LOBMUNG 59 - Kok Borok (Re-edited) Bible (BSI)

¹ O ani Kaitor, ano kebengnai arirokni yakni ano phiyók ja di; ano kebengwi bachanairokni yakni ano phiyók ja di.

² Samung hamya tangnairokni yakni ano phiyók ja di; thẃi kochok rwnairokni yakni ano phiyók ja di.

³ Bórok ano butharna ampaui huijagwi tongo; phan gwnangrok se ani hamya khlaina bagwi kuthum laijak. O Subraiyung, ang le bórokni mungsa hamya se khlai ya,

⁴ ani mungsa cha ya kwrwi twtwi se bórok khachik laiwi phai laiwi tiyar wng lai-o. Ano chubana bagwi bacha ja di. Bacha si di, naikhlai phaiwi chuba phai si di!

⁵ O Subraiyung, nwng’-no sengkrak suarirokni Kaitor, Israilni Kaitor. Tongmung sitra tongnai dopharokno sátokna bagwi bacha si di; uansukmung hamya bai khe hamya chapnairokno khoroksano phano ta khairok di. Sela

⁶ Sanja brúm brúm bórok kiphilwi phai-o tei kamiyungni yang ayang sẃirok hai khe hulok lai-o tei himgurungo.

⁷ Bórok búkhúk bai bahai golok golok wng lai nai di, khukchwini khebo seng ongkhor tẃi; “chini kókrokno khoroksa phano khna glak?” hwnwi bórok sa lai tiro.

⁸ Tamo khe o Subraiyung, nwng bórokno mwnwi-o; nwng bebak dophano naisigwi mwnwi-o.

⁹ O ani phan, ang nono naisingnai, o Kaitor nwng se ani katijaknai nok kwrak.

¹⁰ Ani khairoknai Kaitor ano pái phlai ya khe hamjakma bagwi ani thani phainai; ani Kaitor ano ani kebengnai arirok chenmano ano phunuknai.

¹¹ Bórokno ta buthar di hakhe ani bororok poknai se; o Subraiyung, chini phui, nini phan bai bórokno orondi khlai di.

¹² Bórokni khukrokni kók sumsokni bagwi, bórokni khukni kókni bagwi, bórok kung chuk laimani khẃi-o kwcha thung. bórokni swrai-mere wngma bagwi tei tatal sama bagwi,

¹³ Jolima bai khe bórokno sokomorwi pái di; katswi pái súgwi huklaiwi pái di. Aphuru khe ha sakani bebak bororok Kaitor se Jakobno bini yapha-o tono hwnwi saui mannai. Sela

¹⁴ Sanja brúm brúm bórok kiphilwi phai-o tei kamiyungni yang ayang sẃirok hai khe hulok lai-o tei himgurungo.

¹⁵ Bórok chámung naitugwi ayang-uyang himgurung lai-o, tei ok pung ya hwn khe hopung sichaui ai-o.

¹⁶ Tamo khe ang khe nini phanno lobwi rwchapnai; ang phung ai-o nini pái phlai ya hamjakmano lobwi rwchapnai. Tamoni hwn ba ani digi-sigini salo nwng ani kati rwnai tongthai wng kha.

¹⁷ O ani phan, ang nono lobwi rwchapnai, o Kaitor ano kati rwnaisa nok kwrak, Kaitor se ano bini pái phlai ya hamjakmano phunugo. Rwchapmung twithernaini bagwi Daudni rwchapmung: Aram-naharaim tei Aram-joba bai choba nang lai-o tei Joab kiphilwi phaiwi khorok 12000 Idomsarokno sómni harungo butharo, o rwchapmung a jorani