LOBMUNG 55 - Kok Borok (Re-edited) Bible (BSI)

¹ O Kaitor ani surimano khunju kai ja di, ang sanmarokno khna ya ta wng ja di.

² Ano mokol kai ja di tei ani kók khna ja di; ani jwngjal bángwi uphla káphla nang kha,

³ tamni hwn ba bórok ano digi-sigi phnango tei borok hamyarokni khorang khna-o. tei bórok jolijagwi ano kebengwi bacha-o.

⁴ Ani bwkha bisingo yoksa kha, thwina kirima hap kha.

⁵ Ang kiriui kwlwibra kha, tei belai khe kirima ano kobolsa kha.

⁶ Ang hai hwnwi hwn kha, “Tokthuni hai ani bwkrang tongma tlai! birwi thángwi kwchang kwchang khe tongwi kha mun;

⁷ kubui’-no, ang hakchalma-o khárwi tháng kha mun; ang hasinglwngo se tongwi kha mun; Sela

⁸ Ang hakhe doui nokbar kotor tei bangkundrini yakni khárwi tongthai naitugwi kha mun.”

⁹ Ubrum jabrum khlai di, o Subraiyung bórokni kókno ubrum-jabrum khlai rw di; tamni hwn ba ang kamiyungo ur pati laima bai uálaima nuk kha.

¹⁰ Bórok hor-sal chokdeual tẃi khe himgurung lai-o, tei sumsok bai digi-sigi aro tongo;

¹¹ a bisingo komormung tongo; káduljakmung bai bandimung aroni laharno yakar ya.

¹² Abo thesra karinai kebengnai ari ya, hakhe ang abono soiwi man kha mun; abo ani slái kotor hwnwi kung chuknai ani kebengnai ari buya, hakhe ang aroni khárwi yók kha mun.

¹³ Tamo khe omo le nwng se, sak baksa, ani pal, ani bayap.

¹⁴ bórok bai ang kiching halok khe tongo; chwng baksa khe Kaitorni nogo tháng lai-o.

¹⁵ Bórok gaija thung; kwthangwi mangkhoro kw lái bai thung; tamni hwn ba borokni nokrogo tei bórokni bwkha bisingrogo hamya máng kupulung.

¹⁶ Tamo khe ang khe Kaitorno ringnai, tei Subraiyung ano mwthangnai.

¹⁷ Sanja-o, phung aidrobo tei diboro ang kengaiwi sannai tei ani khorangno khnanai.

¹⁸ Bo ano kaham kwrwng khe choba-o phiyógo, tamni hwn ba kwbángma’-no ano kebengwi bachamani.

¹⁹ Yaphangni simi achukthayungo achugwi tongnai Kaitor, khnanai tei bórokno koinene khlainai tamni hwn ba bórok sláijak ya tei Kaitorno kiri ya. Sela

²⁰ Ani palrok ani kichingno kosonsaui swmai narwkmano swbai kha

²¹ bini khukni kók gini sláibo kwsap, yang bwkha-o khe choba nangna se uansukjak; bini kóktháirok thokni sláibo mijiljak, tamo khe yang le bisingo khe sengrok se huijak.

²² Nini pojano Subraiyungno yaphar di, hakhe bo nono darok rwi tonnai; bo uáisa phano borok kahamno ninangna rw glak.

²³ Tamo khe o Kaitor, nwng bórokno komorna hakhor kuthugo khiklainai; butharnairok, bandinairok bórok bórokni umorni khaksa phano thang glak. Tamo khe ang le nini thani se bwkha beranai. Rwchapmung tẃithenani bagwi Daudni rwchapmung: Gato Philistiasong bai mechenjak phuru