MALAKI 3 - Kok Borok (Re-edited) Bible (BSI)

¹ “Nai di, ang ani tẃitunno lama snamna bagwi ani slái swkang rohor anw tei nwng naitukmani a Subraiyung achomsa khe bini noktharo phainai. Nwng bwkha phurjakmani a swmaini tẃitun phaiwi tongo, hwnwi Phankrak Subraiyung sa-o.

² “Tamo khe bo phaima salno sabo soiwi tongwi mannai tei bo nukjak phuru sabo bini bwskango bachaui mannai?” “Tamni hwn ba bo wng kha rukphai sógwi kwkrwk khlainai hór hai tei sújaknai chakhwi kwprap hai;

³ bo rukphai bai rangchakno sógwi kwkrwk khlainai hai khe achuknai tei bo Subraiyungni thani kaham khe yapharmung yaphar ya sak rangchak tei rukphaino sógwi kwkrwk khlainai hai khe Lebini bosongno súchanai.

⁴ Aphuru khe Juda bai Jerusalem swkangni kwcham salrogo Subraiyung bwkha phurwi yachakjakma hai yachakjaknai.

⁵ “Aphuru khe ang norokni thani bujsóini bagwi sedernai; tei ang danda-baji phunuknairok, buitali-buitala wngnairok, tatal sakki rwnai tei mula tangnairokno bandinairokno, randijwkmarokno, ma-pha kwrwirokno, buini hani bororokno kusupnai tei ano bórom khlai yarokno ang bórok bebakno kebengwi bachaui kók sanani kodo wngnai hwnwi Subraiyung Kaitor sa-o.

Chi-o kaisa rwmani

⁶ “Tamni hwn ba ang se Subraiyung ang sláijak ya; aboni bagwi norok o Jakobni bosong, tabukbo komorwi tháng ya kho.

⁷ Norokni chuchu borani sakni simino norok ani raidani uslu baiwi abórokno rákhok li ya gwja. Ani thani kiphil di, hakhe angbo nini thani kiphilnai hwnwi Phankrak Subraiyung sa-o. Tamo khe, ‘Chwng bahai khe kiphilnai?’ hwnwi nwng sa-o.

⁸ Borok Kaitorno sekproui da man? Hai phano norok le ano sekpro kha. Tamo khe norok sa-o, ‘Bahai khe chwng nono sekpro kha ba?’ chi-o kaisa rwmarogo sekpro-o.

⁹ Norok swraimung nangjak, tamni hwn ba norokni bebak dopharok ano sekpro-o.

¹⁰ Ani nogo chámung kupulung tongna tẃi khe ani rwbam nogo norokni bebak kaichi-o kaisano tubu di, hakhe ano amjogwi nai di, hwnwi kwplaisa Subraiyung sa-o; nai di ang nokhani tailamrok phiyogwi hamari supungwi kwsar rwui rw de rw rw ya nai di.

¹¹ Ang nini bagwi a uákhrainai kúkthorarokno damroknai, hakhe abo nini hani bwthái-bumukrokno dera rw glak; hakhe nini barini angur buphango bwthái thái ya wng glak, hwnwi Phankrak Subraiyung sa-o.

¹² Hakhe bebak dopharok norokno hamchajak hwnnai, tamni hwn ba norokni ha tongna bagwi tongthothok wng suknai hwnwi kwplaisa Subraiyung sa-o.

Khairoknai hwnwi Kaitor swmai tangmani

¹³ “Norok ano kebengwi kók kwrak kwrak sa kha, hwnwi Subraiyung sa-o. Tamo khe nwng ‘Chwng bahai khe nono kebengwi sa lang ba?’ hwnwi sa lai-o.

¹⁴ Norok ‘Kaitorno monma le mungsa se chúk ya. Bo dagima tẃi tongwi eba Phankrak Subraiyungni thani bwkha kwbai khlaiwi thángwi tamo mannai ba?’ hwnwi sa lai-o.

¹⁵ Chwng tabuk kung chuknairokno se hamchajak khe nugo; samung hamya khlainairok cha sama simi ya, tamo khe bórok Kaitorno potaliui nai phuru khe yógwi thángo.”

¹⁶ Aphuru khe Subraiyungno kirinai bororok khoroksa tei khoroksa bai sa lai kha; Subraiyung bórok sa laimano kaichomwi khna kha tei bini bwskango Subraiyungno kirinai tei bini mungno tẃi uansuknairokno muituni bijabo khe swijak kha.

¹⁷ Bórokno tẃiwi Phankrak Subraiyung hai hwnwi sa-o, “Ani chongjak salo khe bórok ani sakni sompoti wngnai, bórok ani borok’-no wngnai. A salo ang borok khoroksa monnai bwslano sátok ya wng tẃi khe angbo bórokno sátok yaui yakarwi rwnai.

¹⁸ Aphuru khe nwng tei uáisa borok kaham bai borok hamya phér laimano, Kaitorno monnai tei mon yani phér laimano nuknai.