LUK SWIMANI KOTHOMA KAHAM 12 - Kok Borok (Re-edited) Bible (BSI)

Phatrarok bai hus khe tong di

¹ Sai sai borok kuthum phaima bai yakung bai yakung se káphikjak laiwi tong lai si-o. Jisu aphuru bini sagrirokno simi hai hwnwi sa gra kha, “Pharisairokni chuanni bagwi hus khe tong di; abo phatrarok bai hus khe tong di hwnwi sama se.

² Kholobwi tonjak phiyokjak anw, kotonwi tonjak sijak anw.

³ Aboni bagwino norok mwnago samano pohoro khna rwjak anw; norok besero tongwi khunju-o serek-serek samano kami kami chirikhógwi sajak anw,”

Sabono kirina nangno?

⁴ “Takhukrok, ang norokno o kók sa-o, mangno simi butharwi mannairokno ta kiri di; aboni slái bára bórok tei mungsa phano khlaiwi man ya.

⁵ Sabono kirina nangno ang tabuk sa anw. Kaitorno simi se kiri di; bo le butharwi páibo morke-o khiklaiwi mano. Au, ang sa-o, bono’-no kiri di!

⁶ “Chwrwi makba ba lepnwi khe suda phalwi man glak diba? Omo tẃi chwrwirokno suda Kaitor masano phano pok ya.

⁷ Norokni bokhorokni bebak bwkhnai suda bo lekhajak. Aboni bagwino ta kiri di; chwrwi kwbángmani slái norok tor kugo.”

Luku bwskango Khristono gosi khe

⁸ “Ang norokno o kók sa-o, luku bwskango ano gosi khe Kaitorni suarirokni bwskango Borokni Sajlabo a bororok gosi anw;

⁹ phiya luku bwskango ano gosi ya khe Kaitorni suarirokni bwskango Borokni Sajlabo a borokno gosi glak.

¹⁰ “Borokni Sajlano hamya sanai borok bo nakarjakna pha’-no tongo; phiya Phola Kwtharno hamya sanai a borok nakarjak glak.

¹¹ “Bororok norokno thumnogo eba khe hani bokhorokrokni bwskango buj thumna bagwi tubu phuru bahai khe yóknai abono ta uana di, tamo sanai sa ya abonobo ta uana di;

¹² tamni hwn khe tamo sana nangno Phola Kwthar aphuru’-no norokno saui rw phai anw.”

Gwnang bepotarni rwngthoma

¹³ Luku bisingni khoroksa Jisuno hai hwnwi sa kha, “Hodakra, apha klangmani sompotini ani bantano rw di hwnwi ani takhukno sa di.”

¹⁴ Jisu hai hwnwi sa kha, “Takhuk, norokni buj thumna bagwi, eba norokni sompoti banta khe rwna bagwi sabo ano chong kha ba?”

¹⁵ Hakhe bo lukuno hai hwnwi sa kha, “Sichaui tong di, podrepot khámaimungrok bai hus khe tong di; tamni hwn khe gwnang phano wng thung rang-rí bai simi borok kaham khe tongwi man ya.”

¹⁶ Jisu aphuru o rwngthomano bórokno sa kha, “Gwnang khoroksa tongmani. Bini kheto belai khe mai ham kha.

¹⁷ Hakhe bo hai hwnwi uansuk kha, ‘Aswk mai kwbángma tonnani jaga se kwrwi. Ang tabuk tamo khlainai?’

¹⁸ Bo khá bising bising hai hwnwi sa kha, ‘Ang samung mungsa tang si anw. Mai tonma norokno swbaiwi kotor khe tang phir anw. Aro’-no a mai bai aswk manwino ton anw.

¹⁹ Aphuru ang khá bising bising hai hwnwi sa anw, Talikha kahamsa bisi kwbángmani bagwi manwi kwbángma tisaui narwk kha. Lengla twtwi tabuk bisogwi chá di nung di, tongthok di!’

²⁰ Yang le Kaitor bono hai hwnwi sa kha, ‘Bepotarsa! Tini horo’-no nwng ma thwi anw. Aswk tisaui narwkma manwirok aphuru khe sabo mannai?’ ”

²¹ Jisu hai hwnwi saui kók mwthak kha, “Kaitorni thani gwnang wng yaui sakni bagwi rang-mai khatiui tonnai borok bo a gwnang hai.”

Kaitorni thani khá bera di

²² Bini sagrirokno Jisu aphuru hai hwnwi sa kha, “Aboni bagwino ang norokno o kók sa-o, tamono cháui thangnai hwnwi ta uana di, tamono kannai tamono chumnai hwnwibo ta uana di.

²³ Chámungni slái langma tor kugo, rí-chumni slái bwsak tor kugo.

²⁴ Tokharokno nahar di; bórok maibo sar ya, rabo ra ya; bórokni kairabo kwrwi, mayam nokbo kwrwi; Kaitor bórokno chá rwui tongo. Toksa-toktẃirokni slái norok bwswk se kotor.

²⁵ Norokni bere sabo uansugui ayukni bára tei salsa swk thangwi mannai tong?

²⁶ Omo hai samung kotoino khlaiwi man ya khe aswk manwirokni bagwi tamni uanaui tong?

²⁷ Khumrok bahai khe tor lok nahar di. Bórok samungbo tang ya, ríbo tak ya. Hai phano ang norokno o kók sa-o, Solomon jolma-jolsa gwnang phano omorokni barsani slái se aswk naithogwi man lang ya.

²⁸ Charani jabra; tini tong khe khwna kwrwi, thapa-o sókjaknai; abono se Kaitor aswk naithok rwui ton khe bo norokno naithok rw glak diba? Norok bwswk se poito kisa gwja!

²⁹ Aboni bagwino tamono chánai, tamono nungnai hwnwi uanaui khá ta yok di.

³⁰ (Swngcharni poito kwrwi bororok se omo tẃirokno uansugo.) Omorok norokni samung nango hwnwi norokni Pha saui mano.

³¹ Omorokno uansuk yaui Kaitorni hani bagwi se uansuk gra di, hakhe o manwirokno bo norokno ahai’-no rw anw bla.”

Chuknoha-o rang-rí khati hor di

³² “Mera bodol báng ya, norok ta kiri di! Norokni pha bini hano norokni yago rwna muchungjago.

³³ Norokni tongma jora tẃi phal baiwi a rangno kwrwirokno rw di. Tei cham phlai ya abo tẃi rang se aji di, chuknoha-o se tei pái phlai ya abo tẃi rang-rí khati hor di. Aro le sikhokbo khogwi man ya, kurumabo khunti man ya.

³⁴ Tamni hwn ba rang-rí tong thani’-no norokni bwkhabo tongo.”

Tail kwrwng selengrok

³⁵ “Chango rí khaui chati phnangwi norok tiyar khe tong di.

³⁶ Káilai panda-o thángnai nokphangni selengrok bono naisingwi tongma hai norokbo tong di. Bo dugar bu phai kheno a selengrok phiyogwi rw soknai.

³⁷ Nokphang phaiwi sichajak nuk phaima selengrok hamchanai. Ang norokno o kók sa-o, bo sakphang chango rí khaui bórokno achuk rwui chá rw anw.

³⁸ Nokphang hor diboro phano aichuk kwra-o phano phaiwi sichajak nuk phaima selengrok hamchanai.

³⁹ Phiya o kókno muitu narwk di, sikhok bu phuru hap phaino abo nokphang saui man khe bo sichaui tongwi sikhokno hap rw glak.

⁴⁰ Norokbo tiyar khe tong di, tamni hwn khe phai glak hwnwi tong phuru’-no Borokni Sajla phai anw.”

Sabo seleng kaham?

⁴¹ Pitor hai hwnwi sẃng kha, “Subrai, nwng o rwngthomano chwngno simi da sa? Bebakno bu da sa?”

⁴² Subrai hai hwnwi sa kha, “Sabo seleng kaham? Sabo khá sinai seleng sla? Bo wng kha omo tẃi: nokphang khoroksa nokni samung naina bagwi, phiya tei selengrokno sal brúm brúm chá rwna bagwi seleng khoroksano barja berwi rw kha.

⁴³ Nogo kiphil phuru nokphang a selengno omo hai samung khlaijak nuk phai khe a seleng hamchanai!

⁴⁴ Norokno ang sói kók’-no sa-o, ahai khe nokphang bini a selengno bini bebak sompotini barja snamnai.

⁴⁵ Phiya, ‘Ani nokphang phaina ler kho bla,’ hwnwi a seleng bwkha bising bising saui tei seleng selengjwkrokno bu trwng khe, belai chá khe nung khe, chuak nungwi phek khe,

⁴⁶ hakhe phai glak hwnwi tongmani salono, a seleng saui man slap ya sini bini nokphang phainai. Hakhe nokphang bono kochok nwi khe tan phainai, phiya kók khna yarok bai baksa tonnai.

⁴⁷ “Nokphangni muchungma saui manẃi suda tiyar khe tong ya khe eba bini muchungma hai khlai ya khe a seleng panjalwi swprakjaknai.

⁴⁸ Phiya, nokphang muchungmano saui man yaui swprakjaknani samung tang khe a seleng kisicha swprakjaknai. Kwbáng mannai borok bo kwbáng rw di hwnjaknai; phiya teibo kwbáng mannai borok bo teibo kwbáng rw di hwnjaknai.”

Jisuni bagwi kak laimung

⁴⁹ “Ang o swngcharno hór sókchana phai-o; ang khe tabuk se kham si thung hwnwi muchungwi tong kha!

⁵⁰ Ang baptisma kaisa nanani tong kho; abo wng ya sak ang khá tongthok ya wngwi tong kha!

⁵¹ Swngcharni bororokno kwtha rwna bagwi ang phai-o hwnwi da norok khá ka? I’nhi, kwtha rwna bagwi ya, ang swkakna se phai-o.

⁵² Nogo khorokba tong khe tabukni simi kak lainai; khoroktham tei khoroknwi bai kwtha glak; khoroknwi tei khoroktham bai kwtha glak.

⁵³ Bwsa bai bupha kwtha glak, bupha bai bwsa kwtha glak, bwsajwk bai buma kwtha glak, buma bai bwsajwk kwtha glak; hamjwk bai kwrajwk kwtha glak, kwrajwk bai hamjwk kwtha glak.”

Molni gujok

⁵⁴ Jisu bororokno hai hwnwibo sa kha, “Salthángbai bwkhak chumui kasama nuk kheno norok ‘Uatwi uanai kha,’ hwno, uabo ua-o.

⁵⁵ Salgrabai bwkhakni nokbar sipma nuk khebo ‘Satung tungnai kha,’ hwno, tubo tungo.

⁵⁶ Phatrarok! Ha bai nokhani tongmung nugwi abo tamo wngno wng ya norok saui mano, hakhe o molo tamo wngno wng ya norok abono tamo wngwi saui man ya wng?”

Uálainai borok bai kwtha di

⁵⁷ “Chama-chayano norok sakphang tamo wngwi chongwi nai ya wng?

⁵⁸ Khoroksa swk phano nini mungwi kes phnang khe kuto tháng ya sini lama’-ono bo bai kwthaui páina nai di. Wng ya khe bo nono jojni thani sopreui tlangnai, joj nono pulisni yago yapharnai, pulis nono alongo chobnai.

⁵⁹ Ang nono o kók sa-o, lepsa kwrwi tẃi jurbanda rw bai ya sak nwng aro ma tongnai.”