LOBMUNG 95 - Kok Borok (Re-edited) Bible (BSI)

Lobwi rwchapmani

¹ Phai di chwng Subraiyungni thani rwchap lai anw; chini mwthangnaisa holongthaino tongthogwi chirik lai anw!

² Hambai rwma bai khe bini thani tháng lainai; phai di lobmung rwchapmung bai khe bini thani tongthogwi chirik lainai!

³ Tamoni hwn ba Subraiyung khe Kaitor kotor, tei bebak mwtairokni slái kotor bugra.

⁴ Bini yapha’-ono hani kuthukrok; hathái kuchukrokbo bini yapha’-ono.

⁵ Twijlangni bubagra bo se, tamni hwn ba bono abono snamo, tei bini yak bai snammani hakung habo bini se.

⁶ Phai di chwng baju lai anw, khorok bom lai anw, chwngno Snamnaisa Subraiyungni thani yáskú sung lai anw!

⁷ Bo chini Kaitor, chwng khe bini mwrwkma borok tei bini yakni mera se. Tumung tini norok bini khorang khnaui tong khe!

⁸ Masani hasinglwngni Meriba-o bwkha rak rw tẃi khe norokni bwkhano ta rak rw si di,

⁹ bórok ani samungrok nuk phano aphuru nuchusong ano amjok kha, tei potali kha, ani samungrok nai lai kha.

¹⁰ Nokha bisi brwichi ang bórokno tẃi ang joli kha tei hai hwnwi hwn kha, “O bororokni bwkha lama korójak, bórok ani lamano sak nang li ya gwja.”

¹¹ Aboni bagwi ang joliui “bórok ani lengma-o hap glak” hwnwi bati rw kha.