LOBMUNG 66 - Kok Borok (Re-edited) Bible (BSI)

¹ O bebak ha Kaitorno khorang kotor khe lob lai di;

² bini mungno chẃngsacha khlaiwi rwchap di; bono kuchuk khlaiwi lobsa di.

³ Kaitorno hai hwnwi sa di, “Nini samungrok bwswk kwmamsingcha! nini phanni bagwi nono kebengnai arirok bebakno nini thani bom bai-o.

⁴ Ha sakani bebakno nono khulumo; bórok nono lobwi rwchabo, nini mungno lobwi rwchabo.” Sela

⁵ Phai di, nai phai di Kaitor tamo khlai kha: thwiblang bororokni thani bini samung tangmarok le kwmamsingcha.

⁶ Bo twijlangno ha kwran khlai-o; bórok twima tẃi himwi lái kha. Aboni bagwi chwng aro tongthok lai kha,

⁷ bo bini suar bai mol brúm naikini khlai-o, bini mokol dopharokno naikhlai tongo kebengwi bachanairok sak-sakno ta chuk rw thung. Sela

⁸ O bororok, chini Kaitorno hambai rw di tei bono lobmano khna rw di,

⁹ bo se chini langmano mwthangwi tono, hakhe chini yaprino kásle rw glak.

¹⁰ Tamoni hwn ba o Kaitor nwng chwngno amjok kha; rangchak rukphaino hóro sógwi nai tẃi khe nai kha.

¹¹ Nwng chwngno chei-o kwcha rw kha; chini phikungo pojarok bogwi rw kha;

¹² chini bokhorok saka tẃi nwng korai khachik rw kha; chwng twi bising tẃi tei hór bising tẃi lai kha; hai phano nwng chwngno ha kahamo tubu kha.

¹³ Nini nogo ang sókmung barokmung tubu-ui hapnai; ang ani chakmano rwnai,

¹⁴ a chakmani kókrokno ang búkhúk bai sanai tei digi-sigini jora-o ang abórokno búkhúk bai sa kha.

¹⁵ Ang nini thani kuphung bupham gwnang yabrwino sógwi baroknai, abono motomsarwi sógwi baroknai; ang punrok bai baksa musuk chwlarok baroknai. Sela

¹⁶ O Kaitorno kirinairok khna phai bai di, tei bo ani bagwi tamo khlai kha nai phai di.

¹⁷ Ang bono chirigwi ring kha, hakhe bo ani rwchapmungrok bai lobjak kha.

¹⁸ Tumung ang ani bwkha-o hamyarokno chu-ui tonma tlai, Subraiyung ani kókno khunju-o kan glak kha mun.

¹⁹ Tamo khe Kaitor le khna kha, bo ani surimarokno khunju kai kha.

²⁰ Kaitor hamchajak, tamni hwn ba bo ani surimano khna ya wng li ya eba bini pái phlai ya hamjakmano ani oroni rosa li ya. Rwchapmung tẃithernaini bagwi lobwi rwchapmungrok