LOBMUNG 39 - Kok Borok (Re-edited) Bible (BSI)

¹ Ang hai hwnwi sa kha, “Ani bwslai bai sumsok khlai ya tẃi khe ang hus khe ani lama-o himnai; ani bwskango borok hamyarok tong sak ang ani búkhúk muthubwi tonnai.”

² Ang kók sa yaui siring siring khe tong kha; kók kahamno suda sa li ya; hakhe ani bwkha subuksama bángwi phai kha,

³ ani bwkha bisingo tungphla kha. uansuk te uansuk te khá-o hór khamcha kha; hakhe ang bwslai bai kók sa kha.

⁴ “Subraiyung, ano ani páithakno si rw di, tei ani sal bwswk lok saui man rw di; ani salrok bwswk khe doui thángwi tong ano si rw di.

⁵ “Nwng ani salrokno muk sa bara rw kha, ani thangsungni umor le nini thani mungsa buya. Bororok kwthang tongma le rangma na saui tongma simi se. Sela

⁶ Kubui’-no bororok le sampili hai se kutulwi thángo. Kwrwi kwrwini se bo chiri-mokorok wngo; bórok rochong rwui rúng lai-o, tamo khe sabo ma cháno si ya.

⁷ “Subraiyung, tabuk ang tamono naisingwi tongnai? Nwng’-no ani khatungma.

⁸ Ani bebak samung hamyani ano phiyók ja di. Ano butuarokni mwnwimung ta khlai ja di.

⁹ Ang siringcha wng kha; ang ani búkhúk phiyok li ya tamni hwn ba nwng se abo khlai-o.

¹⁰ Ano swprakma thak si di; nwng bai yamusung súkjagwi ang chemai kha.

¹¹ Nwng bororokno bórokni sumsokni bagwi khorai kha tei nwng bini hamjakmano yóngsa hai khe butharwi pái kha; Kubui’-no bebak bororok’-no hama na sa kaisa hai se.” Sela

¹² “O Subraiyung, ani surima khna ja di, ani kapma khunju kai ja di; ani muktwirok klaimano nuk ya hai khe ta tong ja di. Tamoni hwn ba ang nini thani thángwi páinai nograi hai angbo ani chuchusong hai phatarsa se.

¹³ Ang yakarwi thángwi pái súk ya sak nwng ano ta naisik si di hakhe ang haino hai mwnwi sru-sru wngwi man anw.” Rwchapmung tẃithernaini bagwi: Daudni rwchapmung