LOBMUNG 50 - Kok Borok (Re-edited) Bible (BSI)

¹ Kwplaisa Kaitor Subraiyung kók sa-o tei salkabaini simi salthángbai jora bo o hani bebakno ringo.

² Siyono tongwi, sói sói kubui naithogo tongwi Kaitor kwchẃng wngwi chẃngsa-o.

³ Chini Kaitor phainai, bo siring siring tong glak, hór bini bwskango tongwi bebakno kham rw anw, tei bini yang yang belai nokbar kotor phai anw.

⁴ Bo bini bororokno buj thumna bagwi sakani nokhano tei swngcharno ringnai:

⁵ Bo hai hwnwi sa-o “Ratharma bai khe ang bai swmai tangnairokno, ani kók khnaui tongnairokno ani thani thum di.”

⁶ Nokharok bini bujsóino sakhlai-o, tamni hwn ba Kaitor sakphangno buj thumnaisa. Sela

⁷ “Khna di, o ani bororok, ang sa anw, o Israil khna di, ang nono kebengwi kók berwi sa anw. Angno Kaitor, nini Kaitor.

⁸ Nini ratharmungrokno tẃiwi ang khorai glak; nini sógwi yapharmarok ani bwskango máng.

⁹ Ang nini nokni musuk masa phano na glak, nini punrokni gutnibo ang pun na glak.

¹⁰ Bolongni bebak mal-matarok ani máng, sai-sai hatháirokni yabrwirok ani máng.

¹¹ Ang hatháini bebak tokrokno sini-o, tei hapharo himwi tongnairok ani mángno.

¹² “Tumung ang ok khui khe nono sa glak, tamni hwn ba o swngchar tei aro tongnairok bebakno ani máng se.

¹³ Ang ba musuk bahan da chá eba punni bwthẃi da nwng ba?

¹⁴ Kaitorno hambai rwui ratharmung rathar di tei Kwplaisano chakmano rw di.

¹⁵ Digi-sigini phuru ano ring di; ang nono phiyóknai tei nwng ano chẃngsacha khlainai.”

¹⁶ Borok hamyano Kaitor hai hwnwi hwno: “Nwng ani kerongno nini búkhúk bai sanani, eba ani raidano tẃi sa thai da tong?

¹⁷ Tamoni hwn khe nwng ani phrwngmano chajak ya, tei ani kókrokno uklogo khibiui rw-o.

¹⁸ Nwng sikhok bai bayap kha-o, tei lupcharok bai gwdalo.”

¹⁹ “Nini búkhúkni kókno nwng hamya-o phnango, tei nini bwslai bandina chabo.

²⁰ Nwng achugwi nini sakni takhukno hamya sa-o; nwmani bwsano se hamya sa-o.

²¹ Nwng omo twirokno khlai kha, ang siring siring’-no tong kha; angbo nwng haino khoroksa hwnwi nwng chong kha. Tamo khe tabuk le ang nono kulnai tei nono majra ber sinai.”

²² “Muitu narwk di, Kaitorno poknairok, ang norokno chikhagwi páinai tei khoroksa phano norokno mwthangnai tong glak.

²³ Ano hambai rwui yapharmung tubunairok ano bórom rw-o; kaham khe tongnairokno ang Kaitorni mwthangmano phunuknai.” Daudni rwchapmung: Diyari Nathan Daudno Batseba bai sak gwdalwi tongmung sitra tongma kókno sa phaimani yagulni.