LOBMUNG 81 - Kok Borok (Re-edited) Bible (BSI)

¹ Chini phan, Kaitorno sotonwi rwchabwi lob di; tongthogwi chirigwi Jakobni Kaitorno lob di.

² Rwchapmung tisa di, kham lapsa tam di, donidong-dorong bai khe khnathok chongpreng tam di.

³ Tal thwichon bai tal nuksonni chini ter phuru totro tam di.

⁴ Abono Israilrokni raida tei Jakobni Kaitorni kerong.

⁵ Bo kebengwi ha Ijipno sátokna ongkhor phuru, bo Josepni bosongno omono dagi kha. Ang swkango khna ya kho abo tẃi khorang kaisa khna kha:

⁶ “Ang nini phairukungni pojano heleng rw kha; nini yakrok ura ma tẃinani yók kha.

⁷ Nwng digi-sigi phuru ano ring kha, hakhe ang nono phiyók kha; ang nono phirang bai khe kók sa kha; Meribani twi-o nono amjok kha. Sela

⁸ O ani borokrok, ang norokno ragdama khlai phuru khna di; o Israil nwng ani kókno khunju kan di.

⁹ Norokni thani buini mwtai ta tong thung; norok phatarsarokni mwtainobo ta khulum di.

¹⁰ Ang se Subraiyung nini Kaitor, nono ha Ijipni tikhlai tubunai. Nwng kuar khe khua di ang abono supung anw.

¹¹ “Tamo khe ani bororok ani khorangno khna li ya; Israil ani thani bomwi tong li ya.

¹² Aboni bagwi ang bórokno bórokni bwkha kwthwng khe bórok muchung tẃi tei bwkha thol tẃi’-no ton rw kha,

¹³ o ani bororok ani kókno khna khe, Israil ani lama-o himma te!

¹⁴ Hakhe ang bórokni kebengnai arirokno daktino bom rw kha mun, tei bórokni hamya nainairokni bwkhak ani yak koson kha mun.

¹⁵ Subraiyungno naislernairok bórok bini bwskango ma kwlwibranai tei bórok mol brúmni bagwi komor phlainai.

¹⁶ Ang nono chámung kaham kukno chá rwnai tei holongthaini piya bwtwi bai nono bwkha kochom rwnai.” Asapni rwchapmung