LOBMUNG 43 - Kok Borok (Re-edited) Bible (BSI)

¹ O Kaitor ano buj thum di, Kaitorno kiri ya bororokni yakni ano kati rwui ton ja di; bujsói tẃi ya tei bandinai borokrokni yakni ano phiyók ja di!

² Nwng se ani tongthai rwnaisa Kaitor; nwngba ano tamoni khibi lang? Ang ba tamoni kebengnai arirok bai sátokjagwi swlwksaui himgurungwi ma tong?

³ Nini pohor bai kubuino rohor ja si di; bórok ano tolwi tẃi si thung; bórok ano nini hathái kwtharni nini tongthai-o tubu si thung.

⁴ Hakhe ano tongthokma rwnaisa Kaitorni thani, bini háyá-o thángnai; tei ang nono chongpreng bai khe lobnai o Kaitor ani Kaitor.

⁵ O ani phola, nwng tamoni khibijak lang tei tamoni ma lengpro lang? Kaitorno se khatungo; tamni hwn ba ang bono lob phinai, ani chubanaisa ani Kaitor. Rwchapmung tẃithernaini bagwi Kurani bwsarokni rwchapmung