LOBMUNG 51 - Kok Borok (Re-edited) Bible (BSI)

¹ O Kaitor nini pái phlai ya hamjakma bai, ano khairok ja di; nini khairokma kwbángma bai ani samung cha yarokno hu-ui pái di.

² Ani samung cha yano sú-ui khibi di, ani sumsokno súcha ja di.

³ Tamoni hwn ba ang ani samung cha yarokno saui mano, tei ani sumsokrok ani bwskango pháng pháng.

⁴ Nini thani, katswi nini thani ang sumsok khlai kha, nini mokol bai sitrajakmano’-no khlai kha, hakhe nwng majra sa khlaima le sói se tei nini buj thummabo srai-srai.

⁵ Ao, ang le cha ya khe se achai-o, amani ogo chujak phuruno ang sumsok gwnang.

⁶ Nwng le bwkha bisingo se kubuino ton rwna hamjago; aboni bagwi ani bwkha bisingo simung phrwngja di.

⁷ Hisop bai ano súcha di, hakhe ang kwthar wngnai; ano sú di hakhe ang kothor kwsapni slái kuphur wngnai.

⁸ Ano bwkha srangma bai tongthokni kók khna rw phi di; nwng bai sukhrupjakma bekrengrok bwkha srang thung.

⁹ Ani sumsokno ta naisik si di, tei ani samung cha yarokno hu-ui pái si di.

¹⁰ O Kaitor ani bisingo bwkha kuphur snam ja di, tei ani bisingo kwtal tei sói bwkhano rw di.

¹¹ Ano nini bwskangni ta rwkhlai ja di, tei nini phola kwtharno ani oroni tlangwi ta pái ja di.

¹² Nini mwthangmani tongthokno ano rw phi ja di, tei nini muchung tẃi tongna muchungnai bwkhano rwui ano songcha di.

¹³ Hakhe ang samung hamya tangnairokno nini lamano phrwngnai, tei sumsok gwnangrok nini thani kiphilnai.

¹⁴ O Kaitor, o ano mwthangnai Kaitor, ang thẃi kochok rwmani ano phiyók si di, hakhe ang khorang kotor khe nini phiyókmungno tẃi rwchapnai.

¹⁵ O Subraiyung, búkhúk kiyok rw di, hakhe ang nono lobwi mannai.

¹⁶ Tamoni hwn ba nwng ratharwi yapharmarokno bwkha phurjak ya; tumung ang sógwi yapharmung yaphar khebo nwng bwkha phurjak glak.

¹⁷ Bwkha kwbai bwkha bai yapharmarokno se Kaitor yachago; o Kaitor nwng bwkha kwbai khairoksusuk bwkharokno khibi glak.

¹⁸ Nwng Siyonno kaham muchungma bai bini kaham khlai di, Jerusalemni chokdeualrokno tisa phi di,

¹⁹ aphuru khe sói khe ratharwi barokmarokno, sógwi yapharmano tei bebak sógwi yapharmarokno bwkha phurjaknai; aphuru khe nini háyá-o musuk chwlarok barokjaknai. Idomsa Doeg Solno Daud Ahimelekni nogo tháng kha hwnwi saui phuruni: Daudni rwchapmung