LOBMUNG 35 - Kok Borok (Re-edited) Bible (BSI)

¹ O Subraiyung ano kebengwi bachanairokno nwngbo bórokno kebengwi bacha di; ang bai choba nang lainairok bai nwngbo bórok bai choba nang lai di.

² Nwng phui bwsa bai phui kotorno na di, tei ano chubana bagwi bacha di!

³ Ano kebengnai arirokno kolonga tei koslu naui ano riphriknairokni lama muthup di; Ano “Ang se nini mwthangnai” hwnwi sa di.

⁴ Ano butharna chaitoknairokni mwkhang sógwi lachimasingcha khlai di. Ani bagwi hamya chapnairok bórokni bwkha urumuru khlaiwi rwui kiphil rw di!

⁵ Bórok nokbaro gundak kobonjak hai wng thung, Subraiyungni suarirok bai bórok rwkhlaijak thung.

⁶ Bórokni lama mwnak tei rimi wng thung, Subraiyungni suarirok bai bórok riphrikjak thung.

⁷ Bórok ereng ereng’-no ani bagwi khẃi chago; ereng erengno bórok ani langmani bagwi hakhor khur lai-o.

⁸ Bórokni thani achomsa komormung phai thung. bórok tepsa khe thonmani a khẃi-o bórok’-no kwcha thung; bórok aro klaiwi gaija thung.

⁹ Hakhe ani langma Subraiyungo tongthoknai, bo phiyókmani bagwi khápang srangnai.

¹⁰ “O Subraiyung nwng hai sabo tong? hwnwi ani sakni bekrengrok sa anw, nwng kebelrokno phan gwnangrokni yakni mwthango, bigra tei biyalo klaijakrokno nwng’-no seknairokni yakni phiyógo.”

¹¹ Naislernai sakki bachasa kha; bórok ang saui man ya abórokno se sẃngo.

¹² Bórok ani kahamni hamya bai se yagul su-o; ani bwkha bái kha.

¹³ Tamo khe bórok hamya phuru ang rí kichik kano; ubas tongwi ang langmano leng rw-o. Ang khorok bomsonwi suri kha,

¹⁴ ang kiching eba takhuk wng phano; ang buma thwijagwi kapnai hai khe bomwi tong kha.

¹⁵ Tamo khe bórok ang yapri kásle phuru khe mw se mwnwi lai si-o, bórok ano kebengwi kwrẃngsa khe kuthum lai kha; sini ya nuk ya dagaitrok ano sachik-sapro khe sek phai kha;

¹⁶ bórok katswi búkhúk sitra kariui ano thesra kari lai kha, ano naisigwi bórok ua hul lai kha.

¹⁷ O Subraiyung, nwng tei bwswk nai sinai? Ano sokomorna naimani yakni ano mwthang si di, ani pholano singhorokni aroni mwthang si di!

¹⁸ Hakhe ang kwbángma khe luku kuthumjak bodolo nono hambai rwnai; bórok kwbángmani bwskango ang nono lobnai.

¹⁹ Ano kebengnai arirok bai ano mechen rwui bórokno ta tongthok rw di, eba ano naislernairok bai ano muphlik-muphlik khe ta naisik rw di.

²⁰ Tamoni hwn ba bórok kók kaham sa ya, tamo khe ha-o kwchang kwchang khe tongnairokno bandina kók se chap lai-o.

²¹ Bórok ano naisigwi búkhúk kuar khe khua lai-o; “Ei, chwng abono chini mokol bai nuk kha” hwnwi bórok sa lai-o.

²² O Subraiyung nwng nuk kha, siring siring ta tong si di, o Subraiyung ang bai ta chal ja di!

²³ Bacha di, sicha di ano kati rwna bagwi, ani bagwi o ani Kaitor ani Subraiyung!

²⁴ O Subraiyung ani Kaitor, nini buj kaham bai ano kaham hwnwi sakhlai si di tei ani digi-sigi nugwi bórokno ta mwnwi rw si di.

²⁵ Bórokno, “Hok, chwng omo tẃi’-no naimani” hwnwi ta sa rw si di. Bórokno, “Chwng nono monok kha” hwnwi ta sa rw di.

²⁶ Ani digi-sigino nugwi tongthoknairokno lachi rw di tei bwkha bái rw di; ani kebengwi kung chuknairokno lachimung man rwui bórom kwrwi khlai di.

²⁷ Ani kahamno hamjaknairok tongthogwi chirik thung, khápang srang thung, sal brúm bórok, “Subraiyung wng kha kotor, chẃngsacha wng thung, bo bini selengni hamkraino hamjago” hwnwi sa thung.

²⁸ Hakhe ang nini kahamno sal brúm lobwi sa máng tongnai. Rwchapmung twithernaini bagwi: Kaitorni seleng Daudni Rwchapmung