LOBMUNG 96 - Kok Borok (Re-edited) Bible (BSI)

Kaitor se kuchuk kuk bugra

¹ Norok, Subraiyungni thani rwchapmung kwtal rwchap di; bebak ha Subraiyungni thani rwchap di.

² Subraiyungni thani rwchap di, bini mungno hambai rw di; sal brúm bini mwthangmano sa di.

³ Dopharokni thani bini chẃngsachano sakhlai di, bebak borokni thani bini uanamasingcha samungrokno pír di.

⁴ Tamoni hwn ba Subraiyung wng kha kotor tei belai khe lobjak thai; bono mwtairokni slái bórom khlaijakthai.

⁵ Tamoni hwn ba borokni mwtairok le takjak mang simi se, tamo khe Subraiyung se nokhayungrokno snamnaisa.

⁶ Bórom bai suar bini bwskango; phan bai naithokma bini háyá-o.

⁷ O dopharokni bosongrok, phan bai suar Subraiyungni se hwnwi si di.

⁸ Subraiyung bini mungni jarwi chẃngsacha, abono si di; yapharmung tubu-ui bini nokhla-o phai di.

⁹ Kwthar naithokma tẃiwi Subraiyungno khulum di; ha sakani bebak bororok bini bwskango kwlwibra di.

¹⁰ Dopharokni thani hai hwnwi sa di, “Subraiyung se bugra! o swngchar songchajak kha; abo tei ninang glak. Bo bororokno sói baksa khe buj thumnai.”

¹¹ Nokharok bwkha srang thung, harok tongthok thung; twijlangrok tei aro tongnairok sokrom lai thung;

¹² kheto tei kheto tongnairok bwkha srang thung. Hakhe bolongni bebak buphangrok tongthogwi rwchap anw

¹³ Subraiyungni bwskango; tamni hwn ba bo swngcharno buj thumnani phaiwi tongo. Bo hano sói baksa khe tei kubui bai buj thumnai.