LOBMUNG 37 - Kok Borok (Re-edited) Bible (BSI)

¹ Samung hamya tangnairokni bagwi nwng ayuk-muyuk ta wngjak di; samung cha ya khlainairoknobo ta músú di,

² bórok daktino samrok hai khe mwrannai, sam kwkhrangrok hoicha tẃi khe hoichaui thángnai.

³ Subraiyungno poito khlai di tei samung kaham tang di; hakhe nwng ha-o tongnai tei kirimung kwrwi khe tongthogwi tongnai.

⁴ Subraiyungni thani bwkha srang di, hakhe bo nini bwkha muchungmano rwnai.

⁵ Nini yapri Subraiyungno yaphar di; bini thani bwkha bera di, hakhe bo nono chubanai.

⁶ Bo nini kahamno chati hai khe kwchẃng khlainai, nini bujsóino dibor khiring khiring phuruni hai khe kwchẃng khlainai.

⁷ Subraiyungni bwskango siring siring wng di, tei bwkha logwi naisingwi tong di; hamya chapmung chapnairokni hamma chamano nugwi ámang-chímang ta wngjak di.

⁸ Thamchi tung yaui tong di, jolimano khibi di. Ta músú di, abo bai hamya se khlai-o.

⁹ Tamoni hwn ba samung hamya tangnairok ma kwma anw, tamo khe Kaitorno naisingwi tongnairok khe hano man anw.

¹⁰ Tei srapsa tong kheno, borok hamyarok tei tong glak; nwng bórokno bórokni tongthai-o kaham kwrwng khe nugwi tong phano, bórokno aro tei nuk glak.

¹¹ Tamo khe koinenerok hano mannai, tei kwbángma khe hamari manẃi bórok kirimung kwrwi khe tongnai.

¹² Borok hamyarok, borok kahamrokni bagwi hamya chap lai-o, tei bono naisigwi ua hul lai-o;

¹³ tamo khe Subraiyung borok hamyarokno naisigwi mwnwi anw, tamni hwn ba bo bini bwskango phaiwi tongmani salrokno nugo.

¹⁴ Tongmung kaham tongnairokno butharna bagwi borok hamyarok seng sotrosa kha tei badukhungrok thon kha;

¹⁵ bórokni seng bórokni bwkha-o hapnai, tei bórokni dangai báinai.

¹⁶ Borok hamyani kwbángma tongmani slái, borok kahamni kisicha tongma phano kaham.

¹⁷ Tamoni hwn ba borok hamyarokni yak báinai, tamo khe Subraiyung borok kahamrokno khe naikolwi tono.

¹⁸ Subraiyung borok kahamrokni salno si-o, tei bórok mol brúm tong phlainai sokat mannai;

¹⁹ jora hamyarok sók phaibo bórok lachina nang glak, chacharara phurubo bórok asuda khe tongnai.

²⁰ Tamo khe borok hamyarok khe komornai, tei Subraiyungno kebengnai arirok hapharni sam hai srapsa se naithok wngwi tong anw; bórok hoku hai khe kwmaui thángnai.

²¹ Borok hamyarok lakai naui su phi ya, tamo khe borok kahamrok le khairokma gwnang tei rw thani yak kuar;

²² phiya Subraiyung bai hamari rwjaknairok hani bugra wngnai, tamo khe bini bati nangnairok khe komornai.

²³ Borokni yaprirok le Subraiyungni aroni se, tei bo bwkha phurjakma tẃi yapri sénaino songcha-o;

²⁴ bo klai phano katswi klaiwi tháng súk glak, tamni hwn ba Subraiyung bini yakno romwi tongo.

²⁵ Ang sikla tongmani tabuk chakra wng kha, tamo khe tabuk phano borok kahamrokno haino klaijak khe eba bini bwsaroknobo chámung ma bírma nuk ya kho.

²⁶ Bo yak kuar khe solok rw máng tongo, bini bwsarok hamari mano.

²⁷ Hamya bai kak di tei samung kaham tang di; hakhe nwng mol brúmno tongnai.

²⁸ Tamoni hwn ba Subraiyung bujsóino hamjago; bo bini kók khnaui tongnairokno khibi ya. Borok kahamrok mol brúm brúmno darok rwui tonjaknai, tamo khe borok hamyani bosongrok kwmanai.

²⁹ Borok kahamrok ha mannai tei aro mol brúmno tongnai.

³⁰ Borok kahamni khukrok kók elemi sa-o tei bini bwslai bujsóini kók sa-o.

³¹ Bini bwkha-o bini Kaitorni kerong tongo; bini yaprirok kásle ya.

³² Borok hamya, borok kahamno mokol kaiwi tongo, tei bono butharna lama naitugo.

³³ Subraiyung bono borok hamyani yago yapharwi rw glak, eba buj thumjak phurubo bono majra ber glak.

³⁴ Subraiyungno naising di, bini lama-o him di, tei bo nini yago ha rwna bagwi nono kuchugo tisanai; nwng borok hamyarok komormano nuk anw.

³⁵ Ang borok hamyano phan gwnang khe nukmani, Lebanonni sidar phang hai khe chuksajak khe nukmani.

³⁶ Ang ayang tẃi tei uáisa lái phuru khe abono aro tei nuk phi li ya; ang abono naituk kha, tamo khe ma se man phi li ya.

³⁷ Borok kahamno mokol kaiwi tong di, tei borok sutrangnobo mokol kaiwi tong di, bórokni bwsarok kwchang kwchang khe ma tongnai.

³⁸ Tamo khe samung sitra tangnairok le uáisa bai sokomorjaknai; borok hamyarokni ulni bosongrok sokomorjaknai.

³⁹ Borok kahamrokno Subraiyung se mwthango; digi-sigi phuru bo se bórokni tongthai.

⁴⁰ Subraiyung bórokno chuba-o tei phiyógo; bono poito khlaimani bagwibo bo bórokno borok hamyarokni yakni phiyógo tei bini thani tongthai na phaimani bagwi mwthango. Daudni rwchapmung