LOBMUNG 89 - Kok Borok (Re-edited) Bible (BSI)

¹ Ang mol brúm brúm Subraiyungni pái phlai ya hamjakmano tẃi rwchapnai; ani búkhúk bai nwng piri piri-o kók narwkma-o saui khna rwnai.

² Ang nini tong phlainai pái phlai ya hamjakmano sakhlainai; nwng kók narwkmani abo nokharok hai tong phlai-o.

³ Nwng hai hwnwi sa-o, “Ang ani chongjak borokno swmai rw kha, ang ani seleng Daudno swmai tangwi kók rw kha:

⁴ ‘Ang nini bosongno mol brúmni songchanai tei nini achukthayungno piri-pirini bagwi khlainai.’ ” Sela

⁵ Chuknoha nini uanamasingchano lobo, o Subraiyung nini kók narwknairokni motha-o nini suarirokni palo nono lobo.

⁶ Nokha-o sabo bai Subraiyungno su thotok tong? chuknohani phankrakrokni bere sabo Subraiyung bai baksa tong?

⁷ Kaitorno kirinairokni bodol kwtharrokni motha-o, bini yang ayang tongnairokni slái kotor tei kirimasingcha bo hai sabo tong?

⁸ O sengkrak suarirokni Kaitor, Subraiyung, o Subraiyung sabo nwng hai phan gwnang tong? Nini kók narwkma nono kitingjak.

⁹ Nwng se twijlang kutuksaui aphal kasamano kók khna rwui tongo; aro twi aphal ka phurubo nwng’-no kwchang kwchang wng rw-o.

¹⁰ Nwng’-no Rahabno sukhrubwi mal kwthwirok bai baksa khlai kha; nwng nini phankrak yak bai nini kebengnai arirokno pisa-piring khlai kha.

¹¹ Nokharokbo nini se, habo nini’-no; swngchar tei swngcharo tong-kwrwi manwino nwng’-no snamo.

¹² Salsibai tei salgrabaino nwng se snamo; Tabor bai Harmon nini mungwi tongthogwi lobsa-o.

¹³ Nini yaktwk kwrak; nini yakbo kwrak, nini yagra yak le kuchuk.

¹⁴ Kaham bai bujsói se nini achukthaini yaphang; pái phlai ya hamjakma bai kubui khe kók narwkmani nini bwskang bwskang.

¹⁵ A tongthokni chirikma khorang saui mannairok hamchajak, O Subraiyung, bórok nini mwkhangni pohoro himo;

¹⁶ bórok sapung nini mung bai tongthogo, tei nini bujsóini bagwi khorang tisaui lobo.

¹⁷ Tamoni hwn ba nwng se bórokni phanni tei chẃngsacha; nini bwkha phurma bai chini phanni bokorong chuksa-o.

¹⁸ Tamoni hwn ba chini phui le Subraiyungni se, chini bugra khe Israilni Kwtharsa.

Kaitor Daudno swmai rwmani

¹⁹ Salsa nwng nini kók khnaui tongnairokno imang mukthang khe kók sa kha, nwng hai hwnwi sa kha: “Ang phan gwnangsano motok kaisa rw kha, ang borok bánglarokni bisingni bono kuchugo tisa kha.

²⁰ Ang ani seleng Daudno naitugwi man kha; ani thok kwthar bai ang bono chong kha;

²¹ ani yak bo bai tong phlainai; ani yakbo bono phan rwnai.

²² Kebengnai arirok bono mechen phaiwi man glak, borok hamyarok bono bom rwui man glak.

²³ Ang bini kebengnai arirokno bini bwskango’-no kákhrupnai tei bono naislernairokno kosonwi swpraknai.

²⁴ Ani kók narwkma bai pái phlai ya hamjakma bo bai tongnai; tei ani mung bai bini phanni bokorong chuksanai.

²⁵ Ang bini yakno twijlango tonnai tei bini yagra yakno twimarokni saka-o tonnai.

²⁶ Bo ano kabwi, ‘Nwng’-no ani apha, ani Kaitor, ani mwthangnai holongthai!’ hwnwi hwnnai.

²⁷ Ang bono swkang sakra khlainai, hani bugrarokni slái kuchuk khlainai.

²⁸ Mol brúmni bagwi ang bono pái phlai ya hamjakma bai khe hamjagwi tongnai tei ani swmai bo bai kwrak khe tongnai.

²⁹ Ang bini bosongno ang narwk phlainai, tei bini achukthayungno nokharok tong sak tonnai.

³⁰ Tumung bini bwsarok ani kerongno khibi khe tei ani dagi tẃi tong ya hwn khe,

³¹ tumung bórok ani raida swbaiwi, ani dagimarokno rákhok ya hwn khe,

³² hakhe ang bórokni samung hamyani bagwi raidang bai swpraknai tei kók khna ya wngma bagwi bórokno bunai;

³³ phiya ba ang ani pái phlai ya hamjakmano bini aroni rosa glak, tei ang kók narwk yabo wng glak.

³⁴ Ang ani swmaino swbai glak, eba ani khukni kókbo phér glak.

³⁵ Ang ani kwthar bai uáisa swmai tang kha; ang Daudno tatal sa glak.

³⁶ Bini bosong mol brúm tongnai tei bini achukthayung ani bwskango sal hai wngwi tongnai.

³⁷ Abo tal hai mol brúmni bagwi songchajaknai, tei nokha-o mukumu wngwi tongnai.” Sela

Habugra mechenjakma bagwi kapmani

³⁸ Tamo khe nwng tabuk bono yakarwi khibi kha; nwng nini chongjakno jolijak súk kha.

³⁹ Nwng nini seleng bai swmai tangmano khibi kha; nwng bini motokno hadlwi-o khiklaiwi sitra rw kha.

⁴⁰ Nwng bini chokdeualrokno swbai kha; bini katijaknai nok kwrakrokno swbai kha.

⁴¹ Lama tẃi láinairok bini manwino sek kha; bo bini nok arirokni thani mwnwimung wng kha.

⁴² Nwng bini kebengnai arirokni yagra yakno tisa kha; bini bebak kebengnai arirokno tongthok rw kha.

⁴³ Nwng bini sengni buano philwi rw kha, tei choba-o nwng bono chuba li ya.

⁴⁴ Nwng bini yakni bugrani dagijaknai raidangno naui pái kha, tei bini achukthayungno ha-o khiklai kha.

⁴⁵ Nwng bini siklani salno bara rw kha; nwng bono lachimung bai kholop kha. Sela

Yókna bagwi surimani

⁴⁶ O Subraiyung tei bwswk? nwngba huijak phlai da tong sinai? Nini jolima tei bwswk hór hai khe chẃng sinai?

⁴⁷ Jora bwswk se kisicha, omono muitu khlai ja di tamni hwn ba chúkma kwrwi khe nwng borokno snam kha!

⁴⁸ Swba se thwina nang ya khe tong phlai mannai? Sabo ba hakhorni phanni yógwi mannai? Sela

⁴⁹ Subraiyung, nini kók narwkmung bai Daudno swmai rwmani swkangni nini a pái phlai ya hamjakmungrok biyang?

⁵⁰ O Subraiyung, nini selengsa bwswk khe sitra rwjak kha nai di; bororok ano thesra kari laimano bahai khe ang bwkha-o chu-ui tong kha,

⁵¹ o Subraiyung nini kebengnai arirok hamya sa lai kha, bórok nwng bai chongthar chongjakno thesra kari lai-o.

⁵² Subraiyung mol brúmno hamchajak. Amen tei Amen. Kaitorni borok Musini surimung