LOBMUNG 91 - Kok Borok (Re-edited) Bible (BSI)

Chwngno kati rwnaisa Kaitor

¹ Kwplaisani saklomo tongnai, kuchuk kuksani thani tongwi tongnairok,

² Subraiyung nono hai hwnwi sanai, “Ani tongthai tei ani nok kwrak; ani Kaitorni thani ang bwkha butharjak.”

³ Tamni hwn ba bo nono khẃi-o khiklainairokni tei hamya bemukni yakni mwthangnai;

⁴ bo nono bini bwkrang bai kobolwi tonnai, bini kangkhungni saklomo nwng tongthai mannai; bini kók narwkmani abo nini phui bai sakno kati rwnai wng anw.

⁵ Horni kirimasingcha-o nwng kiri glak, salni kobonjak chakhlanobo kiri glak,

⁶ eba mwnago himgurungnai bemuk hamya eba dibor jorani sokomornainobo kiri glak.

⁷ Nini phaising sasai klaiwi mano, tei nini yagra phaising chisai klai anw, tamo khe abórok nini gana-o phai glak.

⁸ Nwng nini mokol baithang, borok hamyarok yagul sujakmano nuk anw.

⁹ Tamoni hwn ba nwng’-no Subraiyungno nini khorok bomthai khlai kha, kuchuk kuksano nini tongthai snam kha,

¹⁰ nini thani mungsa hamya sók phai glak, nini nok gana-o mungsa hamya bemukrok phai glak.

¹¹ Tamoni hwn ba bo bini suarirokno nini bagwi tholnai, nini tháng-láisu khlai thanirogo nono mwrwkna bagwi.

¹² Nini yakung holongo khu ya khlaina bagwi bórok nono yak bai khe romsanai.

¹³ Nwng singho bai bis gwnang chibukni saka-o káphigwi tháng anw, singho sikla bai chibukno yakung bai kádul anw.

¹⁴ Ano hamjaknairokno ang mwthangnai; ani mungno saui mannairokno ang kati rwui tonnai.

¹⁵ Bórok ano ring khe angbo abono khnanai; digi-sigi phuru ang bórok bai tongnai, ang bórokno phiyóknai tei bórombo rwnai.

¹⁶ Umor kolok rwui ang bórokno bwkha kochom rwnai, tei ani mwthangmano bórokno phunuknai. Sabat salni rwchapmung