LOBMUNG 38 - Kok Borok (Re-edited) Bible (BSI)

¹ O Subraiyung nini jolima bai ano ta kul ja di, eba thamchi tungjak khe ano ta phrwngja di.

² Tamoni hwn ba nini chakhlarok ano supla kha, tei nini yakbo ano belai khe sinklwk kha.

³ Nwng jolima bagwi ani sak hamwi man li ya; ani sumsokni bagwi ani bekrengbo hamchaui man li ya.

⁴ Ani samung hamyarok ani khorok lái kha; abórok manwi hilik hai khe ani thani belai hilik kha.

⁵ Ang butua wngma bagwi ani kwsarok sogwi mwnam kha;

⁶ ang ma kong kha tei botok khe ma súkpái kha; ang sapung kengai-o.

⁷ Ani bwchango yoksa kha tei ani sakrok kisa phano hamwi man li ya.

⁸ Ang belai phan kwrwi kha tei báikhrup súk kha; ani bwkha yokmani bagwi ang kengai-o.

⁹ O Subraiyung ani bebak naimarok nwng si-o; ang kapmani nwng saui man ya wng ya.

¹⁰ Ani bwkha kwlwibra-o, ani phan chúk li ya; tei ang mokolbo nuk tha ya wng rw rwk laha.

¹¹ Ani kichingsong tei logisongrok ang bai kwchal khe tong lai-o, tei ani nok arini bororokbo hakchal khe tong kha.

¹² Ano butharna nainairok ani bagwi khẃi chak lai-o; ano dera rwna nainairok ano sokomorna kók chap lai-o, tei sapung bandina máng uansuk lai-o.

¹³ Tamo khe ang nathong hai khe khna ya tongo; kók man yarok hai khe kók sa yaui tongo.

¹⁴ Kubui’-no, ang khunju khna yarok wng kha, bórok búkhúkbo per ya.

¹⁵ Tamo khe o Subraiyung ang nono khatungwi tongo; o Subraiyung ani Kaitor, nwng se khnanai.

¹⁶ Ang hai hwnwi ma koija-o, “Ang yapri kásleui klai phuru nwng bórokno ano nugwi ta tongthok rw di, kók kotor sa lainairokno.”

¹⁷ Ang klai twtwi wngwi tong kha, ani dukhubo ang bai máng tongwi tong kha.

¹⁸ Ang ani cha yano gosi-o; ani sumsokni bagwi ang khá yógo.

¹⁹ Ano kwrwi kwrwini kebengnai arirok phan gwnang tei kwbángma’-no ano kwrwi kwrwini naislerjago.

²⁰ Ang bórokni kaham khlaimano hamya bai khe yagul sunairok khe ani kena arirok, tamni hwn ba ang kahamo se tongo.

²¹ O Subraiyung ano ta khibi ja di; o ani Kaitor ang bai ta chal ja di;

²² o ano mwthangnai Subraiyung ano dakti chuba ja di. Rwchapmung tẃithernai Jeduthunni bagwi Daudni rwchapmung