LOBMUNG 83 - Kok Borok (Re-edited) Bible (BSI)

¹ O Kaitor, siring-siring khe ta tong ja di; kwchang-kwchang khe siringcha wngwi ta tong di, o Kaitor!

² Nai di nini kebengnai arirok golok-golok wng lai tong kha; nono naislernairok khorok tisa lai kha.

³ Bórok nini bororokni bagwi hamya chap lai-o; nwng kati rwui tonma borokno tẃi bórok pal khe kókbiti khol lai-o.

⁴ “Phai di chwng bórokni dophano hu-ui sokomor pái lainai; Israilni mungno tei muitu wngwi man ya wngna tẃi khe pái rwui páinai,” hwnwi bórok sa lai kha.

⁵ Bórok kók baksa khe chap lai kha; nono kebengwi swmai tang lai kha

⁶ Idom tei Ismaelsarok, Moab tei Hagrisarok,

⁷ Gebal, Ammon tei Amalek, hani bororok bai Philistiarok bórok bai thansa wng kha.

⁸ Asiriyasongbo bórok bai kwrwng lai kha, bórok Lotni bwsarokni phan wng bai kha.

⁹ Kison twima-o Midiansongno nwng khlai tẃi, Sisera bai Jabinnobo ahai’-no khlai di,

¹⁰ bórok En-doro ma komor kha, tei bórok hani phas hai ma wng kha.

¹¹ Bórokni bokhorokrokno Oreb bai Jib hai, tei bórokni naikini khlainairokno khe Jeba tei Jalmuna hai khlai di,

¹² Bórok hai hwnwi hwn lai kha, “Phai di chwng Kaitorni hapharno chini snam lai anw.”

¹³ O ani Kaitor, bórokno kitingjak bangkundri hai khlai di, nokbaro kobonjak chwkap hai khlai di.

¹⁴ Bolongo hór kham tẃi khe, hathái-o hór bacha tẃi khe,

¹⁵ nwng bórokno nini nokbar bai riphrigwi nini bangkundri bai sikiri di.

¹⁶ Bórokni mwkhang lachimung bai supung di, o Subraiyung hakhe bórok nini mungno ma naituk anw.

¹⁷ Bórok mol brúmni bagwi ma lachiui ma sundru thung; bórok lachimasingcha khe ma komor lang thung.

¹⁸ Nini mung simi se Subraiyung, o ha sakani Kuchuk kuksa hwnwi bórok saui man thung. Kurani bwsarokni rwchapmung