LOBMUNG 57 - Kok Borok (Re-edited) Bible (BSI)

¹ Ano khairok ja di, o Kaitor ano khairok ja di, tamni hwn ba ang nini thani khorok bom phai-o; sokomornai nokbar kotor lái ya sak ang nini kangkhung saklomo bomnai.

² Ani bagwi bini kók rwmano khlainaisa Kaitorno, Kaitor Kotorno ringnai.

³ Bo ano kuchukni chubamung rohorwi mwthangnai, ano káphrumnairokno bo lachimasingcha khlainai. Sela Kaitor bini kók narwkmung tei pái phlai ya hamjakma rohornai.

⁴ Borok choprogwi uátharnai singhorok bai ang kitingjak; olongarok chakhlarok se bini bua; sengrok khe bórokni bwslairok.

⁵ O Kaitor nwng kuchukrokni kuchugo lobjak thung. Ha gwnangwi nini chẃngsacha wng thung.

⁶ Bórok ani yaprini bagwi khẃi chak kha; bórok ani lama-o hakhor khur kha, tamo khe bórok sak-sakno aro klai bai kha. Sela

⁷ Ani bwkha katswi butharjak. Ang nono lobwi rwchapnai.

⁸ O ani bwkha sicha di! Chongpreng tei donidong-dorong sicha di! Ang aichugo bachanai.

⁹ O Kaitor ang nono lukurokni bisingo lobnai; dopharokni thani nini mungno rwchapnai.

¹⁰ Nini hamjakma nokha kuchukrokni sláibo kuchuk; nwng kók narwkmarok chumui-o phuarjago.

¹¹ O Kaitor nwng kuchukrokni kuchugo lobjak thung. Ha gwnangwi nini chẃngsacha wng thung. Daudni rwchapmung