LUK SWIMANI KOTHOMA KAHAM 1 - Kok Borok (Re-edited) Bible (BSI)

Kókphuk

¹ Chini bisingo aswk wngwi thángmarokno baksa-baksa yaphang-buchuk swiwi narwkna nai kha,

² Yaphangni simi sak baithang nugwi kothoma kaham pírnairok chwngno sa langma hai’-no bórok swi narwk kha.

³ Aswk wngwi thángmarokno yaphangni simi ang phiklai-phiksa khe rutuk khutugui nai kha. Hodasa Thiopil, nini thani omorokno mareui swi khe ham anw hwnwi ang khá chong kha,

⁴ hakhe nwng aswk phrwngjakmarokni bebak kubuino saui man thung hwnwi ang omono swi kha.

Baptisma rwnai Johonni achaina kók sajakmani

⁵ Judiani habugra Herodni jora-o Abiani ochai bosongni Sakaria hwnwi ochai khoroksa tongmani. Bihikni mung Elisabet, bo khe Aronni bosongni.

⁶ Bórok khoroknwi’-no Kaitorni mokolo kaham khe tong lai-o; Subrai khlai di hwnwi dagimani a kerongrokno bórok bebak’-no rákhogwi tong lai-o.

⁷ Tamo khe bórokni bwsa-bẃtẃi kwrwi, tamni hwn khe Elisabet banji tei bórok khoroknwi’-no belai chakra wngwi tháng kha.

⁸ Salsa Kaitorni thani bini ochai samungni bari klaiwi bo noktharo ochaini samung khlaiwi tongmani,

⁹ pat karwi nai se bini bari klaiwi ochairokni kerong rwksaui bo Subraini noktharo habwi songphango satrai sóknani chongjago.

¹⁰ Satrai sógwi tong phuru yang lukurok khe phataro suri sanwi tongo.

¹¹ Aphuru Subraini suari khoroksa satrai sókma songphangni yagra bwkhak bachaui bini bwskango nukjak phai kha.

¹² Bono nugwi Sakaria kirima habwi uanajak kha.

¹³ Tamo khe suari bono hai hwnwi sa kha, “Sakaria ta kiri di, nwng suri sanmano Kaitor khna kha. Nihik Elisabet nono chwla bwsani mwkhang phunuk anw tei nwng a bwsano Johon hwnwi mung phar di.

¹⁴ Nwng khápang srangwi tongthokjaknai, bo achaima bai buirokbo tongthokjak anw,

¹⁵ tamni hwn ba Subraini mokolo bo kotor wng anw. Bo chuak-arak mungsa phano nung glak; bohok bisingni simi’-no bo Phola Kwthar bai kupulung anw.

¹⁶ Bo Israilni kwbángma bororokno bórokni Subrai Kaitorni thani kiphil rwui tubu anw.

¹⁷ Bo Elia diyari hai phan kwplai khe bini swkang swkang tháng anw, bo bupha bai bumano bwsarokni thani kiphilwi tubu-ui kwtha rw anw; bo kók khnayarokno kahamrok himma lama-o him rw anw; omo hai khlaiwi bo Subraini bagwi bororokno snam sok anw.”

¹⁸ Sakaria suarino sa kha, “Omo hai wngnai hwnwi ang bahai saui mannai? Ang le chakra wngwi tháng kha tei ani hikbo hai’-no bwrwichwk wngwi tháng kha.”

¹⁹ Suari sa kha, “Ang Gabriel. Ang Kaitorni bwskango tongnai tei nini thani o kók kahamno sanani bagwi se ang rohorjago.

²⁰ Hakhe tabuk nwng wngna phuru wng anw hwnwi ang samani o kókno poito tháng li ya, aboni bagwi nwng boba kha anw tei o kókrok nang phai ya sak nwng kók saui man glak.”

²¹ Yang lukurok khe tamo swk Sakaria noktharo aswk lerwi tong kha hwnwi uanajagwi naisingwi tong lai kha.

²² Bo phataro ongkhorwi phai khe bórokni thani kók saui man phai li ya, hakhe bo nokthar háyá-o mungsa swk imang-mukthang se nuk kha hwnwi bórok saui man kha. Kók saui man ya wngwi bo bórokno yak tail khe se saui tong si-o.

²³ Noktharo samung khlaimani bini bari pai khe bo nogo kiphilwi tháng kha.

²⁴ Abono ulo khe bihik Elisabet sakderiya wng kha, hakhe bo nokha talba jora nokni kutul li ya.

²⁵ “Subrai ano maya cháui lukuni thani mwkhang sókjagwi ma tongmano pái rw kha,” hwnwi bo sa kha.

Jisuni achaina kók sajakmani

²⁶ Elisabet sakderiya wngmani nokha taldok ká khe suari Gabrielno Kaitor Galili angkorni Nasaret hwnwi kamiyung khungsa-o rohor kha,

²⁷ bo bwrwi sikla-kwthar khoroksani thani rohorjago, a bwrwi Josep hwnwi habugra Daud bosongni chwla khoroksa bai káinani kók sẃngwi páijak. O bwrwi siklani mung khe Mariam.

²⁸ Gabriel bono hai hwnwi sa phai kha, “O talikha kahamjwk, nwng ham di! Subrai nini thani tongo.”

²⁹ Suarini kókrokno khnaui bo belai uanajak kha; omo bubo tẃi kók hwnwi bo uansugui tong kha.

³⁰ Aphuru khe Suari bono sa kha, “Ta uana di, Mariam, Kaitor nono maya chá kha.

³¹ Nwng sakderiya wngwi bwsa chwla khoroksa ba anw, nwng bono Jisu hwnwi mung phar di.

³² Bo kotor wng anw tei Kaitor Kotorni Sajla hwnjak anw tei Subrai Kaitor bono bini bosong Daudni achukthayungno bono rw anw.

³³ Jakobni bosongo bo bugra wngwi tong phlainai tei bini hani páimung tong glak.”

³⁴ Mariam suarino hai hwnwi sa kha, “Khoroksa chwla bai phano se ang tong ya kho, abo bahai khe wngnai?”

³⁵ Suari hai hwnwi sa kha, “Phola Kwthar nono kobol phai anw, hakhe Kaitor Kotorni phan nono kobol phai anw; aboni bagwi a chwrai kwthar; bo Kaitorni Sajla hwnjak anw.

³⁶ Nini sandai Elisabetno nai di; bo banji hwnjagwi tongma se, aswk bwrwichwgo se bo tabuk nokha taldokni sakderiya wngwi tong kha.

³⁷ Tamni hwn khe Kaitor khlaiwi man ya abo tẃi samung mungsa phano kwrwi.”

³⁸ “Ang Subraini selengjwk; nwng sama hai’-no ang wng thung,” hwnwi Mariam sa kha. Hakhe a suari thángwi pái kha.

Mariam Elisabetno naimani

³⁹ Aboni ulo Mariam hathái kami bwkhak Judiani kamiyung khungsa-o do lang kha,

⁴⁰ bo Sakariani nogo thángwi Elisabetno khulum kha hwnwi kha.

⁴¹ Mariamni á kókno Elisabet khna kheno bini bohokni chwrai bársa kha. Elisabet Phola Kwthar bai koboljagwi

⁴² hai hwnwi sotonwi sa kha, “Bwrwirokni bisingo nwng hamchajak tei nini okni chwraibo hamchajak.

⁴³ Ang le sabo, ani Subraini buma se ano naina ma phai kha?

⁴⁴ Nwng khulum kha hwnmani kókno ang khna kheno ani okni chwrai tongthokjagwi bársa kha.

⁴⁵ Subrai samani abo nang phainai hwnwi poito thángma bagwi nwng hamchajak.”

Mariamni lobmung

⁴⁶ Mariam hai hwnwi sa kha, “Ani khápang Subraino kotor hwnwi lobo,

⁴⁷ ani phola ani Kaitor ano mwthangnaisani thani tongthogo,

⁴⁸ tamni hwn khe bini selengjwk kotoino bo nai ja kha; hakhe tabukni simi bebak borok ano hamchajak hwn anw;

⁴⁹ tamni hwn khe Kwplaisa Kaitor ani bagwi khlai kha samung kotor; kwthar bini mung.

⁵⁰ Bono kirinai bebak borokno maya chá-o bo kusung kusungo.

⁵¹ Bo bini yaktwkni phanno phunuk kha; kung chuknairokno khlai-o oroi-poroi sukurugwi rw-o bórokni bwkha chapmarok.

⁵² Kwplairokno achukthayung keple rw-o, phiya kechen kotoirokno kuchugo tisa-o;

⁵³ bo ok khuijakrokno chámung kaham bai ok supungo, phiya gwnangrokno yak bukcha khe rohoro.

⁵⁴ Bo bini seleng Israilno chuba kha, bo khairokna pok ya,

⁵⁵ Abraham bai bini bosongno maya cháui maya chá kha mol brúm, bo kók rwma tẃi.”

⁵⁶ Mariam nokha taltham ká twtwi Elisabet bai tongwi nogo kiphilwi tháng kha.

Baptisma rwnai Johon achaimani

⁵⁷ Jora sók phai khe Elisabet chwla bwsa khoroksa bá kha.

⁵⁸ Subrai bono khairokjak kha hwnwi khnaui noksa-nok-ari tei sandai-masakrok bo bai baksa tongthokjak bai kha.

⁵⁹ Salcharni salo a chwraino sakur rana hwnwi bórok phai bai kha tei buphani bumungno rwksaui bórok bono Sakaria hwnwi mung pharna nai kha.

⁶⁰ Aphuru khe buma hai hwnwi sa kha, “I’nhi! bini bumung Johon se pharjaknai.”

⁶¹ Bórok hai hwnwi sa kha, “Nini sandai-masakni bisingo khoroksani hano omo tẃi bumung kwrwi.”

⁶² Hakhe tamo mung pharna muchung hwnwi bórok buphano yak tail khe sẃng lai kha.

⁶³ Hakhe bo swijaknai manwi sanwi, “Bini bumung Johon,” hwnwi swi kha tei abono nugwi bórok bebak’-no uanajak bai kha.

⁶⁴ Aphuruno Sakariani búkhúk kók pasa phi kha, bo kók saui man phi kha, hakhe Kaitorno lob kha.

⁶⁵ Gana-gini tongnairok bebak’-no kirijak lai kha. Hakhe o wngmarok Judiani hathái kami brúm brúm pírjak kha.

⁶⁶ Omono khnanairok bebak’-no uanajak laiwi hai hwnwi sa lai kha, “O chwrai ba ulo twmabo wng langno?” Tamni hwn khe bini thani Subraini phan kubui’-no tongo.

Sakaria samani

⁶⁷ Aphuru Sakaria Phola Kwthar bai kolobjagwi hai hwnwi swkang baira sa kha:

⁶⁸ “Israilni Kaitor, Subraino lob di! Bo bini bororokno naikhlaiwi phiyógwi rw phai kha.

⁶⁹ Bini seleng Daudni bosongo bo chini bagwi mwthangnaisa kwplai khoroksa bacha rw kha,

⁷⁰ agi phuru diyari kwtharrokni khúk tẃi bo omono sa kha,

⁷¹ chini kena arirokni yakni tei chwngno naislernairokni yakni bo chwngno phiyóknai.

⁷² Bini swmai kwtharno muitu khlaiwi chini chuchusongno maya chánai hwnwi bo sa kha.

^73-75 bo chini bosong Abrahamno swmai tangwi kók rwjak chwng kirima kwrwi khe bono monwi tongwi manna bagwi bo chwngno chini kebengnai arirokni yakni phiyók kha, kwthar khe sói khe chini langma tong sak bono monwi man thung hwnwi bo abo hai khlai kha.

⁷⁶ Chwlasa, nwng Kaitor Kotorni diyari hwnjak anw; tamni hwn ba Subraini lama snamna bagwi nwng swkang baira tháng anw;

⁷⁷ sumsok nakarjakma bai mwthangjak anw hwnwi nwng bini bororokno saui man rw anw.

⁷⁸ Chini Kaitor maya cháui khairokma bagwi bo mwthangnai salno chini saka kasa rw anw,

⁷⁹ mwnakma tei thwinani lama mwnakjago tongnairokno thwinani lama mwnakjago tongnairokno bo a sal bai pohor khlai hor anw.”

⁸⁰ Chwrai torwi-logwi siui-nugui phai rwrwgo tei Israilrokni thani nukjaknani mol phai ya sak bo hasing panthoro tongwi kha.