LOBMUNG 92 - Kok Borok (Re-edited) Bible (BSI)

¹ Subraiyungno hambai rwmani le kaham, nini mungno lobwi rwchapma kaham o kuchuk kuksa;

² nini pái phlai ya hamjakmano phung aidrobo sa khlainani horo khe nini kók narwkma kókno sakhlainani kaham,

³ chongpreng tei khnathokma donidong-dorong tamwi.

⁴ Tamoni hwn ba Subraiyung, nini samung bai nwng ani bwkha srang rw kha; nini yakni samungrokno ang tongthogwi rwchapnai.

⁵ O Subraiyung, nini samungrok bwswk se kotor! nini uansukmarok belai kuthuk!

⁶ natharok abono saui man ya, borok butua abono romwi man ya:

⁷ borok hamyarok sam bumuk per tẃi persa phano samung hamya tangnairok hamcha phano mol brúmni bagwi komor phlainai,

⁸ tamo khe o Subraiyung nwng le chukphlaino tongnai.

⁹ Tamoni hwn ba o Subraiyung nini arirok komornai; joto samung hamya tangnairok pisa-piring wngnai.

¹⁰ Tamo khe nwng ani bokorongno mothwna bokorong hai khe loksa rw kha; ani saka thok kwtal lu kha.

¹¹ Ani mokol bai ani arirok manjakmano nuk kha; ani khunju ano hamya khlai bachanairok manjakmano khna kha.

¹² Borok sutrang tal phang hai hamchanai, tei bo Lebanonni sidar phang hai torsanai.

¹³ Bórok Subraiyungni nogo káijak; bórok chini Kaitorni nokhla-o torsa-o.

¹⁴ Buphang rá phano bórok bwthái tháinai; bórok bwtwi kupulung tei khrangji-ji wngnai,

¹⁵ Subraiyung wng kha sutrang abono phunuknai; bo ani holongthai, bini thani cha ya kwrwi.