LOBMUNG 44 - Kok Borok (Re-edited) Bible (BSI)

¹ O Kaitor chwng chini khunju baithang khna kha, chini chuchusongni jora-o nwng tamo samung khlai kha, chuchusong sa lang kha;

² nwng bahai khe dopharokno yak baithang rwkhlaiwi bórokno tongthai ha rw kha; nwng dopharokno sátok kha tei bórokno khe phiyók kha;

³ tamni hwn ba bórok sakni seng bai ha manma ya, eba bórokni phan bai kwplai wng ya; tamo khe nini yagra yak se, nini khairokma bai se bwkha phurjakma bai se nini chẃngsacha bai nwng bórokno khairok kha.

⁴ Nwng se ani Kaitor ani bugra; nwng Jakobno mwthangna dagi kha.

⁵ Nini phan bai nwng chini kebengnai arirokno dagarwi rohor kha; nini mung bai chini kebengnai arirokno chwng kádul kha.

⁶ Ang ani badukhung bai khom-khom wngjak glak, ani sengbo ano mwthangwi man glak.

⁷ Tamo khe nwng chini kebengnai arirokni yakni mwthango, tei chwngno naislernairokno nwng bwkha urumuru khlai kha.

⁸ Chwng Kaitorno tẃiwi kung chugui tongnai, tei nini mungno mol brúm brúm lobnai. Sela

⁹ Nwng chwngno khibi kha, lachi rw kha, tei chini sengkrakrok bai nwng tháng li ya.

¹⁰ Nwng chini kebengnai arirokni yakni chwngno kiphil rw kha, tei chini kebengnai arirok chwngno swprak phai kha.

¹¹ Nwng chwngno ratharjakna bagwi tonma mera hai khe yapharwi rw kha, tei dopharokni bisingo chwngno piring-poroi khlai kha.

¹² Nwng nini bororokno haino phal kha, bórokno phalma rang bo morok rw li ya.

¹³ Nok arini thani nwng chwngno mwnwimung tei chini yang ayang tongnairokni thanibo thesra kariui mwnwijaknai se khlai si-o.

¹⁴ Nwng chwngno dopharokni thani kók phunugui sajaknai tei lukurokni thani khorok jangrijaknai se khlai si-o.

¹⁵ Sal brúmno ani lachimung ani bwskango, tei ani lachimasingcha se ano kholop si-o,

¹⁶ abo thesra karinairokni kókrok tei kók sitra sanairok bai se khlaijago, ani yagul sunairokni mokol bwskango.

¹⁷ Omorok bebakno chini saka-o klai kha, hai phano nwng chwngno pok ya, eba nini swmaino sak nang ya wng ya.

¹⁸ Chini bwkha nono khibi ya khu, chini yapri nini lamani phér ya khu,

¹⁹ siyal tong thani nwng chwngno swbaiwi sukhrup kha tei chwngno mwnakma bai kholop kha.

²⁰ Tumung chwng chini Kaitorni mungno pok khe, eba chini yak kubun mwtaino khulumna tháng khe,

²¹ Kaitor abono nuk glak diba? Tamoni hwn ba bo bwkhani huijakrokno saui mano.

²² Tamoni hwn ba nini bagwi chwng sapung butharjago, tei ratharjakna tonjaknai merarok hai khe lekhajago.

²³ O Subraiyung, sicha di, nwng tamoni thu-ui tong? Bacha di, chwngno mol brúmni bagwi ta khibi di!

²⁴ Nwng tamoni nini mwkhang hui? Tamoni chini dukhurokno tei sátokjakmano pok?

²⁵ Tamoni hwn ba chini phola hadlwi-o kwlwk kha; chini bwsak ha bai swrap kha.

²⁶ Chwngno chubana bagwi phai di bacha di. Nini pái phlai ya khairokmani jarwi chwngno phiyók ja di. Rwchapmung tẃithernaini bagwi. Lilini rwchapmung bai. Kurani bwsarokni hamjakmungni rwchapmung