LOBMUNG 73 - Kok Borok (Re-edited) Bible (BSI)

¹ Kubui’-no, Kaitor borok kahamrokni bagwi kaham’-no, bwkha kuphurrokni bagwibo kaham.

² Tamo khe ang khe khu se khu kha mun; ani yapri bo kásle tẃi’-sa wng kha.

³ Borok hamyarok hamchaui tongma nuk khe ang kung chuknairokno nugwi músú kha.

⁴ Tamoni hwn ba bórok dukhu man yaui tongo, bórokni bwsakbo kaham tei rabo rakthoto.

⁵ Bórok bui haibo birman man ya; bui hai bemuk hamyabo manjak ya.

⁶ Aboni bagwi kung chukma bórokni kotogo kanma bwtang wngo; uálai-suk lai khe kanmung-chummung hai khe bólwi tongo.

⁷ Bórokni mokolrok kuphúngjak; bórokni bwkha-o butua muchungmarok beglai tongo.

⁸ Bórokni kógo thesra karimung bai naislerma tongo; kung chukma bagwi bórok sátokna hwnwi saui sikiri-o.

⁹ Bórok chukhano kebengwi kók sa lai-o, tei ha gwnangwi bórokni kók kotor samarok koproi kha.

¹⁰ Aboni bagwi bini bororok uphilwi thángwi bórokno lobsa-o; tei bórokni mungsa derama koróma nuk ya wngo.

¹¹ Tei bórok hai hwnwi sa lai-o, “Kaitor bahai khe saui mannai? Kuchuk kuksani thani sima da tong ba?”

¹² Borok hamyarok le ahai’-no; bórok tongthothok khe tongo, bórok gwnang wngma saka wngsa-o.

¹³ Ang ahai’-no se ani bwkhano kuphur khe tonma klai si-o, hai’-no samung hamyarok tang yaui ani yakno majra kwrwi khe tonjak si-o.

¹⁴ Sapung ang birman mano, phung aidrobo’-no ang sátokmung mano.

¹⁵ Tumung ang sana hwn khe ang ahai khe se sa kha mun, wng ya khe nwsarokno bandinai se wng kha mun.

¹⁶ Tamo khe ang abono saui manna uansuk kheno abo ano belai khe lengpro rw kha,

¹⁷ ang Kaitorni háyá-o habwi ya sak aphuru bórokni páithak nuknai.

¹⁸ Kubui’-no nwng bórokno rimi’-ono tonnai; nwng bórokno khiklaiwi komor rw-o.

¹⁹ Muphlik kaisa bai bwswk khe bórok komor kha, tei kirimasingcha khe sokomorwi khibijak kha!

²⁰ Khoroksa swk sicha kheno abórok imang hai se; bórok sicha khe abo kusubu ya wngwi pái-o.

²¹ Ani langma dukhu wng phuru, ani bwkha-o yórjak phuru

²² ang butua tei mungsa si ya tongmani; ang nini thani si ya yabrwi hai tongmani.

²³ Hai phano ang nwng bai máng tongo; nwng ani yagra yakno romwi tono.

²⁴ Nwng nini kók bai ano béngo, ulo khe nwng ano bórom bai khe yachaknai.

²⁵ Nono karwi chuknoha-o ani tei tamo tong? Tei o ha saka-o nono karwi mungsano phano ang manna muchung ya.

²⁶ Ani sak-mang tei ani bwkha se phan bái phano Kaitor se ani bwkhani phan tei ani mol brúmni manthai banta.

²⁷ Au, nwng bai hakchal wngnairok komornai; nini kók narwkyarokno nwng sokomornai.

²⁸ Phiya ba ani bagwi khe Kaitorni gana-o tongmano kaham; ang nini bebak samungrokno sanani bagwi Subraiyung Kaitorni thani ani khorok bom kha.