LOBMUNG 77 - Kok Borok (Re-edited) Bible (BSI)

¹ Bo khna thung hwnwi ang chirigwi Kaitorni thani kap kha, ang chirigwi Kaitorni thani kap kha, Kaitorni thani chirigwi kap kha.

² Digi-sigi phuru ang Subraiyungno naituk kha; horo ang lengpro yaui yak pholok kha. ani bwkha khakchangna lon li ya.

³ Ang Kaitorno tẃi uansuk kha tei kengai kha; uansuk te uansuk te tei ani bwkha lengprosa-o. Sela

⁴ Nwng ani mokolno kiyok rwui tono; ang birmano klai kha kók suda saui man li ya.

⁵ Lái thángnai salrokno tei bisirokno tẃi ang uansugwi nai-o.

⁶ Ang ani horni rwchapmungrokno muitu khe nai-o; khá bisingo uansugwi nai-o; ang kaichomwi ani bwkha bisingo hai hwnwi uansugwi nai-o:

⁷ “Subraiyung ba khi da khibi súkno? bo tei bwkha ham glak kha da?

⁸ Bini pái phlai ya hamjakma ba pa da pái súk kha? bini kók rwma nang ya da wng súgwi tháng kha?

⁹ Kaitor ba tamo khairokna da pok kha? Bo joliui bini khairokma da mwthak lang?” Sela

¹⁰ Ang hai hwnwi hwn kha, “Kaitorni yagra yak sláijagwi thángmani bagwi ang bwkha dukhu nango.”

¹¹ Ang Subraiyungni samungrokno muitu khlainai; swkango nwng soidomni samung khlaimarokno ang muitu khlainai.

¹² Ang nini joto samungrokno kaichomwi uansuknai tei nini samung kotorrokno tẃi saui tongnai

¹³ O Kaitor, nini lama le kwthar. bu mwtai se chini Kaitor swk kotor tong?

¹⁴ Nwng’-no uanamasingcha samung tangnaisa Kaitor; nwng nini samungrokno bororokni thani phunuk kha.

¹⁵ Nwng nini phankrak yak bai nini bororokno Jakob bai Josepni bwsarokno phiyók kha. Sela

¹⁶ O Kaitor twirok nono nuk kha, twirok nono nuk kha, bórok kirijak kha, twi kuthukrokbo jangrijak kha.

¹⁷ Chumuirok twi lukhlai kha, nokharok gurum kha, nini chakhlarokbo yang yang tháng bai kha.

¹⁸ Nokha-o nini phirang khorang, nokha philikma swngcharno chẃng rw kha, ha kwlwiwi jangrijak kha.

¹⁹ Nini lama twijlango, twi kotoro nini lam nini yaprirok sijak ya.

²⁰ Nwng nini bororokno Musi bai Aronni yak twi mera bodol hai khe béng kha. Asapni rwchapmung