LOBMUNG 86 - Kok Borok (Re-edited) Bible (BSI)

¹ O Subraiyung, khunju kai di, ani kók khna ja di, tamni hwn ba ang le basra bigra ja se.

² Ani langmano mwthang ja di, tamni hwn ba ang nono khulumui tong ja-o; nono bwkha beranaino nini selengno mwthang ja di. Nwng se ani Kaitor;

³ o Subraiyung ano khairok ja di, tamni hwn ba nini thani simi se ang kabwi ring ja-o.

⁴ Nini selengni bwkhano tongthok rw ja di, o Subraiyung ang ani bwkhano nini thani bera ja-o.

⁵ O Subraiyung nwng wng kha kaham tei nakarnai tei nwng nono ringnairokno pái phlai ya hamjakma bai hamjak phlai tongnaisa.

⁶ O Subraiyung, ani surimano khunju kai ja di; ang koi samano khna ja di.

⁷ Ani digi-sigini jora-o ang nono ring kha, tamni hwn ba nwng ani sanmano khna-o.

⁸ Mwtairokni bisingo nwng hai khoroksa phano kwrwi, o Subraiyung bórokni samungbo nini bai baksa wng ya.

⁹ O Subraiyung nwng snammani bebak dopharok nini thani phaiwi ma khulum phai anw, tei nini mungno chẃngsacha khe ma lob phai bai anw.

¹⁰ Tamoni hwn ba nwng wng kha kotor, tei uanamasingcha samungrok khlai-o; nwng simi se Kaitor.

¹¹ O Subraiyung, nini lamano tẃiwi ano phrwng di; hakhe ang nini kubui-o himwi mannai; ano bwkha kwrak khe tongwi nini mungno bórom khlaiwi tongnani phrwng ja di.

¹² O Subraiyung ani Kaitor, ang nono bwkha rw súgwi hambai rwnai, tei nini mungno mol brúmno chẃngsacha khlainai.

¹³ Tamoni hwn ba nwng ano nini pái phlai ya hamjakmung bai belai khe hamjak kha; nwng ani pholano mwnak hakhor kuthukni phiyók kha.

¹⁴ O Kaitor, kung chuknairok ani hamya khlainani bacha lai kha; borok themrang bodolrok ano butharna ampa lai kha, bórok nono bwskango tẃi ya gwja.

¹⁵ Tamo khe o Kaitor, nwng le bwkha kolok tei khairoknaisa tei doui joli ya, tei pái phlai ya hamjakma bai kubui kupulung.

¹⁶ Ani bwkhak uphilwi ano khairokja phi di; nini selengno phan rw ja di; nono monnai selengjwkni bwsano mwthang ja di.

¹⁷ Ano nini khá súkmani mari phunuk ja di, hakhe ano naislernairok abono nugwi ma lachi thung, tamni hwn ba Subraiyung nwng se ano chubaui phai-o tei bwkha kwchang rw-o. Daudni surimung