LOBMUNG 48 - Kok Borok (Re-edited) Bible (BSI)

¹ Subraiyung wng kha kotor, chini Kaitorni kamiyungo bini kwthar hathái-o bo belai khe lobjago,

² naithok ha swngchar gwnangwi bororokni tongthokmung salsibai-o Siyon hathái bugra kotorni kamiyung.

³ Kaitor sakphang se aroni nok kuchuk katijaknai nok kwrak.

⁴ Hakhe bugrarok kuthum lai kha, bórok pal khe phai lai kha.

⁵ Bórok abono nuk kheno, bórok uanajak lai kha; bórok sundru lai kha hakhe khár bai kha;

⁶ bórok aro kirijak lai kha, sak kengna phuru bwrwi ok sajak tẃi khe sajak kha.

⁷ Salkabaini nokbar kotor Tarsisni rungkotorno kobon rw tẃi khe kobon rw kha.

⁸ Chwng khnama haino suarirokni Subraiyungni kamiyungno nuk kha, chini Kaitorni kamiyungno, Kaitor abono mol brúmni bagwi tisa-o. Sela

⁹ Chwng nini noktharo nini pái phlai ya hamjakmano kaichomwi uansuk lai kha.

¹⁰ O Kaitor nini mung le chúkjakba swngcharni páithak jora nwng lobjaknai. Nini yagra yak kwplai bai kupulung.

¹¹ Siyon hathái bwkha srang thung, nini bujrokni bagwi Judiani kamiyungrok tongthok thung.

¹² Siyono himgurungwi nai di, aro ayang uyang himwi aro nok kuchuk khung bwswk naiwi nai di,

¹³ bini kwrak chokdeualno mokol kai di; aroni nok kwrak tongmarok tẃi himwi tháng di, hakhe nwng nini ulni bosongrokno saui khna rwui man anw;

¹⁴ tamni hwn ba bo se Kaitor, mol brúmni bagwi bo se Kaitor, bo mol brúmni bagwi chini tẃithernai wngnai. Kurani bwsarokni lobmung