LOBMUNG 88 - Kok Borok (Re-edited) Bible (BSI)

Chubamung sanwi kapmani

Kurani bwsarokni rwchapmung; Ejrahini Hemanni kóklob

¹ O Subraiyung, ano mwthangnai Kaitor, ang hor-sal nini thani kabo;

² ani surima nini thani sók phai thung; ani kapmano khunju kai ja di.

³ Ani bwkha le dukhu kupulung, ani langma kwthwi hakhor gana-o seder kha.

⁴ Ang hakhoro thángnairok bai baksa lekhajak kha; ang, chubajak ya borok bai baksa wng kha,

⁵ kwthwirokni bisingo butharwi hakhoro tonjak hai, nwng bai tei muitu khlaijak li yarok hai, tamni hwn ba bórok nini yak bai kakjak.

⁶ Nwng ano hakhor kuthugo ton kha, mwnak tei kuthukma-o ton kha.

⁷ Nini jolima ani saka-o hilikma khe klai kha, nini bebak aphal bai nwng ano sátok kha. Sela

⁸ Nwng ani sandai masarokno ang bai chal rw kha; nwng ano bórokni thani kirimasingcha khlai kha. Ang khajagwi berebwi tonjak kha yóknani lama kwrwi kha;

⁹ dukhu nangwi ani mokol mwnakse-mwnakse wng kha. O Subraiyung ang nono sal brúmno ringo; ang nini thani ani yak suhor ja-o.

¹⁰ Kwthwirokni bagwi nwng soidomni samung da phunukno? Kwthwirok bachaui nono lo de lobno? Sela

¹¹ Nini hamjakmano mangkhoro da sakhlai laino, eba nini komor thani da nini kahamno sano?

¹² Mwnago da nini uanamasingcha da sijakno, eba pogwi thángma ha-o da chubaui mwthangma sijakno?

¹³ Tamo khe o Subraiyung, ang nini thani kap ja-o; phung aidrobo ani surima nini thani phai-o.

¹⁴ O Subraiyung, nwng ano tamoni khibi lang? Tamoni ani oroni mwkhang uphil lang?

¹⁵ Chwrai phuruni simi ang thwi twtwi wngwi lengprojak, Ang nono kiriui sátokmung manjak súk kha; ang lengpro súk kha.

¹⁶ Nini jolima ani saka tẃi lái tháng kha; nini kirimasingcha khe swprakma bai ano sokomor laha.

¹⁷ Abórok sal brúmno twi kotor hai khe ano kitingwi tong kha; bebak babai tẃi ani phaising sederwi phai kha.

¹⁸ Nwng, ani kichingsong tei nok arini bororokno ang bai chal rw kha; ani palrok mwnago se tong bai si-o. Ejrahisa Ethonni kóklob