LOBMUNG 78 - Kok Borok (Re-edited) Bible (BSI)

¹ O ani bororok ani phrwngmarokno khunju kai di; ani khukni kókrokno khunju kan di.

² Rwngthoma bai ani khúk kiyoknai; ang yaphangni kók huijakrokno sanai,

³ chwng abórokno chini chuchu song bai sajagwi khwbo khna kha sauibo man kha.

⁴ Chwng abórokno bwsarokni thani huiwi ton glak; chini ulni bosongrokni thani Subraiyungni chẃngsacha samungrokno, bini phanno tei bini uanamasingcha samung tangmarokno sanai.

⁵ Bo Jakobni bisingo dagimung dagi kha, tei Israilrokni bisingo kerong rw kha, bo abono chini chuchusongno bórokni bwsarokno phrwngna bagwi saui klang kha;

⁶ hakhe ulni bosongrok abórokno tei bórokni achai ya kho bwsarokno saui manna tẃi tei bórok bwsaroknobo saui khna rwui man phina tẃi.

⁷ hakhe bórok Kaitorno khatungwi mannai tei Kaitorni samungrokno pok yaui bini dagimungrokno narwgwi manna tẃi;

⁸ hakhe bórok bórokni chuchusong hai kók khna ya tongwi gwdna kwrak tei kebengwi bachanai bosong wngwi bwkha beraui tongwi man ya bosong wngwi Kaitorni kók khnaui tong ya wng ya tẃi.

⁹ Ephraimsarok chakhlarok tẃiwi chobani salo uslu-ui khár kha.

¹⁰ Bórok Kaitorni swmaino narwk li ya, tamo khe bini kerongno tẃina se gosi ya wng si-o.

¹¹ Bórok bini samungrokno pok kha tei bórokno uanamasingcha samung phunukmarokno pok kha.

¹² Ha Ijibo tei Joanni panthorrogo bórokni chuchusongni bwskango bo uanamasingcha samungrok khlai kha.

¹³ Bo twijlangno khaknwi khe khagwi bórokno abo tẃi lái rw kha, bo bórokni babainwi-o a twirokno chokdeual hai khe thesa rwui ton kha.

¹⁴ Bo salo khe bórokno chumui bai tei horo hopung khe hórjlai bai khe tẃither kha.

¹⁵ Bo hasinglwngo holong pekhak rwui bórokno twi kuthukni twi khan rw tẃi khe khan rw kha.

¹⁶ Bo holongdapni twikhereng achai rw kha tei twimani twi yor tẃi khe yor rw kha.

¹⁷ Hai phano bórok teibo bono kebengwi kuchuk kuksano kebengwi hasinglwngo kebengsaui sumsok khlai kha.

¹⁸ Bórok kháni muchung tẃi chámung san laiwi Kaitorno chánai lai kha.

¹⁹ Bórok Kaitorno hai hwnwi saui hamya hwn lai kha; “Kaitor chwngno hasinglwngo chámung da rwui man langno?

²⁰ Nai di bo holongdapno tok phano, twimuk yor khlaisaui phai kha, twima boui phai kha, bo bini borokno chámung tei muihan chá-rwui de manno?”

²¹ Aboni bagwi Subraiyung abono khnaui jolijak kha; Jakobno joliui hór wng kha, Israilrokno jolijagwi thamchi kajak kha,

²² tamni hwn ba, bórok Kaitorno poito khlai li ya, tei bini mwthangma-o bwkha bera li ya.

²³ Hai phano bo nokharokno dagi kha, tei nokhani duglamrokno phiyogwi rw kha;

²⁴ bórokno chá rwna bagwi mannani uatwi ua rw kha, tei bórokno chuknohani chámung bokol rw kha.

²⁵ Bororok suarirokni chámungno ma chá kha; bo bórokno supung súgwi chámung rw kha.

²⁶ Bo nokha-o salkabaini nokbar sip rw kha, tei bini suar bai bo salgrabaini nokbarno sipsa rw kha;

²⁷ bo bórokni thani muihanno hadlwi hai khe ua rw kha, bwkrang gwnang tokrokno twijlangni hasingsa hai khe lukhlai kha,

²⁸ bo abórokno bórok tongma bathamni yang ayango khiklai kha.

²⁹ Hakhe bórok chá lai kha tei ok pung lai súk kha, tamni hwn ba bo bórok naima tẃi’-no rw kha.

³⁰ Bórok chána muchungjakmano chá bai lai ya sini abo bórokni búkhúgo tongsani,

³¹ Kaitor bórokno jolijak kha, tei bo bórokni bisingni phan gwnangrokno buthar kha, tei Israilni chongjakroknobo buthar kha.

³² Omo hairok wngwi suda bórok sumsok khlaiwi’-no tong kho; bórok bini soidomni samungrokno poito khlai li ya.

³³ Aboni bagwi bo bórokni salrokno haino pái rw kha tei bórokni bisirokno sikiri-sokoro bai khe pái rw kha.

³⁴ Bo bórokno buthar khe, bórok bono rutuk lai kha; bórok bwkha kiphilwi bwkha nangjagwi naituk lai kha.

³⁵ Kaitor se bórokni holongthai tei Kaitor kotor se bórokni phiyóknaisa o kókno muitu manjak lai kha.

³⁶ Tamo khe bórok kók bai simi bono kaham hwn lai ti kha; búkhúk bai khe bono tatal sa kha.

³⁷ Bórokni bwkha bini thani kwrak khe tong li ya; bórok bini swmaino bo kaham khe tẃi li ya.

³⁸ Tamo khe bo khairoknaisa wngmani bagwi bórokni samung cha yarokno nakar kha tei bórokno sokomor li ya; uái re uái joli phuru khuktwi monok kha, tei bini bebak jolimarokno pasa rw li ya.

³⁹ Bórok bahan bwthẃi ja se, tei nokbar hai, uáisa sipsaui tháng khe tei phai phi ya, o kókno bo muitu khlai kha.

⁴⁰ Uái bwswk se bórok hasing panthoro bono kebengsa kha, tei, bwswk se hasing panthoro bono bwkha hamya wng rw kha!

⁴¹ Bórok Kaitorno amjogwi nai lai nai lai-o, tei Israilni kwtharsano dukhu phnang kha.

⁴² Bórok bini phanno bwkha-o muitu tong li ya, tei bo bórokno kebengnai arirokni yakni phiyókma salni kókrokno muitu manjak li ya gwja,

⁴³ Bo bahai khe Ijibo soidomni samung phunuk kha, tei Joan panthoro uanamasingcha samungrok tang kha abono pokjak kha.

⁴⁴ Bo bórokni twimarokno thẃi khlaiwi bórokno twi khan rw ya khlai kha.

⁴⁵ Bo bórokni aro thampuima bodol rohor kha abórok bórokno chá kha tei yonglaroknobo rohor kha abo khe bórokno sokomor kha.

⁴⁶ Bo bórokni chámung bwtháirokno yóngrokno rw kha, tei bórokni samung tangmarokno kukrokni yago yaphar kha.

⁴⁷ Bo bórokni angurrokno kothor bai bukhrai bai kha, tei mondul buphangrokno kothor kwsaprok bai buthar bai kha.

⁴⁸ Bo bórokni musukrokno kothorni yago, tei bórokni mera bodolrokno phirangrokni yago yaphar kha.

⁴⁹ Bo bórokno jolijagwi bórokni saka bini jolimani hór, tei thamchi tung súgwi sokomornai suarirokno rohor kha.

⁵⁰ Bo bini jolina lama khlai kha, bo bórokno ma thwimani yakni phiyók li ya, tamo khe bórokni langmano bemuk hamyani yago rw kha.

⁵¹ Bo ha Ijipni bebak bwsa okrarokno buthar kha, Hamni kainokni phan bubakrokno buthar bai kha.

⁵² Hakhe bo bini bororokno mera hai khe tẃither kha, tei mera bodol hai khe bórokno hasing panthoro béng kha.

⁵³ Bo bórokno kaham kwrwng khe tẃi kha, hakhe bórok kiri li ya; phiya ba twijlang se bórokni kebengnai arirokno swklwk si-o.

⁵⁴ Bo bórokno bini hathái kwtharo bo bini yagra yak bai segwi manma hathái-o tubu kha.

⁵⁵ Bo dopharokno bórokni bwskangni rwkhlai kha; bo bórokno bórokni manthai banta khe rw kha, tei Israilni bosongno bórokni ríni nogo ton kha.

⁵⁶ Hai phano bórok kuchuk kuk Kaitorno amjok lai kha, tei bono kebengwi bacha lai kha. Bórok bini dagimungno mokol kai li ya,

⁵⁷ tamo khe bórok bórokni chuchusong haino kók narwk yaui uslu kha, bórok badukhung kokoi mokoi hai katswi bandi kwrwng gwja.

⁵⁸ Bórok bono hathái kuchukrok bai thamchi ka rw kha; bórok tak laimani mwtairokno suriui bono risi nang rw kha.

⁵⁹ Kaitor bono khnaui jolijak kha, tei Israilno khibiui rw kha.

⁶⁰ Bo bini tongthai Silo-o, tei thwiblang borokni bisingo tongmani kainokno rwmano yakar kha,

⁶¹ tei bo bini phanno khajakma-o yaphar kha, bini chẃngsachano arini yago yaphar kha.

⁶² Bo bini bororokno sengni yago yapharwi rw kha, tei bini bororokni saka-o bini jolima klai kha.

⁶³ Bórokni siklarokno hór mwlak kha, tei bórokni sajwksongrokni káilai pandani rwchapmung rwchapjak li ya.

⁶⁴ Ochairok seng bai tantharjak bai kha, tei bórokni bihiksong kap lai li ya.

⁶⁵ Aphuru khe Subraiyung thuma sicha kha, angur bwtwi nungwi chiriknai phan gwnang hai khe chirik kha.

⁶⁶ Bo bini kebengnai arirokno uslu rw kha; bo bórokno mol brúmni bagwi mwnwimung khlai kha.

⁶⁷ Bo Josepni kainoknobo khibi kha, bo Iphraimni bosongno chong li ya;

⁶⁸ tamo khe bo Judani bosongno chong kha, bo hamjakmani Siyon hatháino chong kha.

⁶⁹ Bo bini nokha kuchuk hai khe bini háyáno snam kha, bo abono swngchar hai khe mol brúmni bagwi snam kha.

⁷⁰ o bini seleng Daudno chong kha, tei bono mera gutrokni na kha;

⁷¹ Bo dut rwnai mera bwrwirokno naikolwi tongma bisingni bono bini borokrokno Jakob tei bini bosong Israilni borokno naikini khlaina tubu kha.

⁷² Bo bórokno bwkha kaham bai mwrwk kha, tei bini yakni rwngmung bai khe naikini khlai kha. Asapni rwchapmung