LOBMUNG 72 - Kok Borok (Re-edited) Bible (BSI)

¹ O Kaitor habugrano nwng nini bujsói rw di, habugrani bwslano nini kahamno rw di.

² Bo kaham bai nini bororokno tei kwrwirokno sói bai buj thumwi man thung.

³ Hatháirok bororokni bagwi hamcha thung tei hachukrokbo kahamrokni bagwi hamcha thung.

⁴ Bo basra bororokno kati rw thung tei bigrarokno mwthang thung tei kusupnairokno sukhrup thung.

⁵ Sal bai tal tong sak bo kusung kusung tong thung!

⁶ Bo sam rajak saka-o uatwi klai tẃi wng thung, ha-o uatwi klai tẃi wng thung.

⁷ Bini jora-o borok kahamrok er thung, tal kwrwi wngwi tháng ya sak bwkha kwchang kupulung wngwi tong thung.

⁸ Bo twijlang kaisani simi tei kaisa twijlang jora twima kaisani simi ha páithak jora bini yapha-o ton thung.

⁹ Bini kebengnai arirok bini thani ma bom thung tei kebengnai arirok hadlwi ma swlak thung.

¹⁰ Tarsis bai twi kwcharni harok yapharmung ma yaphar thung, Seba bai Sabani habugrarok hili tubu thung.

¹¹ Bebak habugrarok bini bwskango botok khe ma klai thung, bebak dopharok bono ma mon thung.

¹² Tamoni hwn ba basrarok kap khe, bigrarokno tei chubanai kwrwi khe bo chuba-o.

¹³ Bo kebelrokno tei bigrarokno khairokjago, tei bigrarokni langmano mwthango.

¹⁴ Bo bórokno kusupnairok tei thamchi kutungrokni yakni phiyógo; bórokni thẃi bini mokolo nang kukmani.

¹⁵ Bo ayuk kolok khe kwthang tong thung! bono Sebani rangchak rwjak thung. bini bagwi surijak máng tong thung, bini bagwi sapung hamari klai máng tong thung.

¹⁶ Ha-o mai-khul kwbángma khe tong thung; hachuk saka-o mai uaksa khárwi tong thung; abo Lebanonni bwthái hai wng thung; kamiyungni bororok hapharni samrok hai khe ersa thung.

¹⁷ Bini mung mol brúmno tong thung, abo sal tong sak bini mungbo tongwi tongnai. Ha sakani joto bororok bini tẃi hamari man thung; bórok bono hamchajak hwn thung.

¹⁸ Subraiyung, Israilni Kaitor hamchajak, bo simi se soidomni samungrok khlai-o.

¹⁹ Bini chẃngsajak mung mol brúmno hamchajak; bini chẃngsacha bai ha gwnangwi pung thung. Amen tei Amen.

²⁰ Orono Jisaini bwsla Daudni surimarok pái kha. Asapni