LOBMUNG 56 - Kok Borok (Re-edited) Bible (BSI)

¹ O Kaitor ano khairok ja di, tamni hwn ba bororok ano káphrum kha; ani kebengnai arirok sapung ano sátogo;

² sapung ano kebengnai arirok ano riphrik lai-o, kwbángma’-no ang bai choba khlai-o.

³ O kwplaisa Kaitor, ang kiri phuru, nini thani bwkha beranai.

⁴ Lobnani kókthái rwnaisa Kaitorno tẃi ang lobnai; ang kiri ya; thwiblang borok ano tamo khlaiwi mannai?

⁵ Sapung bórok ano sekhrupna lama naituk lai-o; bórokni uansukmarok bebakno ani hamyani bagwi máng.

⁶ Bórok thansa khe kuthum lai-o, bórok ani yapri matheno naichom lai-o. Omo tẃi khe bórok ano buthar laina bagwi naisingwi tongo,

⁷ aboni bagwi bórokni samung hamyani bagwi bórokno yagul sú di; o Kaitor nini jolima bai bororokno khiklai bai si di!

⁸ Nwng ani dukhurokno lekhaui tono; ani muktwino nini botolo tono. Abórok nini muitu bijabo swijak kwrwi diba?

⁹ Ang nono ring phuru khe ano kebengnai arirok a salo’-no uphilwi tháng anw. Kaitor le ani bwkhak. Ang o kók si-o.

¹⁰ Kaitorno tẃiwi ang bini kókno lobo, Subraiyungno tẃiwi ang bini kókno lobo,

¹¹ Kaitorni thani ang bwkha bera kha; ang kiri glak. Thwiblang bororok ano tamo khlai mannai?

¹² O Kaitor, ang nono chagwi swmai tangmarokno khlainai; Ang nono lobmungrok yapharnai.

¹³ Ang Kaitorni langma pohoro himwi manna tẃi khe nwng ano thwinani yakni phiyók kha tei ani yakungno káslenani yakni phiyók kha, Daudni rwchapmung: Solni aroni khárwi thángwi hagurungo huijagwi phuru