LUK SWIMANI KOTHOMA KAHAM 14 - Kok Borok (Re-edited) Bible (BSI)

Hamya khoroksano Jisu ham rwmani

¹ Salsa Sabat salo Jisu Pharisairokni bere bokhorok khoroksani nogo mai chána hwnwi tháng kha; hakhe bororok Jisuno naichomwi tong lai kha.

² Aphuru yakung yak dujak khoroksa Jisuni bwskango phai kha.

³ Hakhe Jisu Kerong phrwngnai bai Pharisairokno hai hwnwi sẃng kha, “Sabat salo hamya ham rwui mano hwnwi chini Kerong sa da sa?”

⁴ Tamo khe bórok tháisa phano sa li ya. Jisu a borokno samo náhárẃi ham rwui rohor kha.

⁵ Hakhe bo bórokno hai hwnwi sa kha, “Norokni bere khoroksa swkni bwsla eba musuk phano Sabat salo twikhoro klai khe Sabat sal hwnwi bono logi logi’-no tisa ya da tong no?”

⁶ Bórok kók tháisa phano sa phirwi man li ya.

Nograi bai nokphangno phrwngmani

⁷ Jisu nai ba baksa nograirok khamplai kaham naiwi achugo. Aboni bagwino bo o rwngthoma bebakno sa kha.

⁸ “Khoroksa swk nono kái lai panda-o kobok khe khamplai kaham naiwi ta achuk di. Tamni hwn khe nini slái phano borok kotor kobokjakna tongo.

⁹ Hakhe norok khoroknwino koboknai a nokphang nono hai hwnwi sa phai anw, ‘Bono o khamplaino rw di.’ Aphuru nwng lachi kothronai, khamplai hamya obo ma achuknai.

¹⁰ Abo tẃi wng yaui kobokjagwi tháng khe khamplai hamya-o se achugwi di. Hakhe nokphang nono hai hwnwi sa phai anw, ‘Takhuk, khamplai kahamo bachaui achuk phai di.’ Aphuru aswk nograirokni bwskango nini mwkhang chẃngnai.

¹¹ Tamni hwn ba kotor wngna sadinai borok bo kotoi snamjaknai; phiya kotoi wngna sadinai borok bo kotor snamjaknai.”

¹² Jisu bono koboknaino hai hwnwi sa kha, “Nwng buino mai khopsa chá rwna nai khe aro nikiching, nini takhuk, nini sandai-masak eba noksa-nok ari gwnangrokno ta kobok di; kobok khe bórok nono kobok phir anw, hakhe nwng sujak phir anw.

¹³ Nwng panda achuk rw khe aro bigra, kompa, khora, phularokno se kobok di.

¹⁴ Hakhe nwng hamchanai, tamni hwn khe bórok le nono abono su-ui man phi glak, borok kahamrok thangwi bacha phuru nwng Kaitor bai sujaknai.”

Panda kotorni rwngthoma

¹⁵ Bo bai chá lai tongnairokni bere borok khoroksa abono khnaui Jisuno hai hwnwi sa kha, “Kaitorni hani panda-o ma achuknairok bórok bwswk se hamchanai!”

¹⁶ Jisu bono hai hwnwi sa kha, “Borok khoroksa panda kotor achuk rwmani. Bo aro borok kwbángma kobok kha.

¹⁷ Chána jora wng kheno bo bini selengno rohorwi a kobokmarokno ‘Phai si di, bebak wng bai kha,’ hwnwi sa rw hor kha.

¹⁸ Tamo khe bórok mungsa ya mungsa samung phunugui jotono sak phér bai kha. Khoroksa hai hwnwi sa kha, ‘Ang kheto paima tongo, abono thángwi ma naiwi anw; ano yakar jaba di.’

¹⁹ Tei khoroksa hai hwnwi sa kha, ‘Ang musuk jorba paima tongo, abórokno naina bagwi ang lam rw kha; ano yakar jaba di.’

²⁰ Tei khoroksa hai hwnwi sa kha, ‘Ang káijak dorop, aboni bagwino thángwi man glak.’

²¹ A seleng kiphilwi phaiwi bini nokphangno omorokno bebak saui khna rw phai kha. Hakhe nokphang jolijagwi hai hwnwi sa kha, ‘Do di, taunni lamarokni beser-basarni bigrarok, komparok, phularok tei khorarokno tubu-ui phai di.’

²² Srapsa tongwi a seleng hai hwnwi sa phai kha, ‘Nokphangsa, nwng dagi tẃi’-no khlaijak kha, teibo khamplai bára tong kho.’

²³ Hakhe nokphang selengno hai hwnwi sa kha, ‘Tháng di, kami bwkhakni lamarokni bororokno tubu-ui phai di, hakhe borok nok pung phai anw.

²⁴ Ang norokno o kók sa-o, a kobokjaknairok khoroksa phano ani o pandani bahai man glak.’ ”

Sagri wngna khe

²⁵ Borok kwbángma Jisuni logi him laijak. Bo uphilwi bórokno hai hwnwi sa kha,

²⁶ “Ani thani phainai borok bo buma-bupha, bihik-bwsa, takhuk-bukhuk phiya sakno suda khibi ya khe ani sagri wngwi man ya.

²⁷ Sakni krusno balwi ani logi phai ya khe a borok ani sagri wngwi man ya.

²⁸ Norokni bisingo khoroksa swk nok kuchuk tongna khe bo a samungno bini yago tongma rang bai paiwi da mano hwnwi uansugui lekha granai.

²⁹ Wng ya khe nokthai simi lu baiwi a nokno paiwi man ya khe abono nuknairok jotono hai hwnwi saui mwnwinai,

³⁰ ‘O borok cheng hwnwi le cheng kha, pái se man ti li ya.’

³¹ Eba khe bugra khoroksa swk sengkrak khorok chisai tẃiwi tei khoroksa sengkrak khorok nwichisai tẃijak bugra bai choba nang laina tháng khe bo a bugrano pa da páino hwnwi uansugui nai granai.

³² Pái thotok wng ya khe a bugra hakchalo tongsani’-no bo kwtha lainani kók sa laina bagwi borok rohornai.

³³ Omo tẃi kheno tong kwrwi khibi ya khe norokni bisingo khoroksa phano ani sagri wngwi man glak.”

Samung nang ya sóm

³⁴ “Sóm manwi kaham’-no, phiya pab ya wngwi tháng khe abono pab rw phinani tei lama kwrwi.

³⁵ Abo khetobo samung nang li ya, nokbra-obo samung nang li ya; abo khibiui rwjago. Khunju tong kheba o kókno khna di.”