LOBMUNG 64 - Kok Borok (Re-edited) Bible (BSI)

¹ O Kaitor, ani khorang khna ja di, ani tentaimarokno khna ja di; ani langmano kirimasingcha khe kebengnai arirokni yakni mwthang ja di.

² Borok hamyarok bising bising hamya chap laimani yakni tei samung hamya tangnairok hamya chapmani yakni ano hui ton ja di,

³ bórok bórokni bwslaino sengrok hai khe hul lai-o, bórok kók kwkharokno badukhung bai chakhla kók tẃi khe kogo,

⁴ huijagwi naharwi bórok borok kosongrokno kogo; bórok achomsa bono kirima kwrwi khe kok lai-o.

⁵ Bórok samung hamya khlai naharwi se romwi kwcha lai tongo; bórok serek-serek khe khẃi thonna bagwi sa lai-o, tei hai hwnwi hwn lai-o, “Sabo le chwngno nuknai?

⁶ Sabo chini cha yarokno naitugwi mannai? Chwng a hamya chapmano katswi kahamma khe chap kha.” Tamni hwn ba borokni bwkha tei uansukma le belai kuthuk.

⁷ Tamo khe Kaitor bórokno chakhla bai koknai; achomsa bórok nangwi klai bainai.

⁸ Bórokni bwslaini bagwi bo bórokno komor rw anw; bono nugwi jotono kiriui kwlwibra anw.

⁹ Aphuru khe jotono ma kiri anw; Kaitor tamo khlai kha abono bórok sa lai anw tei uansuk lai anw.

¹⁰ Borok kahamrok Subraiyungni thani tongthok thung tei bini thani bokhorok bom thung. Samung kaham khlainairokni bwkha chẃngsacha wng thung. Daudni rwchapmung