangrijak anw.

²⁶ Aphuru khe Borokni Sajla nukjak phai anw, bo chumui-o khe belai phankrak wngwi chẃngsacha khe phai anw.

²⁷ Bo suarirokno haktorni babai brwi-o rohor anw, hakhe bórok Kaitorni chongjak bororokno haktorni yaphang buchukni thum phai anw.”

Khwichang buphang bai phrwngmani

²⁸ “Norok khwichang buphangno naisigwi srwng di. Bini bedek khrangsaui bwlái rotomwi phai phuru tangbla sampha kha hwnwi norok saui mano.

²⁹ Omo hai kheno norok omorokno wngma nuk phuru mol sampha kha hwnwi khá ka di, sók phai se tong kha hwnwi khá ka di.

³⁰ O kókno muitu narwk di, o molni bororok bebak thwi bai ya sini’-no omorok bebak’-no wng anw.

³¹ Ha bai nokha se kwma anw ba, ani kókrok kwma glak.”

A sal bu phuru phaino kebo saui man ya

³² “A sal bai a jora bu phuru phaino kebo saui man ya; chuknohani suarirok buya, Sajla buya, Pha simi se abo saui mano.

³³ Hus khe tong di, sichaui tong di, a sal bu phuru wngno norok saui man ya.

³⁴ Omo ahai wngnai; borok khoroksa nokni kutulwi beraina tháng kha. Bo bini selengrokno janija samung khlai di hwnwi berwi klang kha: phiya duglam mwrwknaino sichaui tong di hwnwi dagiui klang kha.

³⁵ Hakhe norok sichaui tong di, tamni hwn khe nokphang bu phuru phaino norok saui man ya; sanja jora, eba hor diboro, eba aichugo, eba sal kasaui phano phaina tongo.

³⁶ Bo achomsa phai phuru norokno muktrwi thángjak nuk phai ya tẃi khe sichaui tong di.

³⁷ Hakhe ang norokno samani bebakno’-no sa-o, sichaui tong di.”