LOBMUNG 75 - Kok Borok (Re-edited) Bible (BSI)

¹ O Kaitor, chwng nono hambai rw-o; chwng hambai rw-o; tamni hwn ba nini mung le gana’-ono. Bororok nini soidomni samungrokno sa lai-o.

² Ang chongwi tongmani jora-o khe ang sói khe buj thumnai.

³ Swngchar bai swngcharo tongnairokni tongmung raidarok bái-o, aphuru ang se aboni thonglarokno songchaui narwgo. Sela

⁴ Ang kók kotor sanairokno hai hwnwi sa kha, “Kók kotor ta sa di,” borok hamyarokno hai hwnwi hwn kha, “Nini bokorong ta tisa di;

⁵ nini bokorongno ta tisasa di, tei gwdna rak rwui kók ta sa di.”

⁶ Salkabainibo phai ya, salthángbainibo phai ya, tei hasing panthornibo kati rwna phai ya;

⁷ tamo khe buj thumnaisa le Kaitor se, bono khoroksano khe swklwgo tei khoroksano khe tisa-o.

⁸ Subraiyungni yago kaham khe dalokjak phena kajak angur bwtwini khuri tongo; bo aroni lukhlainai tei swngcharni bebak borok hamyarok abono sokorwi pái rw súk ya sak ma nungnai.

⁹ Tamo khe ang khe mol brúmno tongthoknai; ang Jakobni Kaitorno lobwi rwchapnai.

¹⁰ Ang borok hamyarokni bokorongno tansu-ui páinai, tamo khe sutrangrok khe tisajaknai. Rwchapmung twithernai bokhorokni bagwi buduk gwnang tamjaknai bai rwchapjaknai; Asapni rwchapmung