LOBMUNG 41 - Kok Borok (Re-edited) Bible (BSI)

¹ Kwrwirokni bagwi uansuknai borok bono hamchajak; Subraiyung, digi-sigini salo bórokno phiyóknai.

² Subraiyung bono kati rwui tonnai tei kwthang tonnai; bórok ha-o tongthogwi tongnai hwnwi sinijaknai. Nwng bórokno bórokni kebengnai arirokni yapha-o yakarwi rw glak.

³ Bórok thongaro klai tong phuru Subraiyung bini pekam naiwi ham rwnai; bo hamya klai tong phuru nwng bini hamyarokno ham rw-o.

⁴ Ang hai hwnwi sa kha, “Subraiyung, ano khairok ja di; ano ham rw ja di; tamni hwn ba ang nono kebengwi sumsok khlai kha.”

⁵ Ani kebengnai arirok ano, “Bo buphuru gaijanai kha? buphuru bini mung komornai kha?” hwnwi sa lai-o.

⁶ Bórok ano naina phai khe bórok kók chúk yarok sa lai-o, tei bórokni bwkha-o hamya se uansuk lai-o; phataro thángwi bórok buino uai-uai sa-o.

⁷ Ano naislernairok ani bagwi phupui-phaphai sa lai-o; bórok ani bagwi katswi hamya khlaina uansuk lai-o.

⁸ “Bo bemuk hamya manjak kha; bo tei hamwi bachaui man glak kha” hwnwi sa lai-o.

⁹ Ani kháni kiching, ang bwkha beramani borok, ani mai chánairok se ano yakorai har kha.

¹⁰ Tamo khe o Subraiyung, nwng ano khairok ja di, tei tisa ja di, hakhe ang bórokno yagul su-ui man anw.

¹¹ Tamo khe ang kók khnaui tongmani bagwi nwng ano mwthangwi ton kha, tei nwng ano nini bwskango mol brúm brúmni bagwi ton kha.

¹² Ani hama bai nwng ano romwi ton kha tei mol brúmni bagwi nini bwskango ton phai kha.

¹³ Kusung kusung Israilni Kaitor, Subraiyung hamchajak khe tong thung. Amen tei Amen. Rwchapmung tẃithernaini bagwi Kurani bwslasongni Moskil