LUK SWIMANI KOTHOMA KAHAM 2 - Kok Borok (Re-edited) Bible (BSI)

Jisu achaimani

¹ A molo Rumni bugra kotor Agosto bini ha-o tongnairokno bumung ma tisa bainai hwnwi sakhlai rwjak kha.

² Abono puila borok lekhamani, aphuru Siriyani gobornor wng kha Kurini.

³ Janija bumung tisa rwna bagwi aswk bororok aphuru janija kamiyungo tháng bai kha.

⁴ Josep Galilini Nasaret kamiyungni Daudni kamichang Judiani Betlehemo bumung tisa rwna hwnwi tháng kha, tamni hwn ba bo khe Daud bosongni ba.

⁵ Bo Mariam bai khe bumung tisa lainani tháng kha, Josep bai Mariamno káinani hwnwi kók sẃngwi páijak, Mariam aphuru sakderiya.

⁶ Bórok aro tong phuru Mariamni sak kengna jora wng kha.

⁷ Hakhe bo khoroksa chwla bwsa bá kha, omono bini puilani bwsa, bo a chwraino rí dului guai nokni musuk ada chá rwma manwi-o mokholwi ton kha; tamni hwn khe nograi nogo bórokni tongthai kwrwi kha.

Mera mwrwknairokno Jisu achaimani kók samani

⁸ A amchoi-o mera mwrwknairok sula-o khe tongwi hor horo bórokni mera mwrwgo.

⁹ Aphuru Subraini suari khoroksa bórokni bwskango bacha phai kha; Subraini pohor bai yaksi yagra chẃngsacha wng kha. Hakhe bórok jai kheno kirijak lai kha.

¹⁰ Tamo khe suari bórokno hai hwnwi sa kha, “Ta kiri di; ang norokni bagwi kothoma kaham se tubu-ui phai-o; abo bebak bororokno khápang srang rwnai;

¹¹ tinini horono Daudni kamichang Betlehemo norokni bagwi mwthangnaisa khoroksa achai kha; bo’-no Subrai Khristo.

¹² Chwrai khoroksa musuk ada chá rwma manwi-o rí dului mokholjak nugwi anw hai kheno norok bono siniui man anw.”

¹³ Chuknohani teibo suari pal kotor khe aro achomsa a suari bai baksa nukjak phai kha. Bórok Kaitorno lobwi hai hwnwi rwchap lai kha,

¹⁴ “Chuknohani kuchugo Kaitor lobjak thung! O swngcharo bo hamjakma bororok ham thung!”

¹⁵ Suarirok bórok bai kak laiwi chuknoha-o tháng bai khe mera mwrwknairok hai hwnwi sa lai kha, “Him di tho, Subrai chwngno omo ahai wng kha hwnwi sa langmano chwng Betlehemo thángwi nai lai anw.”

¹⁶ Hakhe bórok do lang kha, hakhe bórok aro Mariam bai Josepno nugwi kha, chwrainobo musuk ada chá rwma manwi-o mokholjak nugwi kha.

¹⁷ Mera mwrwknairok bono nugwi kheno bórok suari bai sajakmano bórokno saui khna rw kha;

¹⁸ bórok samani a kók khnanairok bebak’-no uanajak bai kha.

¹⁹ Yango Mariam khe a kókrokno bwkha bisingo chobwi narwgwi kaham khe uansugui tong kha.

²⁰ Mera mwrwknairok sajakma hai’-no nukma tei khnama bagwi Kaitorno kotor hwnwi lobwi kiphilwi tháng lai kha.

Jisuno bumung pharmani

²¹ Nokha salcharni ulo sakur rana phuru a chwraino Jisu hwnwi bumung phar kha; ogo wng ya sini’-no suari bono á bumung rwui klang kha.

Jisuno noktharo yapharmani

²² Musini Kerongo tongma tẃi abul súnani sal sók phai khe bórok bono Subraini thani yapharna bagwi Jerusalemo tubu kha,

²³ (tamni hwnmaba, “Swkangni bwsa chwla hwn khe bono Subraini thani ma yapharnai,” hwnwi Subraini Kerongo swijak tongo.)

²⁴ “Tokthu jorsa eba khe pharuk bwsa jorsa ma ratharnai,” hwnwi Subraini Kerongo tongma hai’-no bórok ratharnabo tháng kha.

²⁵ Aphuru Jerusalemo Simion hwnwi Kaitorno surinai borok kaham khoroksa tongo; Israilrok yókna hwnmano bo naisingwi tongo tei Phola Kwthar bono kobolwi tongo.

²⁶ Subrai rohorna hwnmani a Masiano nuk ya sak bo thwi glak hwnwi swkango Phola Kwthar bono saui man rwjak.

²⁷ Simion Phola bai tubujagwi noktharo phai kha; tei kerongo tongma hai khlaina hwnwi buma bai bupha Jisuno noktharo tubu khe

²⁸ Simion a chwraino bamsogwi Kaitorno lobwi hai hwnwi sa kha,

²⁹ “Bubagra, tabuk nwng kók rwma tẃi, nini selengno bwkha kwchang rwui yakarwi rohor si di;

³⁰ tamni hwn ba nwng rohormani mwthangnaisano ang mokol baithang nuk kha,

³¹ bebak dophani bororokni bwskango nwng bono phunuk kha,

³² bo wng kha buini bororokno nini pohorno phunuknai tei nini borok Israilrokni mwkhang chẃng rwnai pohor.”

³³ Jisuno tẃiwi kók sajakmarokno khnaui Josep tei buma uanajak kha.

³⁴ Simon bórokno hamari rwui chwraini buma Mariamno hai hwnwi sa kha, “O chwraini jarwi Israilrokni baksa ma kwlwknai, baksaba ma thangchanai. Bono Kaitor bai chongjak hwnwi phunukjaknai, bini bagwi borok kwbángma’-no kók hamya sanai,

³⁵ hakhe bórokni bwkha bisingo tamo tong sijak anw tei nini bwkha-o seng yórjakma hai khe nwng bwkha báijak anw.”

³⁶ Aro Hanna hwnwi diyarijwk khoroksa tongo, bo Aser bosongni, Phanuelni bwsajwk. Bo belai bwrwichwk; káijakmani nokha bisi sni ulo,

³⁷ bo randi wng kha, aphuruni simi nokha bisi charchi-brwi bo randi’-no wngwi tong kha. Bo tei noktharni kutul li ya; bo ubas khe suri sanwi Kaitorno hor sal suri máng tongo.

³⁸ Bo katswi aphuru’-no aro sók phaiwi Kaitorno hambai rw kha, phiya Kaitor Jerusalemno phiyókna hwnwi naisingwi tongnairokno bo a chwraini kókno saui khna rw kha.

Nasareto kiphilmani

³⁹ Subraini Kerongo tongma hai khlai baiwi bórok bórokni kamiyung Galilini Nasareto kiphilwi tháng lai kha.

⁴⁰ Chwrai torwi-logwi phai rwrwgo, siui-nugui khá siui phai rwrwgo. Kaitor bono naikhlaiwi tongo.

Noktharo chwrai Jisu

⁴¹ Bisi brúm brúm Yókma tero bini buma-buphasong Jerusalemo thángo.

⁴² Hakhe bo nokha bisi chiknwini chwrai phuru bórok bisi brúm brúm thángma hai Tero tháng kha.

⁴³ Ter pái khe bórok kami bwkhak lam rw lai kha, yang Jisu khe Jerusalemo tong rwk kha, Josep tei buma abono saui man ya.

⁴⁴ Kiphilwi tongnai bikiching palrok bai se tongna hwnwi chongwi bórok salsani lama himwi phai kha. Ulo khe bórok sakni borok tei sinima bororokni bisingo bono naitugwi nai lai kha.

⁴⁵ Bórok aro bono naitugwi man ya wngwi bórok naituk te naituk te Jerusalemo phai lai khua.

⁴⁶ Nokha salthamni ulo bórok bono noktharo manẃi kha, bono aro Kerong phrwngnairokni bisingo achugwi bórokni kók khnaui tongmani, phiya bórokno sẃng phenegwi tongmani nugwi kha.

⁴⁷ Bo kók samano khnanairok bini kók rwngmano tei kók uphil samarokno nugwi uanajak bai kha.

⁴⁸ Buma bupha bono nugwi mwlang cha lai kha; tei buma bono hai hwnwi sa kha, “Sajla, nwng chwngno tamni omo hai khlai kha? Nai di, nwpha bai ang bwswk biji-biji khe nono ma naituk kha.”

⁴⁹ Bo bórokno hai hwnwi sa kha, “Tamo wngwi norok ano naituk lai? Ang Aphani nogo ma tongnai hwnwi norok saui man ya da?”

⁵⁰ Phiya ba bo samani kókno bórok romwi man li ya.

⁵¹ Jisu aphuru khe bórok bai baksa Nasareto kiphilwi phai kha tei bo bórokni kók khnaui tong kha. O nangwi tháng phaimarokno buma tháisa kwrwi tẃi bwkha-o kholwi narwk bai kha.

⁵² Jisu torwi-logwi, siui-nugui phai rwrwk kha, bo Kaitor baibo hamjak rwrwgo, borok baibo hamjak rwrwgo.