LUK SWIMANI KOTHOMA KAHAM 4 - Kok Borok (Re-edited) Bible (BSI)

Jisuno belokmani

¹ Phola Kwthar bai koboljagwi Jisu Jordanni kiphilwi phai kha. Bo Phola bai hasing panthoro tlangjak kha,

² aro bo nokha sal brwichi Soitan bai belokjak kha. Aswk sal bo mungsa phano chá li ya; abo lái kheno bo ok khuijak kha.

³ Aphuru Soitan bono hai hwnwi sa kha, “Nwng Kaitorni Sajla khe o holongno ruti wng di hwn di.”

⁴ Jisu hai hwnwi sa kha, “Elembago o kók tongo, ‘Borok ruti bai simi thangwi man ya, tamo khe Kaitorni khukni bebak kók bai se thangnai.’ ”

⁵ Soitan aphuru bono hathái kuchugo tlangwi o swngcharni aswk hano mukphilik kaisa bai phunuk kha.

⁶ Tei Soitan bono sa kha, “Ang nono o harokni bugra snamwi aswk jolma-jolsano nini yago rwnai. Omorok bebak ani yago yapharjak kha, hakhe ang ani muchung tẃi jesano phano omono rwui mano.

⁷ Tumung nwng ano khulum khe omorok bebak nini wng anw.”

⁸ Jisu hai hwnwi sa kha, “Soitan, oroni uslu lang di, elembago o kók tongo, ‘Nini Kaitor Subraino simi se suriui khulum di.’ ”

⁹ Aphuru Soitan bono Jerusalemo tlangwi noktharni bosok kuchugo bacha rwui hai hwnwi sa kha, “Nwng Kaitorni Sajla hwn khe oroni ha-o bakhlai di,

¹⁰ tamni hwn ba elembago o kók tongo, ‘Bo nono naina nukna bagwi bini suarirokno dagi anw.’

¹¹ O kókbo tongo, ‘Nini yakung holong nang ya tẃi khe bórok nono yak bai yachak sok anw.’ ”

¹² Jisu bono hai hwnwi sa kha, “Elembago o kók tongo, ‘Nini Kaitor Subraino nwng ta potali di.’ ”

¹³ Podrepot khe belogwi wngjak li ya khe Soitan bono yakarwi klang gra kha.

Jisu Galili-o samung khlai gramani

¹⁴ Hakhe Jisu Pholani phan bai kupulung khe Galili-o kiphilwi phai kha, bini kók a amchoi gwnangwi pírjak kha.

¹⁵ Bo aroni thumnokrogo phrwng kha, hakhe jotono bono kaham hwn kha.

Nasaretsong Jisuno rwkhlaimani

¹⁶ Jisu torma lokmani a Nasareto phai kha, Sabat sal brúm brúm thumnogo thángma hai’-no bo Sabat salo thumnogo tháng kha. Bo Elembak porina hwnwi bacha kha,

¹⁷ hakhe bono Jisaia diyarini bijap yapharjak kha. Bo abono philwi o kók swijak tongmano man kha:

¹⁸ “Subraini Phola ano koboljak, tamni hwn khe kwrwirokni thani Kothoma Kaham pírna bagwi bo ano chong kha. Khajakrok khengnani, nuk yarok nuk rwnani, kusupjakrokno phiyókna bagwi,

¹⁹ phiya Subrai bini bororokno khairokna hwnmani a salni kók sakhlaina bagwi bo ano rohor kha.”

²⁰ Hakhe bo bijap kholobwi nok nainaini yago rwui achugwi kha. Thumnokni aswk bororok bono máng naisigwi tong bai kha.

²¹ Aphuru khe bo bórokno hai hwnwi sacha kha, “Tini norok elembakni o kók khna phuruno omo nang phai kha.”

²² Hakhe bebak borok bono kaham hwn kha tei bini búkhúkni kók kahamno khnaui bórok uanajagwi hai hwnwi sa lai kha, “Omo Josepni bwsla ya diba?”

²³ Bo bórokno hai hwnwi sa kha, “ ‘Daktor, nwng sakno ham rw gra di,’ hwnwi kogo tongmano norok khurchaui sanai abo ang saui mano. Norok ano hai hwnwibo sanai, ‘Kapharnaumo khlai-o hwnwi chwng khnamani hai oro nini ha-obo abo hai khlai di.’ ”

²⁴ Jisu teibo hai hwnwi sa kha, “Ang norokno o kók sa-o, khoroksa diyari phano bini sakni ha-o yachakjak ya.

²⁵ Ani o kók kubui khe ahai, Eliani molo nokha bisiktham kwchar uatwi ua yani bagwi ha gwnangwi belai asari nang phuru Israilo randijwkrok kwbángma tongo;

²⁶ tamo khe bórokni bere keboni thani Elia rohorjak ya; Sidon amchoini Sarepatni randijwk khoroksani thani se rohorjak si-o.

²⁷ Elisa diyarini molobo Israilo biyadi chájakrok kwbángma se, hai phano abórokni bisingo khoroksa phano ham rwjak ya, Siriyani Namanno simi se ham rwjak si-o.”

²⁸ Bini o kók khnaui thumnokni aswk bororok jai kheno jolijak bai kha.

²⁹ Bórok bachaui bono sopre máng taunni phataro tlang kha, hakhe a taun tisamani hathái buchukni khiklai rohorna hwnwi bono tlangwi tháng kha.

³⁰ Yang le bo bórokni bising tẃi ongkhorwi tháng kha.

Mwtai hamya kolobjakno Jisu sra rwmani

³¹ Aphuru Jisu Kapharnaumo tháng kha, abo Galilini taun; aro bo Sabat salo bororokno phrwng kha.

³² Bo phrwngmani abono bórok uanajak bai kha; tamni hwn khe bini kók belai nangnai máng.

³³ Thumnogo mwtai hamya kolobjak borok khoroksa tongo. Bo hai hwnwi sotonwi chirikhók kha,

³⁴ “O Nasaretni Jisu, nwng chwng bai tamo nangjak? Nwng chwngno sokomorna da phai? Nwng sabo ang saui mano, nwng Kaitorni aroni borok Kwthar!”

³⁵ Hakhe Jisu a mwtaino hai hwnwi damrok kha, “Siringcha wng di! O borok bisingni ongkhorwi phai di!” Hakhe a mwtai hamya bebakni bwskango a borokno khiklai klangwi ongkhorwi tháng kha, bono mungsa phano hamya khlai li ya.

³⁶ Hakhe jotono uanajagwi hai hwnwi sa lai kha, “Omo tamo hwnmani kók? Bo sotonwi damrokma bai se mwtai hamyarok ongkhorwi ma thángo!”

³⁷ Hakhe bini a kók a amchoi gwnangwi pírjak kha.

Borok kwbángmano Jisu ham rwmani

³⁸ Bo thumnokni kutulwi Simonni nogo habwi kha. Simonni bwkrajwk aphuru belai khe lumjak, hakhe bini bagwi bórok bono sa kha.

³⁹ Jisu bini gana bachaui damrok kheno kulum sraui tháng kha, bo’-bo logi logi bachaui bórokno chá rw kha khan rw kha.

⁴⁰ Sal hap khe janija nokni podrepot hamyarokno bini thani tubu-ui phai kha. Bo jotoni saka yak beraui jotono ham rw kha.

⁴¹ Baksa baksani sakni mwtai hamyabo “Nwng Kaitorni Sajla Khristo se!” hwnwi chirikhógwi ongkhorwi tháng kha. Jisu bórokno “Kók ta sa di,” hwnwi damrok kha, tamni hwn khe bono Masia hwnwi bórok saui mano.

Thumnokrogo Jisu kók samani

⁴² Aichuk dorpho dorpho phuru Jisu taunni kutulwi siring siring kwrẃngsa-o tháng kha. Lukurok bono naituk lai kha, bono nuk kheno bórok bono kutul rwna nai li ya.

⁴³ Tamo khe bo bórokno hai hwnwi sa kha, “Kubun taunrogo thángwi ang Kaitorni hani Kothoma Kaham saui khna rwna nang anw; omoni bagwi se ang rohorjago.”

⁴⁴ Hakhe bo Judia gwnangwini thumnokrogo kók sa kha.