LOBMUNG 9 - Kok Borok (Re-edited) Bible (BSI)

¹ Ang ani bwkha rw súgwi Subraiyungno hambai rwnai; nini bebak uanamasingcha samung khlaimarokno sanai.

² Nini thani ang khápang srangwi tongthoknai; Ang nini mungno lobwi rwchapnai o Kuchukni Kuchuksa.

³ Ani arirok uphilwi tháng phuru, nini bwskango bórok thutaiwi-o tei komoro.

⁴ Nwng buj thum phuru ani kaham khlai kha; achukthayungo achugwi sói khe buj thumo.

⁵ Nwng dopharokno kul kha, borok hamyarokno nwng sokomor kha; mol brúmni bagwi bórokni mungno nwng hu-ui khibi kha.

⁶ Kebengnai arirok komor súk kha; nwng bórokni kamiyungrokno swbai bai kha; bórokni mukumurok suda bórok bai baksa komor kha.

⁷ Tamo khe Subraiyung le mol brúmno bubagra wngwi tongnai; buj thumna bagwi bo bini achukthayungno tono.

⁸ Bo sutrang bai o swngcharni buj thumo; bo sói sói khe lukurokno buj thumnai.

⁹ Subraiyung se kusupjakrokni katijaknai nok kwrak, digi-sigi nang phuru mwthangnai.

¹⁰ Nini mungo sinairok tei nono bwkha beranairok, nwng le o Subraiyung, nono naituknairokno yakar ya.

¹¹ O Siyono tongnairok Subraiyungno lobwi rwchap di. Lukurokni thani bini samungrokno sakhlai di.

¹² Tamoni hwn ba thẃi kochok rwnairokno yagul sunaisa bórokno pok ya; bo birman nangjakrokni kapmano pok ya.

¹³ O Subraiyung ano khairok ja di, ano naislernairok ano bwswk khe sátok naisik ja di; nwng simi se ano kwthwilamni tisaui tubunai,

¹⁴ hakhe se ang Siyonni sajwkni duglamo nono lobsaui saui mannai, nini mwthangmano tẃiwi tongthogwi mannai.

¹⁵ Dopharok bórokni yak bai khurmani hakhoro kwlwk bai kha; bórok huiwi swngmani a chei-o’-no bórokni yakung kwcha bai kha.

¹⁶ Subraiyung sakno sini rw kha, bo buj thumna samung khlai kha; borok hamyarokno bórok tangmani samung hamya bai khe khẃi-o kwcha rwnai. Higaion. Sela

¹⁷ Borok hamyarok kwthwirokni ha-o ma thángnai, Kaitorno poknai dopharokbo ma thángnai.

¹⁸ Bigrarok pokjak phlai máng tong glak, kwrwirokni khatungmabo haino komorwi tháng phlai glak.

¹⁹ O Subraiyung bacha di! borok le nono sak nangjak ya ta wng thung; nini bwskango dopharok buj thumjak thung.

²⁰ O Subraiyung bórokno kirima-o khiklai di; dopharok bórok borok sengla se hwnwi saui man thung. Sela